Amube Cikozyanyo Cibotu Mukoonda Milimo Mibotu
1. Nkaambo nzi ncotweelede kubikkila maano ikapati kukulilemeka kwesu amuswaangano wacooko?
1 Eelyo Bakamboni ba Jehova banji nobaswaangana kumiswaangano yacooko, mbotucita zintu alimwi ambotubalanganya bantu kulabonwa ikapati abalangilila. Aboobo umwi aumwi wandiswe, weelede kubikkila maano kapati kululayo lwa Bbaibbele ilwaamba kuti: ‘Sitikila muziyanza zyoonse. Webo omwini weelede kuba citondezyo mukoonda milimo mibotu.’ (Tit. 2:6, 7) Ikusolekesya kulayandika kutegwa ‘tutayeeyi buyo kuligwasya tobeni luzutu pe, pele umwi aumwi weelede kugwasya mweenzinyina.’ (Flp. 2:4) Aboobo atulange-lange mbazu zimwi mbotukonzya kubelesya makani aaya aakukulwaizyanya ku Muswaangano Wacooko uuboola wa, “Amumulemeke Leza.”
2. Ino ncinzi ncotweelede kubikkila maano kujatikizya makwebo kubusena bucitilwa muswaangano wacooko?
2 Milimo Yamakwebo: Ibamwi balizyi kuti basimuswaangano banji tabajisi makkamela, aboobo balacita makwebo kwiinda mukufwotola kumuswaangano wacooko alimwi amumiswaangano iimbi yabantu ba Jehova. Kunyina cintu cilubide mukubweza cifwoto kumiswaangano eeyi iilibedelede. Nokuba boobo, ibunji bwabo aabo bafwotola bayanda kujana mpindu, aboobo aaya makwebo. Ikutegwa eeci citakanyonganyi kuyanzana kubotu kwa Bunakristo kwakumuya, tutakiikkomanini milimo yabo. Mbubonya buyo amilimo imwi yamakwebo. Ikaambo ncotuswaanganina nkukomba Jehova, ikulya kutebule lyakwe lyakumuuya alimwi akuyumizyanya-yumizyanya.—Rom. 1:11, 12.
3, 4. Ino mbuti mbotukonzya ‘kucitila bantu boonse milimo mibotu’ abusena bucitilwa muswaangano wacooko?
3 Ikubabikkila maano bantu kweelede kubonwa kwiinda mukusalazya busena bwamuswaangano. Mwaka wakamana, cakali kukkomanisya kubona mikwasyi kiizumanana kutobela bubambe bwabulondo. Bana alimwi abapati bakacita mulimo wabo kwiinda mukubwezelela matombe, mapepa, mapulasitiki alimwi azyakulya zyalekwa akuzisowela muzingungulu alimwi amuzilindi. Camasimpe, bantu bakunyika tababikkili maano kumakani aabulondo, pele kubikkila maano kwesu kubotezya busena mpotukombela, kupa bulemu kukuswaangana kwesu alimwi kutondezya kuti tuli mukuswenena kuli Leza uusalala Jehova.—Lev. 19:2; 2 Kor. 7:1.
4 Sena mwakazibona kale zimbuzi zyakubuleya mbozyitali zyabulondo alimwi ambozitakonzyi kubelesyegwa akaambo kabuyamba akutabelesyegwa kabotu? Ikusiya cimbuzi kacisalala twamana kucibelesya citondezya kuti ‘tuli mukucitila bantu boonse milimo mibotu.’ (Gal. 6:10) Imulawo wa Leza uujatikizya mbuli tubi mbotwakali kusoogwa wakaambwa cakusalazya alimwi wakali muuba kutobela. Izintu zyakali kuyandika mbusena busisikide, umwi aumwi kububamba kabusalala akusowa tubi munzila yeelede. (Dt. 23:12, 13) Imulawo ooyu wansiku wazumanana kugwasya sunu alimwi banji tabaciswi-ciswi akaambo kakutobela njiisyo zyawo. Ikusyomeka kuzyeelelo zya Jehova lyoonse kuletela zyilongezyo alimwi kulatwaandanya abantu bakunyika.—Dt. 28:9, 10.
5, 6. Ino mbuti ibana mbobanga bamutembaula Jehova, alimwi ino mukuli nzi ngobajisi bazyali?
5 Bazyali Alimwi Abana: Munyika eeyi muli bakubusi banji batajisi mulemyo, ibana besu baliindene ambabo alimwi eeci citembaula Jehova ambunga yakwe. Nokuba boobo, muziindi zimwi mapenzi alacitika eelyo bana nobatalaigwi kabotu. (Tus. 29:15) Bazyali tabeelede kulekela bana kuti kabaile kweendeenda kakunyina uubalanganya abusena bwamuswaangano wacooko.
6 Muswaangano kautaningasika, bazyali bamwi cabagwasya kwiinduluka abana kujatikizya mbuli mbobeelede kulilemeka. (Ef. 6:4) Balabagwasya bana ikuzyiba luyando lwini-lwini ‘lutalilangilili cintu’ naa ‘lutalisumpuli.’ (1 Kor. 13:5) Imuswaangano wacooko nciindi cibikkidwe cakuti tuyiisyigwe a Jehova, ibana abapati beelede kutondezya bulemu kububambe oobu mukulilemeka kwabo amuswaangano alimwi akooko nkobakonzya kuba.—Is. 54:13.
7. Ino kulilemeka kwesu kubotu kubajatikizya buti bamwi?
7 Ikulilemeka kwesu kulakonzya kupa kuti bantu baleke kutuyeeyela munzila mbyaabi alimwi akubakweelelezya kubukombi bwakasimpe. (Mt. 5:16; 1 Pet. 2:12) Boonse aabo mbotuyaanya kumuswaangano wacooko abakambaukilwe kwiinda mumilimo yesu alimwi ambotulanganya bamwi. Munzila eeyi tuyooba ‘zitondezyo mukoonda milimo mibotu’ akulemeka Jehova.—Tit. 2:7.
[Kabbokesi kali apeeji 4]
Amubikkile Maano Kubantu Bamwi
▪ Mutaciti makwebo pe
▪ Busena bucitilwa muswaangano azimbuzi lyoonse zyeelede kusalala
▪ Amubalaye bana banu