Lugwasyo Lwanu Lulayandika

¹ “Ndalumba kuzintu zyoonse nzyomutucitila. Kubeleka kwanu kulatugwasya kapati.” Kwaamba ooku kutondezya kulumba nkotujisi kubaalu alimwi akubakutausi. Mbunga ya Leza mboiya buzumanana kukomena, kuciyandika basankwa basimide kubeleka mumbungano zitandila ku 100,000 nyika yoonse. Ikuti kamuli mukwesu uubbapatizyidwe, lugwasyo lwanu lulayandika.

² “Kusika Azyeelelo”: Mbuti mbomukonzya kusika azyeelelo kutegwa mube amikuli aimbi? (1 Tim. 3:1, NW) Mulakonzya kusika kwiinda mukuba cikozyanyo cibotu mumbazu zyoonse zyabuumi bwanu. (1 Tim. 4:12; Tit. 2:6-8; 1 Pet. 5:3) Amutole lubazu camoyo omwe mumulimo wakukambauka, alimwi amubagwasye abamwi kucita boobo. (2 Tim. 4:5) Amubabikkile maano basyominyoko. (Rom. 12:13) Amube basikwiiya ba Jwi lya Leza basungu alimwi amube acilengwa cibotu ‘cakuyiisya.’ (Tit. 1:9; 1 Tim. 4:13) Amwiibeleke cabusungu milimo njomupedwe abaalu. (1 Tim. 3:10) Kuti kamuli basilutwe bamukwasyi, ‘amubeenzye kabotu boonse bamuŋanda yanu.’—1 Tim. 3:4, 5, 12.

³ Kusalwa kuba mukutausi naa mwaalu kuyandika kubeleka canguzu alimwi akuba amuuya wakulyaaba. (1 Tim. 5:17) Aboobo kutegwa musike azyeelelo, kuyandika kubelekela bamwi cakulicesya. (Mt. 20:25-28; Joh. 13:3-5, 12-17) Amukkale ansi kuyeeya bube bwa Timoteo, alimwi amubwiiye. (Flp. 2:20-22) Mbomunya mpuwo yakwe mbotu mboya kamupa kuba amikuli aimbi, andinywe mpuwo yanu mbotu aicite oobo. (Inc. 16:1, 2) Mbomusoleka kuba abube bwakumuuya buyandika kutegwa mube amikuli aimbi, amubelesye kufwumbwa lulayo ndomwapegwa lugwasya kuya ampela kutegwa “bantu boonse babone mboya bukomena mumilimo yako.”—1 Tim. 4:15.

⁴ Nobazyali, Amuyiisye Bana Banu Kugwasya: Bana balakonzya kwiiya kugwasya kutalikila kubwana. Amubayiisye kuti kababikkila maano lyamiswaangano, kukukambauka, alimwi akuba bana bajisi cikozyanyo cibotu cakulilemeka a Ŋanda ya Bwami akucikolo. Amubayiisye mbokutolwa lubazu mukubelekela bamwi calutangalo, mbuli kugwasya kusalazya Ŋanda ya Bwami, kugwasya bacembede amilimo imwi. Ababubone bubotu buliko akaambo kakubelekela bamwi. (Inc. 20:35) Kuyiisyigwa kuli boobu kulakonzya kubagwasya kuba bapainiya, bakutausi alimwi abaalu kumpela.

Cibeela 4—Ikweendelezya Ziiyo zya Bbaibbele Ziyaambele

Kuyiisya Basikwiiya Kulibambila

¹ Sikwiiya uubala cibalo kabutanasika buzuba bwakwiiya, uleenga bwiinguzi alimwi akuyeeya mbwakonzya kwaamba mumajwi aakwe, kanji-kanji ulafwamba kuya ampela kumuuya. Aboobo mwatalisya buyo ciiyo cisitikide, amulibambile cibalo antoomwe anguwe kutegwa mumutondezye mbokulibambilwa. Kuli basikwiiya banji, cilakonzya kugwasya kulibambila antoomwe cibalo coonse naa ciiyo.

² Kweenga Bwiinguzi Akulemba Twaambo Mumbali Aabbuku: Amupandulule mbokujanwa bwiinguzi bugaminide kumibuzyo iisimbidwe. Amumutondezye bbuku lyanu sikwiiya mwalo momwakeenga buyo twaambo tupati-pati. Nomulanga-langa cibalo inga wayanda kuccilila cikozyanyo canu, kweenga buyo ziyandika mubbuku lyakwe kutegwa zimugwasye kuyeeya bwiinguzi. (Lk. 6:40) Kwamana boobo, amumulombe kuti aingule mumajwi aakwe. Eeci ciya kumugwasya nywebo kubona mbuli mbwacimvwa ciiyo ncomwiiya.

³ Kubikkila maano mukulanga-langa magwalo aatazubuludwe ncibeela ciyandika kapati kuli sikwiiya nalibambila ciiyo. (Inc. 17:11) Amumugwasye kubona kuti magwalo aatazubuludwe agwasyilizya kaambo kali mumuncali. Amumutondezye mbokulembwa twaambo mubufwiifwi mumbali aabbuku ndyaiya. Amumwaambile kuti Bbaibbele ngomusemo wazintu nzyaiya. Amumuyumye-yumye kuti kaabelesya kapati magwalo aatazubuludwe naingula mwanooiya.

⁴ Kulanga-Langa Cibalo Akwiinduluka: Sikwiiya katanasitikila kulibambila ciiyo, inga camugwasya kutaanguna kucilanga-langa cibalo coonse kutegwa abone mbocibede. Amumwaambile kuti ulakonzya kucilanga-langa cibalo kwiinda mukulanga-langa mutwe wacibalo, tutwe alimwi azifwanikiso. Amumwaambile kuti katana bikka ambali ncaali kulibambila, inga cagwasya kutola kaindi kasyoonto kwiinduluka twaambo tupati-pati tuli mucibalo, ambweni kubelesya kabbokesi kakwiinduluka kuti kakaliko. Kwiinduluka kuli boobu kuya kumugwasya kutaluba twaambo.

⁵ Kuyiisya sikwiiya kulibambila kabotu ciiyo cakwe, kuya kumugwasya kupa bwiinguzi bugwasya lyamiswaangano yambungano. Alimwi ciya kumugwasya kuba acilengwa cibotu cakulibambila calo ciya kumupa mpindu kufwumbwa aakumanizya kwiiya bbuku lyaciiyo ca Bbaibbele.