Kulanganya Mbono zya Mwami
1 Lyansiku, mubanzi wakalijisi mulimo mupati. Abrahamu wakapede mubanzi wakwe mulimo wakujanina mwanaakwe Izaka mukaintu. (Matl. 24:1-4) Mubwini, mubanzi ooyu wakalijisi mukuli wakubona kuti luzubo lwa Abrahamu lwazumanana kubako. Ooyo wakali mukuli mupati! Anu nkakaambo kako mwaapostolo Paulo ncakaambila kuti: “Lino kumakani aababanzi, cintu ciyandwa nceeci, kuti muntu asyomeke.”—1 Kor. 4:2.
2 Bubanzi bwa Bunakristo: Mu Bbaibbele, mbazu zimwi zya mulimo wa Bunakristo zyaambwa kuti mbubanzi. Mucikozyanyo, mwaapostolo Paulo wakaambila bana Efeso kujatikizya “makani aabubanzi bwaluzyalo lwa-Leza mbundakapegwa nkaambo kanu.” (Ef. 3:2; Kol. 1:25) Mulimo wakwe wakutola makani mabotu kubamasi wakaubona kuba wabubanzi walo ngwakeelede kubeleka cakusyomeka. (Inc. 9:15; 22:21) Mwaapostolo Petro wakalembela babunyina bananike kuti: “Amukasamausyanye, mutatongaukani. Kufumbwa zipego zya-Muuya nzimutambwide, amugwasyanye anzizyo, nkaambo mbubonya obu mbubeelede abo baabilwa luzyalo lwa-Leza lubeleka muziyanza ziyanza.” (1 Pet. 4:9, 10; Heb. 13:16) Kufumbwa cintu cakumubili ncobakajisi Banakristo bamumwaanda wamyaka wakusaanguna bakacijana kwiinda muluzyalo lwa Jehova. Aboobo, bakali babanzi bazintu nzyobakajisi eelyo bakeelede kuzibelesya munzila ya Bunakristo.
3 Mazubaano, Bakamboni ba Jehova mbobazibona zintu oobu. Balilyaabide kuli Jehova Leza eelyo babona kuti zyoonse nzyobajisi mbuli buumi bwabo, nguzu azintu zyakumubili zyakaboola kwiinda mu “luzyalo lwa-Leza lubeleka muziyanza ziyanza.” Mbuli babanzi babotu, balizyi kuti bayoolyaambilila kuli Jehova Leza kujatikizya mbobazibelesya zintu eezyi. Kuyungizya waawo, bapegwa luzyibo lwa makani mabotu. Acalo eeci ncipego cipati ncobalombozya kubelesya munzila iinda kubota: yakulemeka zina lya Jehova alimwi akugwasya bamwi kuzyiba kasimpe.—Mt. 28:19, 20; 1 Tim. 2:3, 4; 2 Tim. 1:13, 14.
4 Ino Bakamboni ba Jehova bali mukwiibeleka buti milimo yabo mbobali babanzi? Lipooti yaamwaka itondezya kuti mwaka wamana, nyika yoonse mbwiizulwa bakatola mawoola ainda kucuulu catuulunzuma ikukambauka “Makani Mabotu aa Bwami” alimwi akweendelezya ziiyo zya Bbaibbele zyaaŋanda ziinda ku 6,000,000 abantu bajisi luyandisyo. (Mt. 24:14) Alimwi kusyomeka kwabo mbobali babanzi ba Jehova kwakatondezyegwa kwiinda mukulisungula kwabo kusanga kumulimo wanyika yoonse alimwi akugwasyilizya kuyakwa kwa Maanda aa Bwami, kwiinda mukusamausya balangizi beendeenda abamwi alimwi aluzyalo ndobakatondezya kubapengede mbuli baabo bajatikizyigwa ankondo. Caantoomwe, Banakristo bakasimpe bali mukuzilanganya kabotu mbono zya Mwami.
