Mubweendelezi bwa Kristo bwaluyando, ibukkale bwabantu bunooyaa bubota. Jehova Leza ikwiinda mumwanaakwe Jesu Kristo uyoogwisya zintu zyoonse zileta macise abuumba. “Uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.” (Ciyubunuzyo 21:4) Kaamba zyabukkale obu, imusinsimi Isaya waamba kuti: “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyaataambi luyooimbisya.” (Isaya 35:5, 6) Alimwi bafwu, “bapati abaniini,” bayoobusigwa kabajisi bulangizi bwakutafwa limbi!—Ciyubunuzyo 20:12.

Noliba lino “inkamu impati” yabantu ibayoofwutuka Harmagedoni bali mukubunganizigwa. Bali mukulibambila kujatikizya Bulelo bwa Kristo bwa Myaka iili Cuulu. Nokuba kuti tabazyi ciindi cini ibulelo obo nobuyootalika, basyoma kuti kuciindi ncabikkide Leza mwini, buyootalika. Mulakonzya kuba akati kabo, pele anywebo mweelede kulibambila, ikutali kwiinda mukusambala mpasya zyanu akuunka kubusena bumwi pe, pele nkubaa luzibo lwini-lwini lwa Jehova Leza alimwi amakanze aakwe kwiinda muciiyo ca Bbaibbele. Kakunyina kubbadela naa kulimvwa kusinikizigwa kuli koonse, Bakamboni ba Jehova bayookkomana kumutondezya mbocinga camugwasya nywebo amukwasyi wanu woonse ciiyo ca Bbaibbbele. Basikumwaya magazini eyi bayookkomana kumupa twaambo atumbi tuyungizidwe.

Amujatile Camoyo Woonse

“Mbubonya obo alakwe Taata uuli kujulu mbwazoomucitila nywebo kuti tamulekeleli nyoonse bakwanu camumyoyo yanu.”—MATAYO 18:35.

1, 2. (a) Ino simucita zibi uudumide wakatondezya buti kuti ulamuyanda Jesu? (b) Nkaambo nzi Jesu nkaakaamba kujatikizya ceeco?

KULANGILWA kuti wakali mukaintu mwaamu, tanaakali muntu wakali kulangilwa kujanika muŋanda yamukombi. Ikuti naa bantu bamwi bakagambwa kumubona kuŋanda eyo, nkokuti nzyaakacita zyakali kwiinda kugambya. Wakaunka kumwaalumi iwakali kulilemeka kapati elyo wakatondezya kulumba kumilimo njaakacita mwaalumi oyu, wakasanzya matende aakwe amisozi yakwe akwaapukutya masusu aakwe.

² Imwaalumi oyo Jesu, tanaakasululwa amwanakazi oyo walo mumunzi omo iwakadumide kuti “[m]mukaintu mucitazibi.” Pele imwini ŋanda, Simoni imu Farisi wakalilibilikide kuti mukaintu oyo wakali simucita zibi. Jesu wakavwiila kwiinda mukuluula makani aabaalumi bobile ibakajisi zikwelete kuli sikukweletesya. Omwe wakakweletede mali manji kapati—imali imubelesi ngakonzya kubelekela kwamyaka iitandila kuli yobile. Umbi wakakweletede buyo mali masyoonto aakonzya kuvwolwa mumyeezi iitasiki kwiitatu. Nobakakakilwa kwaajosya, sikubakweletesya “wakabajatila boonse bobile.” Cakutadooneka ooyo iwakakweletede mali manji wakaleelede kutondezya luyando. Naakamana kweezyanisya mulimo waluzyalo wamukaintu oyu kumakani ayo, Jesu wakayungizya njiisyo eyi: “Uujatilwa kaniini, uyanda kaniini.” Mpoonya wakaambila mukaintu kuti: “Wajatilwa zibi zyako.”—Luka 7:36-48.

