Kukambauka Bwami—Mulimo Uutaliboteli

¹ Abuzuba, zyuulu-zyuulu zyatuulunzuma twabantu balagwasyigwa abwaabi bwa Jehova ibupa kuti bapone. (Mt. 5:45) Pele, mbasyoonto bantu ibajisi mulimo uutaliboteli wakutondezya kulumba ku Mulengi wabo kwiinda mukukambauka makani mabotu a Bwami bwa Leza. (Mt. 24:14) Sena mulaulemeka mulimo ooyu uutaliboteli?

² Kukambauka Bwami kupa kuti Leza alemekwe alimwi kulapa bulangizi aluumuno kubantu ibakatazyidwe amapenzi aamazubaano. (Heb. 13:15) Kuli baabo ibautambula mulumbe, ubapa kuba abulangizi bwa buumi butamani. (Joh. 17:3) Sena kuli mulimo umwi wakumubili ukonzya kuleta mpindu zili boobu? Mwaapostolo Paulo wakatondezya kuti wakali kuuyanda mulimo kweelana ambwakaubeleka. Wakaubona kuba cintu ciyandisi.—Inc. 20:20, 21, 24; 2 Kor. 4:1, 7.

³ Kuubikkila Maano Mulimo Uutaliboteli Ngotujisi: Nzila imwi mbotutondezya kuti tulauyandisya mulimo uutaliboteli wakukambauka nkwiinda mukubikkila maano mbotubeleka mulimo wesu. Sena tulaba aciindi cakulibambila nzila iikonzya kubanjila mumoyo ibatuswiilila? Sena kuli ncotukonzya kucita kutegwa tuyaambele muluzyibo lwesu lwa kubelesya Magwalo akusalazyanya twaambo abantu? Sena tulaakubasikila bantu boonse mucilawo cesu? Sena tulakonzya kutalisya alimwi akweendelezya ziiyo zya Bbaibbele? Mbuli Banakristo basyomeka bakaindi abasunu, tulakulwaizyigwa ikuubona munzila mbotu mulimo ooyu alimwi tulauyandisya mulimo wesu uutaliboteli.—Mt. 25:14-23.

⁴ Notuli mumapenzi akaambo kakucembala, kuciswa antela bukkale bumwi bukatazya, cilaumbulizya kuzyiba kuti kusoleka nkotucita ikutola lubazu cabusungu mumulimo kulayandika kapati. Ijwi lya Leza litusyomezya kuti Jehova ulakubikkila maano kapati ikusoleka kuli boobo mukumubelekela nokuba kuti bamwi tabakonzyi kukukkomanina.—Lk. 21:1-4.

⁵ Kukambauka Bwami kuletela lukkomano. Mucizyi umwi wamyaka yakuzyalwa iili 92 wakaamba kuti: “Masimpe cilandikkomanisya ndayeeya myaka iili 80 njindabeleka cakulyaaba kuli Leza! Nocali kukonzyeka kupona alimwi nindali kupona munzila njoonya eeyi nkaambo ncobeni ‘luzyalo lwa Leza ndubotu kwiinda buumi.’” (Int. 63:3) Andiswe atuuyandisye mulimo ooyu uutaliboteli uzwa kuli Leza—mulimo wakukambauka Bwami.

Cibeela 12—Ikweendelezya Ziiyo zya Bbaibbele Ziyaambele

Kugwasya Basikwiiya Kutalisya a Kweendelezya Ziiyo zya Bbaibbele

¹ Ciindi mbotuyiisya Bbaibbele nobatalika kutola lubazu mumulimo wamumuunda, ikuyeeya kutalisya alimwi akweendelezya ziiyo zya Bbaibbele kulakonzya kubayoosya. Mbuti mbotukonzya kubagwasya kuba basicamba kujatikizya cibeela eeci ciyandika camulimo wesu?—Mt. 24:14; 28:19, 20.

² Ciindi sikwiiya Bbaibbele nazumizyigwa kuba sikumwaya uutabbapatizyidwe, ulangilwa kuti wakalilembya kale mu Cikolo Camulimo Weendelezyegwa a Leza. Ilwiiyo ndwajana mukulibambila alimwi akukanana makani apegwa basicikolo luyoomugwasya kuyaambele muluzyibo lwakuyiisya oolo luyandika kuli “simulimo uutakwe cintu cimuusya insoni, uupandulula makani aalusinizyo mbukweelede.”—2 Tim. 2:15.

³ Amuyiisye Kwiinda Mukupa Cikozyanyo: Jesu wakaisya basiciiya bakwe kwiinda mukubapa malailile aalimvwisya alimwi akubapa cikozyanyo cibotu. Wakaamba kuti: “Azyulila umwi umwi ulaba mbuli mwiiyi wakwe.” (Lk. 6:40) Cilayandika kapati kuti mumwiiye Jesu kwiinda mukupa cikozyanyo cibotu mumulimo wanu. Ciindi sikwiiya nabona cikozyanyo canu mumulimo, uyoozyiba kuti ncotupilukilida nkutalisya ziiyo zya Bbaibbele.

⁴ Amumupandulude sikwiiya kuti ciindi notwaambila mwiniŋanda zyaciiyo, kanji-kanji takuyandiki kupandulula zyoonse zijatikizyidwe mububambe bwaciiyo. Bunji bwaziindi cilainda kugwasya kwiile kutondezya mbocicitwa ciiyo kwiinda mukubelesya muncali omwe naa yobile iili mubbuku liyiigwa. Nzila zigwasya mukucita boobu zilakonzya kujanwa mu Mulimo Wesu wa Bwami uno apeeji 8 alimwi awa January 2002 apeeji 6.

⁵ Ikuti kacikonzyeka, amumutambe sikwiiya kuti mubeleke limwi naa kusangana sikumwaya umwi uucibwene kuziiyo zimbi zya Bbaibbele. Ulakonzya kutola lubazu mukupandulula muncali umwi naa lugwalo lumwi luyandika kapati. Aboobo, kwiinda mukulangilila, sikwiiya ulakonzya kwiiya zinji kujatikizya mbokweendelezyegwa ziiyo zya Bbaibbele ziyaambele. (Tus. 27:17; 2 Tim. 2:2) Amumulumbaizye alimwi amubandike mbwakonzya kuyaambele.

⁶ Kuyiisya basikumwaya bapya kuti babe bayi ba Jwi lya Leza kuyoopa kuti bacikonzye kucita ‘mulimo mubotu’ wakutalisya akweendelezya ziiyo zyabo. (2 Tim. 3:17) Elo kaka cilakkomanisya kubeleka ambabo mukutamba ooku kwaluyando kwakuti, “muntu woonse uuyanda anywe cabuyo maanzi aabuumi”!—Ciy. 22:17.