5 “Mubanzi Uuzi Uusyomekede”: Bubanzi tabuli buyo kumuntu omwe kumugama pele alimwi nkobuli kumbunga yoonse. Jesu wakaamba mbungano ya Banakristo bananike anyika kuti “mubanzi uuzi uusyomekede.” (Lk. 12:42) Mulimo wa ‘mubanzi uusyomekede’ ngwakupa “zilyo” alimwi akusololela mukukambauka makani mabotu nyika yoonse mbwiizulwa. (Ciy. 12:17) Mumakani aaya, ciinga ca mubanzi uusyomekede ciimininwa a Kabunga Keendelezya, cilijisi mukuli uupedwe a Leza wakulanganya kabotu “matalenta” ngocipedwe aakumubili alimwi aakumuuya. (Mt. 25:15) Kweendelana acikozyanyo ‘camubanzi uusyomekede,’ ikabunga kamutabi kamwi akamwi kalasoleka kapati kubelesya mali oonse aasangwa munzila iili kabotu, yakutola ambele zintu zya Bwami. Zyoonse zyakusanga zilacitwa kazili cipego ciyandika kapati, aboobo “mubanzi uuzi uusyomekede” ulijisi mukuli wakubona kuti zilabelesyegwa kumulimo weelede alimwi akuti zilabelesyegwa kabotu, kutali cabuyamba alimwi kumulimo uugwasya.
6 Cikozyanyo cakwaabelesya kabotu mali aasangwa nceeco cijatikizya kuyaambele kwamulimo wakusimba wa Bakamboni ba Jehova. Ikumwaya ma Bbaibbele alimwi amabbuku aamba zya Bbaibbele mbuli mamagazini, mabbuku, mabroshuwa, tubbuku, matulakiti alimwi a Makani aa Bwami kwagwasyilizya kapati mukumwaya “Makani Mabotu” mazubaano “aakumamanino.” (Mk. 13:10; 2 Tim. 3:1) Alimwi imagazini ya Ngazi Yamulindizi yaba nenzila mpati yakwaabila “zilyo kuciindi ceelede” ku “baciinga ca Leza” antoomwe abalongwe babo ba “nkamu impati” ya “mbelele zimwi.”—Mt. 24:45; Ef. 2:19; Ciy. 7:9; Joh. 10:16.
7 Kumatalikilo, mabbuku oonse a Bakamboni ba Jehova akali kusimbwa abantu basimakwebo. Pele mumyaka yamuma 1920, cakazyi kubonwa kuti inga cainda kubota alimwi akugwasya kumuuya ikuti babelesi ba Jehova beni kabacita mbabo mulimo wakusimba. Kutalikila mu 1920, mulimo wakusimba wakatalika kuyaambele asyoonto-syoonto ku Brooklyn mu New York kusikila leelyo nowakakomena kapati.
8 Kuzwa noyakamana Nkondo Yanyika Yabili, mulimo wakusimba wakatalisyigwa naa wakaliko kale mumasi manji amwi mbuli ku Canada, Denmark, England, Greece, South Africa, Switzerland, alimwi a West Germany. Kuzyi kusika kumatalikilo aamyaka yamuma 1970, mulimo ooyu wakatalisyigwa mumasi aya: Ku Australia, Brazil, Finland, Ghana, Japan, Nigeria, alimwi a Philippines ayalo yakabikkilizyigwa. Amwi masi akati kayaaya akali kupanga amabbuku ajisi zivwumbyo ziyumu.
9 Muma 1970 alimwi akumatalikilo aamyaka yamuma 1980, kwakaba kuyaambele kujatikizya luzyibo lwakusimba, eelyo Bakamboni ba Jehova bakatalika kubelesya nzila mpya zyakusimba. Kusaanguna, bakali kubelesya nzila yakaindi yakusimba. Mukuya kwaciindi nzila eeyi yakazyi kucinca nobakatalika kubelesya nzila mpya. Akaambo kaceeci, kuli mabbuku mabotu ali mukupangwa ajisi zifwanikiso zyeebeka kutali zyeziya zyakali kukonzya kuzekaulwa kaindi zyakajisi mibala yobile (uusiya aumbi). Kuyungizya waawo, luzyibo lujatikizya mboibeleka kkompyuta lwakapa kuti mulimo woonse kaucitwa kabotu kautana tolwa kukusimbwa. Bakamboni ba Jehova bakatalisya pulogilamu yaakkompyuta itegwa Multilanguage Electronic Phototypesetting System (MEPS), yalo kwaciindi cino iili mukubelesyegwa kusimba mumyaambo iinda ku 370. Kunyina pulogilamu imwi yabasimakwebo yeelene ayeeyi ya MEPS iibelesyegwa mumyaambo minji kapati.
10 Masimpe pulogilamu yaakkompyuta ya MEPS alimwi ayakutambikizyanya makani akkompyuta yapa kuti cikonzyeke kupa cakulya kuciindi ceelede. Kumatalikilo, kwiinda mukubelesya nzila yakaindi, imakani aakali mumagazini ya Cingisi akali kujanika mumagazini amumyaambo imbi kakwiindide myezi naa mwaka buya. Mazubaano, Ngazi Yamulindizi izwida aantoomwe mumyaambo iili 150 eelyo Galamukani! mumyaambo iili 85. Ncobeni eeci ncileleko. Masimpe kubelesya mali mukutalisya nzila eeyi mpya yakali nzila mbotu yakubelesya mbono zya Mwami.