3. Ncinzi ncotweelede kulilanga-langa tobeni?

³ Amulibuzye kuti, ‘Neekali mukaintu oyo naa neekali mubukkale bukozyenye mpoonya ndafwidwa lubomba, sena inga ndaba muntu uuzumanana calunya kutajatila bamwi?’ Mulakonzya kwiingula kuti, ‘Peepe!’ Pele sena ncobeni musyoma kuti mulilibambilide kujatila bamwi? Sena eco nceciimo canu? Sena mulacita obo lyoonse kakunyina buyumuyumu, alimwi sena bamwi inga bamupandulula kuti mulajatila? Atubone umwi aumwi wesu ncayelede kwaalangila-langila makani aya cakusinizya.

Kujatila Kulayandika—Alimwi Kwacitwa Kulindiswe

4. Nkaambo nzi ikatujatikizya nkotweelede kuzumina?

⁴ Tamulondokede pe mbubwenya mbuli mbomuzyi kabotu-kabotu. Ikuti mwabuzyigwa, mulakonzya kuzumina ambweni mane akuyeeya majwi aali kuli 1 Johane 1:8 aakuti: “Na twaamba kuti tatujisi zibi, twalyeena lwesu tubeni, elyo lusinizyo taluli mulindiswe.” (Ba-Roma 3:23; 5:12) Kuli bamwi, ibusizibi bwabo bulakonzya bwakalibonya kwiinda muzinyonyoono zipati izigambya. Pele nokuba kuti tamuyeeyi kucita zinyonyoono zili boobo, kuli nomwakalezya zyeelelo zya Leza kwaziindi zinji alimwi amunzila zinjaanji nomwakabisya. Embo na?

5. Nkaambo nzi ncotweelede kumulumba Leza?

⁵ Aboobo ibukkale bwanu bulakonzya kweelana abupanduluzi bwamwaapostolo Paulo bwakuti: “Inywe mwakali bafu muzibi zyanu amukutapalulwa kwamibili yanu, nekubaboobo wakamubusya [Leza] antoomwe a-Kristo. Wakatulekelela indubizyo zyesu zyoonse.” (Ba-Kolose 2:13; Ba-Efeso 2:1-3) Amukabikkile maanu kaambo kakuti “wakatulekelela indubizyo zyesu zyoonse.” Eco cijatikizya zintu zinji kapati. Umwi aumwi wandiswe ulijisi kaambo ncayelede kukombelezya mbubwenya bwakacita Davida naakati: “Nkaambo kazina lyako, O Jehova, undilekelele milandu yangu, nkaambo mipati.”—Intembauzyo 25:11.

6. Ncinzi ncotunga twasyoma kujatikizya Jehova amakani aakujatila?

⁶ Mbuti nywebo naa uumbi akati kesu mbwanga wajatilwa? Ikaambo kapati nkakuti Jehova Leza ulilibambilide kujatila lyoonse. Nceciimo cakwe buya. (Kulonga 34:6, 7; Intembauzyo 86:5) Aboobo Leza ulangila kuti tumusikile kwiinda mumupailo akulomba kweengelelwa, ikumulomba kuti atulekelele. (2 Makani 6:21; Intembauzyo 103:3, 10, 14) Alimwi wacita bubambe bwakuti kujatila kuli boobo kukonzyeke—cituuzyo ca Jesu cacinunuzyo.—Ba-Roma 3:24; 1 Petro 1:18, 19; 1 Johane 4:9, 14.

