Sena Tatunazimvwide Zintu Eezyo?
1 Inzya twakazimvwa kale! Jehova ulainduluka zintu zinji mu Jwi lyakwe kutegwa bantu bakwe bagwasigwe. Bunji bwaziindi Jesu wakaziinduluka njiisyo zyakwe kujatikizya mbazu ziindene-indene zya Bwami. Ibaapostolo bakwe bakazumanana kuzilanga-langa zintu zyakumuuya antoomwe abaabo bakakkalikide mulusinizyo.—Rom. 15:15; 2 Pet. 1:12, 13; 3:1, 2.
2 Muciindi ncotupona imbunga ya Jehova yabikka bubambe bwakulanga-langa makani aayandika kapati ciindi aciindi kumiswaangano yambungano. Mabbuku amwi ayiigwa ziindi zinji. Inzya, ncibotu kumvwa zintu nzyotwakamvwide kale!
3 Ikwiinduluka Kuzuzikizya Cintu Ciyandika Kapati: Ziibalusyo zya Jehova zilatugwasya kumvwisya twaambo, akuvwuzya luzibo lwesu alimwi zilatuyumya kuti tuzumanane munzila yakumuuya. (Int. 119:129) Kulanga-langa zyeelelo anjiisyo zya Jehova cili mbuli muntu uulilanga mucimbonimboni. Cilatugwasya kulilingula tobeni alimwi akutaba aciyanza cakuba “sikuswiilila amatwi buyo uuluba.”—Jak. 1: 22-25.
4 Ikuti katutaliyeezyi tobeni kujatikizya kasimpe, tuyoojana kuti myoyo yesu iyooyungwa azintu zimwi. Ziibalusyo zya Jehova zilatuyumya kulwana muuya wanyika ya Saatani uusofwaazya. (Int. 119:2, 3, 99, 133; Flp. 3:1) Iziibalusyo nzyotutambula lyoonse izijatikizya kuzuzikizigwa kwamakanze aa Jehova zilatugwasya kuba bantu ‘balangila’ lyoonse. (Mk. 13:32-37) Ikwiinduluka kumvwa kasimpe kamu Magwalo kutugwasya kuzumanana kweenda munzila iisololela kubuumi butamani.—Int. 119:144.
5 Mbotunga Twagwasigwa Swebo Ilwesu: Tweelede ‘kuboozya myoyo yesu kumilumbe ya Leza.’ (Int. 119:36) Ciindi nokuyoobandikwa makani azizilwe kumuswaangano wambungano, atukalibambilile limwi akulanga-langa magwalo aambwa buyo alimwi akubona mbotunga twaabelesya makani aayo. Tweelede kunoolibambila kulemba kwakwiindulula kwamu Cikolo Camulimo Wateokrasi, tutayeeyi kuti takuyandiki. (Lk. 8:18) Tutabi bantu batabikkili maanu kuzintu zyaambwa akaambo kakuti bunji bwaziindi kumiswaangano yesu kwiindulukwa njiisyo zyantalisyo nzyotwakamvwa kale.—Heb. 5:11.
6 Atube mbuli sintembauzyo wakati: “Ndabotelwa inzila yamilumbe yako, mbuli uuvubide lubono lunji.” (Int. 119:14) Masimpe, twakazimvwa kale zintu ezi izyampindu kapati alimwi tulangila kuzimvwa. Nkaambo nzi? Akaambo kakuti Jehova ulizi kuti tuyandika kuti katuzimvwa!