Mulimo Ngotweelede Kubelekela Bamwi

¹ Mwaapostolo Paulo wakalizyi kuti wakalijisi mulimo wakukambaukila bantu. Wakalizyi kuti Jehova nguwakapa kuti cikonzyeke kubantu boonse ikufwutuka kwiinda mubulowa buyandisi bwa Mwanaakwe. (1 Tim. 2:3-6) Aboobo, Paulo wakaamba kuti: “Ndijisi mulimo wakukambaukila bantu boonse, baiide mbuli Bagiliki nibaba bataiide, nibaba basongo, nibaba bafuba-fuba.” Cabusungu wakababelekela bantunyina kwiinda mukubaambila makani mabotu.—Balo. 1:14, 15, Ci.

² Mbubwenya mbuli Paulo, imazubaano Banakristo balasoleka kwaambila basimukobonyina makani mabotu kufwumbwa ciindi. Mbwaanga “mapenzi mapati” ali afwaafwi, mulimo wesu wakuyandaula bantu beelela ulayandika kapati. Iluyando lwini-lwini ndotujisi kubantu alutukulwaizye kusungwaala mumulimo ooyo wakufwutula bantu.—Mt. 24:21; Ezk. 33:8.

³ Kuzuzikizya Mulimo Wesu: Inzila iiyandika kapati mbotusikila bantu nkwiinda mukukambauka kuŋanda aŋanda. Mucilawo oomo bantu banji mobatajaniki aŋanda, cilakonzya kugwasya kuti tusikile bantu banji ikuti twalemba twaambo tuzwide kujatikizya ŋanda eeyo akupilukila aciindi cimbi. (1 Kor. 10:33) Alimwi tulakonzya kusikila bantu kwiinda mukukambaukila mumasena aamakwebo, mumigwagwa, mumasena aakulyookezya, musiigwa myootokala alimwi aaluwaile. Tulakonzya kulibuzya kuti, ‘Sena ndilasoleka kubelesya mbazu zyoonse zyabukambausi kutegwa ndaambile bamwi mulumbe uupa buumi?’—Mt. 10:11.

⁴ Mucizi umwi mupainiya wakalimvwa kuti wakalijisi mukuli wakusikila bantu boonse mucilawo mwaakali kubelekela. Aŋanda imwi lyoonse mpulungwido zyakali kujalwa alimwi kunyina wakali kujanika aŋanda. Pele, buzuba bumwi ciindi mupainiya ooyu naatakali mumulimo, wakabona mootokala kawimvwi kumbele aŋanda eeyi. Mbwaanga tanaakali kuyanda kuti aindwe coolwe eeci, wakalizya mulangu waamulyango. Imusankwa wakavwiila alimwi mubandi ngobakajisi wakusaanguna wakapa kuti mucizi ooyu amulumaakwe bapilukile ziindi zili mbozibede. Mukuya kwamazuba, musankwa ooyo wakazumina kwiiya Bbaibbele, eelyo sunu mmukwesu uubbapatizyidwe. Ulalumba kuti mucizi ooyu wakalizyi kuti wakali amulimo wakukambaukila bamwi.

⁵ Mbwaanga mamanino ali afwaafwi, ecino nceciindi cakuzuzikizya mulimo wesu kubantuma kwiinda mukuba basungu mumulimo wakukambauka.—2 Kor. 6:1, 2.

Cibeela 11: Kugwasya Basikumwaya Bapya Kupilukila

Ikweendelezya Ziiyo zya Bbaibbele Ziyaambele

¹ Ciindi sikwiiya Bbaibbele natalika kutola lubazu mumulimo wakukambauka, uyoojana bantu ibajisi luyandisyo mumakani mabotu. Mbuti mbotukonzya kugwasya sikumwaya mupya kuzwiidilila napilukila alimwi akuyungizya luyandisyo?

² Ikulibambila kupilukila kutalikila kukuswaya kwakusaanguna. Amumukulwaizye sikwiiya kuba aluyandisyo lwini-lwini kubantu mbabandika limwi. (Flp. 2:4) Amuyaambele kumuyiisya kuti kapa ciindi bali aŋanda cakwaamba mbobayeeya, kuswiilila nobaambaula alimwi akubikkila maano nzyobalibilika. Ciindi bamwi nobaboneka kuba aluyandisyo, amumwaambile sikumwaya mupya ikulemba twaambo toonse tuyandika itwabandikwa. Amubelesye twaambo ooto kutegwa mumugwasye kulibambila mibandi aimwi.

³ Kulibambila Kupilukila: Amwiinduluke mubandi wainda, eelyo amumutondezye sikwiiya mbokusalwa kaambo kamwi kamulumbe wa Bwami ikakonzya kumukkomanisya uuli aŋanda. (1 Kor. 9:19-23) Amulibambile antoomwe nzila mfwaafwi yakubelesya lugwalo lomwe lwamu Bbaibbele alimwi amuncali uuli mubbuku liyiigwa. Kunze lyaboobo, amulibambile mubuzyo ukonzya kubuzyigwa kumamanino amubandi kutegwa akabe ngamatalikilo aamubandi utobela. Amumutondezye sikumwaya mupya mbwakonzya kuyungizya luzyibo lwa Jwi lya Leza mumuntu ooyo mukuswaya kumwi akumwi.

⁴ Alimwi cilagwasya kuyiisya sikwiiya ntalisyo nguba-uba njakonzya kubelesya napilukila. Bamanizya kwaanzyanya auli aŋanda, inga waamba kuti: “Ndakakkomana kubandika andinywe nitwaamuswaide. Sunu ndaboola kuti tubandike kaambo akamwi kamu Bbaibbele kajatikizya [amukaambe kaambo aako].” Alimwi inga mwamwaambila sikwiiya mbwakonzya kucita ikuti wajana muntu umbi aŋanda.

⁵ Amusungwaale Kupilukila: Amumukulwaizye sikwiiya ikupa cikozyanyo cibotu mukufwambaana kupilukila kuli boonse ibatondezya luyandisyo. Kutegwa bantu bajanwe aŋanda inga kwayandika kuzumanana kupilukila. Amumuyiisye sikwiiya mbwakonzya kusyomezya bantu kuti uyoopilukila alimwi amumugwasye ikumvwisya mbociyandika ikuzuzikizya cipangano. (Mt. 5:37) Amumuyiisye sikwiiya kuba aluzyalo, kabikkila maano alimwi akutondezya bulemu ciindi nayandaula bantu bali mbuli mbelele alimwi akuyungizya luyandisyo lwabo.—Tit. 3:2.