7. Muunzila nzi momulombozya kwiiya Jehova?

⁷ Ikulisungula kujatila Leza nkwalisungwide kweelede kumupa cikonzyanyo kujatikizya mbomweelede kulanganya bantu bambi. Eci ncaakabikkila maanu Paulo, naakalemba kuti: “Amuusilane buuya, mukabe batete moyo, akuba aluzyalo lwakulekelelana milandu, mbubonya mbuli Leza mbwaakalekelela ndinywe muli-Kristo.” (Ba-Efeso 4:32) Kunyina kudooneka pe kuti ikaambo ka Paulo kajatikizya mbotweelede kwiiya cikozyanyo ca Leza, nkaambo kapango katobela kazumanana kuti: ‘Aboobo amube basikwiiya ba-Leza mbuli bana bayandwi.’ (Ba-Efeso 5:1) Sena mwakubona kuswaangana kuliwaawa? Jehova Leza wakamujatila, aboobo Paulo cakusinizya waamba kuti mweelede kumwiiya “mukabe batete moyo, akuba aluzyalo lwakulekelelana milandu.” Pele amulibuzye kuti, ‘Sena ndilacicita eco? Ikuti naa eco tacili ncecilengwa cangu, sena ndilasolekesya kucita obo, ikulitakata ncobeni kwiiya Leza mukuba sikujatila?’

Tweelede Kusolekesya Kuba Bantu Bajatila

8. Ncinzi ncotweelede kuzyiba kujatikizya bantu ibabamba mbungano yesu?

⁸ Inga ceelela ikuyeeya kuti mumbungano ya Bunakristo, kuli ziindi zimwi izisyoonto notweelede kubaa cilengwa cabunaleza cakujatilana. Pele icicitika cini ncimbi. Ee, ibakwesu abacizi Banakristo balasoleka kutobela cilengwa ca Jesu caluyando. (Johane 13:35; 15:12, 13; Ba-Galatiya 6:2) Babeleka kwaciindi cilamfwu alimwi bacibeleka awono kuti basowe mizeezo mibyaabi, iŋambawido amicito iidumide munyika ino mbyaabi. Baliyandide kapati kutondezya buntu bupya. (Ba-Kolose 3:9, 10) Pele tatukonzyi kukasowela buyo ambali ikaambo kaluzi kakuti imbungano yanyika yoonse alimwi ambungano imwi aimwi inyenzi, zibambidwe aabantu batalondokede. Pele lino mbantu bali kabotu kwiinda mbobakabede musule nokuba kuti bacili bantu batalondokede.

9, 10. Nkaambo nzi ncotuteelede kugambwa ikuti kwaba mapenzi akati kabakwesu?

⁹ Mu Bbaibbele Leza utwaambila kuti tulakonzya kulangila kutalondoka mumbungano akati kabakwesu abacizi. Mucikozyanyo, amulange majwi aa Paulo aalembedwe ku Ba-Kolose 3:13 aakuti: “Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami [Jehova] mbwaakamulekelela milandu yanu, anywebo amucite mbubonya obo.”

¹⁰ Pele Ibbaibbele awa cakusinizya lilatuyeezya mbokuswaangene ikulekelela Leza nkwatulekelela amukuli ngotujisi wakujatila bamwi. Nkaambo nzi eci ncocili ciyumu? Nkaambo Paulo wakazumina kuti umwi inga kanoojisi “kaambo kumweenzinyina.” Wakalizyi kuti itwaambo tuli boobo twakali kuzyooba. Kulangilwa kuti twakaliko mumwaanda wamyaka wakusaanguna naaba akati ka Banakristo “basalali,” ibakajisi ‘bulangizi mbobakayobwedwe kujulu.’ (Ba-Kolose 1:2, 5) Aboobo, sena inga tweezeezya kuti zintu inga kazili bumbi sunu lyalo ibunji bwa Banakristo bakasimpe nobatajisi bumboni bwamuuya bwakuti “[m]basale ba-Leza, basalala akuyandika”? (Ba-Kolose 3:12) Aboobo tatweelede kuyeeya kuti kuli cintu cilubide kapati ikuti naa mumbungano yesu kakuli twaambo tumwi twakutongooka—ikucimwa akaambo kazintu zibyaabi zyakacitika ncobeni naa iziyeeyelwa buyo.

