Kutalisya Ziiyo zya Bbaibbele Amulyango Alimwi Akwiinda Mukubelesya Luwaile

1, 2. Mbuti mbotukonzya kweendelanya bubambe bwesu bwakwiiya Bbaibbele kutegwa tugwasye bantu bajisi bubi?

¹ Mazubaano bantu bajisi bubi. Nokuba boobo, ibanji balijisi luyandisyo muzintu zyakumuuya. Mbuti mbotukonzya kubagwasya kuti bajane zintu nzyobayandika kumuuya? (Mt. 5:3) Basikumwaya banji balakonzya kwiiya Bbaibbele abantu amulyango wabo naa kwiinda mukubelesya luwaile. Sena mulakonzya kuyungizya mulimo wanu munzila eeyi?

² Kutegwa tutalisye ziiyo zya Bbaibbele, tuyandika kulibambila kutondezya mbocicitwa ciiyo ca Bbaibbele kufwumbwa ciindi. Mbuti mbotukonzya kucita boobu alimwi nkuli nkotukonzya kucita obu?

3. Nkaambo nzi ncokuyandika kutondezya mbocicitwa ciiyo ca Bbaibbele mukuswaya kutaanzi, alimwi mbuti mbocikonzya kucitwa?

³ Amulyango: Ciindi nomujana muntu uulisungwide kubandika zyamu Bbaibbele, kamwiile kujalula broshuwa ya Ncayanda akulanga muncali ngomwalibambilide mbuli muncali wakusaanguna muciiyo 1, mpoonya akutalika. Amubale muncali, mulange mubuzyo akubandika lugwalo lomwe naa obile aatondezyedwe. Bunji bwaziindi eeci cilakonzya kucitwa mpoonya amulyango mumaminiti ali osanwe kusikila kuli ali kkumi. Ikuti muntu ooyo watondezya luyandisyo mumubandi, amubikke bubambe bwakuti mukalange-lange muncali uutobela naa yobile ciindi cimbi.—Inzila azimbi zyakubelesya zyacigaminina mukutalisya ziiyo zilakonzya kujanwa mu Mulimo Wesu wa Bwami wa January 2002, p. 6.

4. Mbuti mbotukonzya kutalisya ciiyo ca Bbaibbele amulyango notupilukila?

⁴ Nzila njiyonya eeyi ilakonzya kubelesyegwa kutalisya ziiyo zya Bbaibbele nomupilukila. Mucikozyanyo, mulakonzya kubatondezya broshuwa ya Ncayanda akubandika zina lya Leza kwiinda mukubelesya ciiyo 2, mincali 1-2. Mukuswaya kutobela, mulakonzya kubandika ncolyaamba Bbaibbele kujatikizya bube bwa Jehova kwiinda mukubelesya mincali 3-4. Mumubandi uutobela, mulakonzya kulanga-langa mincali 5-6 acifwanikiso cili apeeji 5 ikupandulula mbuli ikwiiya Bbaibbele mbokutugwasya kumuzyiba Jehova. Zyoonse eezyi zilakonzya kucitwa kamwiimvwi amulyango.

5, 6. (a) Nkaambo nzi bantu bamwi ncobakonzya kusala kwiiya Bbaibbele kwiinda mukubelesya luwaile? (b) Ninzila nzi njotukonzya kubelesya ciindi notubelesya luwaile kupandulula mbocicitwa ciiyo?

⁵ Kubelesya Luwaile: Ibamwi bantu inga kabalisungwide kwiiya Bbaibbele kwiinda mukubelesya luwaile kutali kubonana buya. Amulange-lange cakuluula eeci: Ciindi naakali kukambauka kuŋanda aŋanda, mucizyi umwi wakayaanya mukaintu uucili mwana uujisi bubi amulimo wakwe. Ciindi mucizyi naatakamujana aŋanda mukaintu ooyu, wakayeeya kuti amutumine luwaile. Mukaintu ooyu wakapandulula kuti ncobeni tanaakajisi ciindi cakubandika zyamu Bbaibbele. Mucizyi ooyu wakaamba kuti: “Mumaminiti aali 10 naa 15, mulakonzya kwiiya kaambo kamwi kapya nokuba kwiinda mukubelesya luwaile.” Mukaintu wakaingula kuti: “Eena, ikuti kakuli kubelesya luwaile, cili buyo kabotu!” Mpoona ciiyo calyoonse cakali kweendelezyegwa aluwaile.

⁶ Sena ibamwi aabo mbomuswaya inga kabalisungwide kwiiya kwiinda mukubelesya luwaile? Mulakonzya kusoleka nzila yaambwa atala, antela mulakonzya kwaamba kuti: “Ikuti kamuyanda, tulakonzya kubandika zyamu Bbaibbele kwiinda mukubelesya luwaile. Sena cili kabotu kulindinywe?” Kwiinda mukweendelanya bubambe bwesu bwa kwiiya Bbaibbele kubukkale bwa bantu, tulakonzya kubagwasya “kujana luzibo lwa-Leza.”—Tus. 2:5; 1 Kor. 9:23.

Nzyomweelede Kwaamba Kujatikizya Mamagazini

Ngazi Yamulindizi Sept. 1

“Sena kuli nomwakalibuzyide ikuti naa cilakonzyeka kutondezya bube bubotu bukonzya kukkomanisya Leza nokuba kuti tatulondokede? [Amulindile bwiinguzi] Amubone Lugwalo oolu lutondezya mbotukonzya kucita boobo. [Amubale Ba-Roma 12:2.] Eeyi magazini ilatugwasya kubona mbazu oomo motukonzya kutondezya bulemu bwa Leza.”

Ngazi Yamulindizi Sept. 1

“Ino muyeeya kuti nyika noyali buti ikuti mulawo waluyando nowali lembedwe mumyoyo yabantu boonse? [Amulindile bwiinguzi.] Ncobeni nyika yoonse noyali muluumuno. Eeyi magazini ilapandulula mbuli kuyanda Leza mbokuswaangene akuyanda basimukoboma.” Amubale 1 Johane 4:7, 20.

Ngazi Yamulindizi Sept. 1

“Mazubaano, kusyomeka mbube bulumbaizyigwa kapati pele ibutacitwi. Sena inga taciboti ikuti bantu banji nobali mbuli mulongwe uupanduludwe waawa? [Amubale Tusimpi 17:17. Mpoonya mulindile bwiinguzi.] Eeyi magazini ilabandika mpindu zijanika mukusyomeka kumukwasyi wesu alimwi akubalongwe.

Ngazi Yamulindizi Sept. 1

“Penzi lyamali, manyongwe aali mutwaambo twacisi, milandu alimwi akuciswa zili akati kazintu zipa kuti buumi buyume kapati. Sena muyeeya kuti kuli muntu ukonzya kupa kuti tukkazyike moyo mazubaano aazwide manyongwe? [Amulindile bwiinguzi. Mpoonya mubale Mika 6:8.] Eeyi magazini ilabandika mbuli ndiswe notutalondokede mbotukonzya kweenda a Leza.”