11 Nokuba kuti nzila eezyi zipya zyakusimba zilafwaambya mulimo, zilainda kudula. Aboobo, kwakazyikubonwa kuti kwakali kusoweka mali manji ikuti mulimo wakusimba mamagazini kaucitwa mumasi aali 51. Akaambo kaceeci, mumyaka yamuma 1990, ‘mubanzi uusyomekede’ wakabweza ntaamu iimbi kumakani aaya. Nintaamu nzi njaakabweza?
12 Ikuvwuntauzya kwakatondezya kuti ‘mbono’ zyakali kusangwa a Bakamboni ba Jehova abalongwe babo zyakali kukonzya kubelesyegwa kabotu ikuti mulimo wakusimba wacitilwa mubusena bomwe. Aboobo, mukuya kwaciindi mweelwe wamitabi yakali kusimba wakacesyegwa. Imutabi wa Germany lino nguusimba mamagazini amabbuku aamasi manji aali Kujwe a Kumbo amu Europe kubikilizya amasi amwi aakali kusimba kaindi. Mutabi waku Italy ulasimba mamagazini amabbuku aazyooko zimwi zya Afulika alimwi a Europe nkoili kumusanza lwaajwe, kubikilizya a Greece a Albania. Mu Afulika mamagazini asimbwa buyo ku Nigeria aku South Africa. Bubambe buli boobu nkobuli nyika yoonse mbwiizulwa.
13 Kulanganya Mbono: Mu Ŋanda ya Bwami ya Bakamboni ba Jehova imwi aimwi nyika yoonse mbwiizulwa kuli kabbokesi kakusangila kalembedwe kuti “Zyakusanga zya Mulimo Wanyika Yoonse—Matayo 24:14.” Zyakusanga zitali zyakulombelela zibikkwa mutubbokesi ootu zilabelesyegwa kufwumbwa kuyandika lugwasyo. ‘Mubanzi uusyomekede’ alimwi atubunga twamutabi umwi aumwi ntotusala mbozyeelede kubelesyegwa zyakusanga eezyi. Aboobo, nouzumizya mulawo, mali aabikkwa mukabbokesi kakusangila mucisi cimwi inga agwasyilizya milimo ya Bakamboni ba Jehova bamucisi cimwi cakule. Zyakusanga zyabelesyegwa mumasi amwi kupa lugwasyo kubasyomima bacitikilwa ntenda kwiinda mumvwula yaguwo, kuzungaana kwanyika alimwi ankondo zyamucisi. Zyakusanga zyoonse zili boobu zilabelesyegwa kugwasyilizya bamisyinali mumasi ainda ku 235.
14 Mbuli cilengwa, mumbungano zya Bakamboni ba Jehova, makani ajatikizya mali aambwa buyo ciindi comwe amwezi alimwi kwamaminiti masyoonto. Kunyina mbale ziinzyigwa mu Maanda aa Bwami naa amiswaangano mipati. Kunyina magwalo aakulombelela mali apegwa kubantu. Kunyina bantu bapegwa mulimo wakulombelela mali. Kanji-kanji, Ngazi Yamulindizi iba buyo acibalo comwe amwaka cipandulula mbobakonzya kucita aabo bayanda kusanga ku Watch Tower Bible and Tract Society kutegwa bagwasyilizye mulimo wanyika yoonse. Talili lyoonse nokwaambwa zya mali aa Society mu Galamukani! Ikuti kacili boobo, ino cakonzyeka buti kugwasyilizya mulimo mupati wakukambauka makani mabotu nyika yoonse, kuyaka Maanda aa Bwami aayandika, kulanganya baabo bali mumulimo waciindi coonse alimwi akugwasya Banakristo? Jehova wabalongezya bantu bakwe munzila mbotu amuuya wabwaabi. (2 Kor. 8:2) Twamulumba moonse nomwakatola lubazu ‘mukulemeka Jehova ambono zyanu.’ Amusyome kuti ‘mubanzi uusyomekede’ uyoozumanana kulanganya mbono zya Mwami. Ncotulomba ncakuti Jehova azumanane kulongezya bubambe boonse bubikkilwa kutola ambele mulimo wanyika yoonse.