11. Ncinzi ncaakatucenjezya sikwiiya Jakobo?

¹¹ Imajwi aa Jakobo, imwanookwabo Jesu aalo atondezya kuti tweelede kulangila kuti zimwi ziindi tuyooba muciimo notuyandika kujatila bakwesu. “Nguni muntu musongo akati kanu? Nguni uuli amaanu? Atondezye mbwiibede milimo yakwe kukweenda kabotu, alimwi abe amoyo mubombe wabusongo. Pele kuti mwanoojisi ibbivwe alukazyanyo mumyoyo yanu, mutalilumbaizyi ankuko nekuba kubejezya lusinizyo.” (Jakobo 3:13, 14) Sena inga kwalangilwa “ibbivwe alukazyanyo” mumyoyo ya Banakristo bakasimpe? Inzya, imajwi aa Jakobo cakusalazya atondezya kuti ezyo zyakalibonya mumbungano yamumwaanda wamyaka wakusaanguna akuti cakali kuzyooba mbubonya asunu.

12. Ndipenzi nzi lyakabuka mumbungano yansiku yaku Filipi?

¹² Icikozyanyo cakacitika ncobeni cijatikizya Banakristo bananike ibakalaampuwo mbotu yakubelekelaamwi a Paulo. Ambweni mulayeeya nomwakabalide makani aa Euodiya a Suntuke ibamumbungano yaku Filipi. Nokuba kuti ikaambo keni-keni takaambidwe, ibbuku lya Ba-Filipi 4:2, 3 litondezya kuti kwakali penzi limwi akati kabo. Sena lyakatalika akaambo kamwi kakaambwa calunya naa ikubisizigwa amusazinyina naa munyono? Kufwumbwa naa lyakali penzi nzi, lyakakomena kapati cakuti Paulo wakaliteelela kali kule ku Roma. Kulangilwa kuti bacizi bakumuuya aba bobile bakaleka kwaambauzyanya, icakapa kuti batalike kutantamukana ciindi camiswaangano naa ikuvwiyana kabali abalongwe babo bambi.

13. Ncinzi cilangilwa kuti ncicakagwasya mumakani aa Euodiya a Suntuke, alimwi nciiyo nzi ncocipa kulindiswe?

¹³ Sena eco ncintu cinyenzi mbuli cakacitika akati kabamwi mumbungano yanu naa cintu cimwi momwakajatikizidwe lwenu? Ipenzi lili boobo lilakonzya kaliliko munzila imwi noliba sunu. Ncinzi ncotunga twacita? Mukaambo ako kansiku, Paulo wakalailila bacizi abo bobile ibalyaabide “kuti babe aluyanzano lomwe mu-Mwami.” Ambweni bakazuminana kuti baabandike makani ayo, ikubamba twaambo, ikutondezya kulisungula kujatilana mpoonya akwiiya ciimo ca Jehova cakujatila. Kwiina kudooneka kuti Euodiya a Suntuke bakazwidilila, elyo aswebo tulakonzya kuzwidilila. Iciimo cakujatila cili boobo cilakonzya kubelesyegwa asunu cakuzwidilila.

Amube Basiluumuno—Amujatile

14. Nkaambo nzi kanjikanji ncocikonzyeka alimwi ncocili cintu cibotu ikwiile kwaaluba buyo makani aakulubizyanya?

¹⁴ Ncinzi cini cijatikizidwe mukujatila bamwi nomujisi penzi a Munakristo uumbi? Bwini mbwakuti, kwiina nzila nguba-uba pe, pele Ibbaibbele lijisi zikozyanyo zigwasya amalailile mabotu. Icintu ciinda kugwasya—nokuba kuti tacili cuuba-uba kucita—nkwiile kwaaluba buyo makani, kutaabikkila maanu. Kanjikanji nokubuka penzi mbubwenya mbuli lyakali akati ka Euodiya a Suntuke, imuntu umwi aumwi inga ulimvwa kuti imweenzinyina nguulubizizye kapati. Aboobo mubukkale buli boobo, mulakonzya kuyeeya kuti Imunakristo uumbi ngomubi kapati naa ngowalubizya kwiinda. Nokuba boobo, sena inga mulaile kukaluba buyo kaambo ako kwiinda mukujatila? Amuyeeye kuti, ikuti naa Imunakristo uumbi nguulubizizye kapati, ndinywe nomweelede kubweza ntaamu yakumanizya makani ayo akumwaambila kuti mwamujatila alimwi akumana amana.

15, 16. (a) Ino Mika wakamupandulula buti Jehova? (b) Ino caamba nzi kuti Jehova ‘ulalekelela milandu yabantu?’

¹⁵ Tutamulubi pe Leza walo uuli ncikozyanyo cesu kumakani aakujatila. (Ba-Efeso 4:32–5:1) Kujatikizya cilengwa ca Leza cakwiiluba buyo milandu, imusinsimi Mika wakalemba kuti: “Nguni Leza uuli mbuli nduwe nojatila zibi akulekelela milandu yabantu bako basyeede? Takakatili lyoonse bukali bwakwe, nkaambo luzyalo ndolumutobela.”—Mika 7:18.

¹⁶ Nolipandulula kuti Jehova ‘ulalekelela milandu yabantu,’ Ibbaibbele talyaambi kuti takonzyi kuziyeeya zibi zyakacitika naa kuti ulaziluba zintu zimwi naa wayanda. Amuyeeye zyakacitikila ba Samsoni a Davida, ibantu bakabisya kapati. Leza wakaziyeeya zinyonyoono nzyobakacita kakwiindide ciindi cilamfwu; aswebo mane tulizizyi zinyonyoono zyabo zimwi nkaambo Jehova wakapa kuti zilembwe mu Bbaibbele. Nokuba boobo, Leza wesu sikujatila wakabafwida luzyalo abo bobile, wakatubikkila kuti babe zikozyanyo nzyotweelede kwiiya kumakani aalusyomo.—Ba-Hebrayo 11:32; 12:1.

17. (a) Ncinzi cinga catugwasya kwiiluba buyo milandu iicita bamwi? (b) Ikuti twasoleka kucita boobo, muunzila nzi motunooiya Jehova? (Amubone kagwalo kakunsi.)

¹⁷ Inzya, Jehova wakali kukonzya “kulekelela”a zibi mbubwenya Davida mbwaakazumanana kulomba. (2 Samuele 12:13; 24:10) Sena inga twamwiiya Leza mumakani aya, ikulisungula kukuluba buyo kulubizilwa kumwi amilandu njobacita babelesima mbwaanga mbantu batalondokede? Amweezeezye kuti muli mundeke iilundukide mumugwagwa wakulundukila kuti yuuluke kubbuwa lyandeke. Nomwalanga anze, munsi aamugwagwa moilundukila mwabona muntu ngomuzi calunyansyo kagusya mulaka anze kumuweela. Mwaziba kuti wacimwa alimwi ambweni uli mukumuyeeya. Naa ambweni inga katali mukumuyeeya naaceya. Pele indeke mboizingulukila mujulu kuti ibe mubusena moyeelede kuulukila, mwamwiindaa mutwe muntu oyo, walo ono uulibonya mbuli kantu kasyoonto buyo. Kwiinde woola lyomwe mwasakana makkilomita manji, elyo eco ncaali kucita icali kumucima casyaala kule kapati. Mbubwenya buyo, iziindi zinji cilakonzya kutugwasya kulekelela ikuti twasoleka kuba mbuli Jehova akwiiluba buyo milandu. (Tusimpi 19:11) Sena kulubizigwa takunoomanide na kwainda myaka iili kkumi kuzwa ono naa myaka iili myaanda yobile mu Cuulu camyaka? Ino kayi kutauluba buyo mulandu oyo?

18. Ikuti kwalibonya kuti tatukonzyi kuuluba buyo mulandu umwi, ndulayo nzi ndotweelede kubelesya?

¹⁸ Pele ambweni kuli nomwakakombede kujatikizya makani ayo akusoleka kujatila, pele mulimvwa kuti inga tamukonzyi kucita obo. Ncinzi ncomunga mwacita? Jesu wakakulwaizya kuunka kumuntu wakamulubizizya akusola kumanizya makani kamuli nyobile buyo kutegwa kube luumuno alimwi. “Kuti koli mukutuula cipo cako acipaililo, nkabela awo waibalukwa kuti munyoko ulijisi kaambo kulinduwe, usie cipo cako nkukonya oko kunembo lyacipaililo, uye, ukasaangune kuyanzana amunyoko, elyo musule uboole kuzootuula cipo cako.”—Matayo 5:23, 24.

19. Nciimo nzi ncotweelede kubaaco alimwi ncicili ncotweelede kweeleba notuyandaula luumuno kumukwesu?

¹⁹ Jesu tanaakaamba kuti mwiinke kumunyoko kuyoomuzula kuti mwakaliluzi akuti walo wakalubizya. Ee, ambweni wakalubizya ncobeni. Pele masimpe ngakuti kwakali kulubizya kumbazu zyoonse zyobile. Aboobo imbaakani tayeelede kuba yakuyanda kuzula mweenzinyoko kuti azumine alimwi mane alikombelezye buya. Ikuti naa mbomuyanda kuti mubandi ube obo, mulalangilwa kuyookakilwa. Alimwi imbaakani tayeelede kuba yakwiindulula makani oonse aajatikizya mulandu wini naa wakwiide kweezeezya. Imubandi uucitwa mumuuya waluyando lwa Bunakristo noutondezya kwiimpana kupati kujatikizya penzi lini, nyoonse nyobile mulakonzya kusola kulimanizya penzi elyo. Pele nokuba kuti imubandi tausololeli kukuteelelana kabotu, sena eco nceciyandika lyoonse? Sena inga taciindi kubota na ikuti nyoonse nyobile mwamvwana kuti cakusinizya muyanda kubelekela Leza wesu uujatila? Nomwasika waawo, inga cauba-uba kuli umwi aumwi ikwaamba camoyo woonse kuti, “Ndausa kuti mukutalondoka kwesu twakaimpana boobu mumakani aya. Ndalomba kuti twaalube buyo makani aya.”

20. Ncinzi ncotunga twaiya kucikozyanyo cabaapostolo?

²⁰ Amuyeeye kuti abalo baapostolo bakali kwiimpana mbuli ciindi bamwi nobakali kulombozya kulemekwa kwiinda beenzinyina. (Marko 10:35-39; Luka 9:46; 22:24-26) Eco cakaleta kwiimpana, ambweni bamwi bakacimwa kapati naa kulubizigwa kapati. Pele bakakonzya kukuluba buyo kwiimpana oko akuzumanana kubelekela antoomwe. Umwi wabo wakazyoolemba boobu kumbele: “Uuyandisya kubona buumi, akulijanina mazuba mabotu, alesye lulimi lwakwe kububi, amulomo wakwe utaambi calweeno. Aleye kububi, acite kabotu. Ayandaule luumuno akulutobela.”—1 Petro 3:10, 11.

21. Ndulayo nzi lugwasya kapati Jesu ndwaakapa kujatikizya kulekelela?

²¹ Twacibona kale cibeela comwe camakani aya musule: Leza wakatujatila zibi zinji nzyotwakacita musule, aboobo tweelede kumwiiya kwiinda mukujatila bakwesu. (Intembauzyo 103:12; Isaya 43:25) Pele kuli cibeela cimbi kumakani aya. Naakamanizya kwaamba mupailo wacikozyanyo, Jesu wakati: “Nkaambo mwalekelela bantu milandu yabo, alakwe Usowanu uuli kujulu ulamulekelela anywe.” Kakwiindide mwaka, wakaindulula mbokuyandika kucita boobo, wakayiisya basikwiiya bakwe kupaila kuti: “Utujatile milandu yesu, nkaambo aswebo tulabajatila abali emilandu