Cibeela 6—Ikweendelezya Ziiyo zya Bbaibbele Ziyaambele

Cakucita Ikuti Sikwiiya Wabuzya Mubuzyo

¹ Mbocatalisyigwa buyo ciiyo, cilainda kubota ikulanga-langa njiisyo zyamu Bbaibbele cakutobelanya, muciindi cakulanga makani aya ayaaya. Eeci cilagwasya sikwiiya kuba antalisyo yaluzyibo lwini-lwini alimwi akuyaambele kumuuya. (Kol. 1:9, 10) Nokuba boobo, bunji bwaziindi basikwiiya balabuzya mibuzyo iijatikizya twaambo tusiyene-siyene aciiyo. Ino mbuti mboyeelede kulanganizyigwa?

² Amubelesye Bupampu: Imibuzyo yeendelana amakani ali mukuyiigwa inga yaingulwa mpoonya-mpoonya. Ikuti naa mubuzyo ooyo uyoolangwa-langwa kumbele mubbuku lili mukuyiigwa, inga caba buyo kabotu kwaamba kuti uyooyingulwa kumbele. Pele, ikuti naa mubuzyo taweendelani amakani ali mukuyiigwa antela uyandika kuvwuntauzya kutegwa mujane bwiinguzi buluzi, inga cainda kugwasya kuulanga-langa camana ciiyo naa aciindi cimwi kumbele. Ibamwi basikumwaya bajana kuti kuulemba mubuzyo kulasyomezya sikwiiya kwaamba kuti mubuzyo wakwe wabikkilwa maano alimwi cilagwasya kuti ciiyo citanyonganizyigwi.

³ Bunji bwa njiisyo zyamu Bbibbele zilalangwa-langwa buyo mubufwaafwi mumabbuku eesu aakwiiya aantalisyo. Ncinzi ciinga cacitwa ikuti sikwiiya kajana buyumu-yumu kuzumina njiisyo imwi antela kayisyoma kapati njiisyo imwi yakubeja? Ambweni inga cagwasya kulanga-langa makani amu Bbaibbele aayungizyidwe aapandulula inkani eeyo. Ikuti sikwiiya kazumanana kutaasyoma, amwaaleke makani aayo mane ciindi cimbi eelyo amuzumanane aciiyo cakwe calyoonse. (Joh. 16:12) Mbwayabuzumanana kujana luzyibo lwamu Bbaibbele akuyaambele kumuuya, ambweni inga waakuyitelela eeyo njiisyo yamu Bbibbele.

⁴ Amulibombye: Ikuti kamutabuzyi kabotu bwiinguzi, mutabi acilengwa cakwiingula buyo kweelana anzyomuyeeya. (2 Tim. 2:15; 1 Pet. 4:11) Amumwaambile kuti anzina mukaavwuntauzye makani aayo muzoomupa bwiinguzyi. Ambweni inga mwabelesya ciindi eeco ikuyiisya sikwiiya mbwaanga walivwuntauzizya. Amuzumanane kumutondezya mbwaanga wabelesya zibelesyo zisiyene-siyene zyakuvwuntauzyila zipedwe ambunga ya Jehova. Munzila eeyi kumbele uyakucikonzya kujana bwiinguzi bwamibuzyo yakwe.—Inc. 17:11.

Kwiinduluka Kwamu Cikolo Camulimo Weendelezyegwa a Leza

Mibuzyo iitobela iyoobandikwa mu Cikolo Camulimo Weendelezyegwa a Leza munsondo iitalika mu February 28, 2005. Mulangizi wacikolo uyooyendelezya mubandi wakwiinduluka wamaminiti aali 30 kujatikizya makani aakabandikwa kuzwa munsondo iitalika mu January 3 kusikila munsondo iitalika mu February 28, 2005. [Malailile: Kujatikizya mibuzyo iitajisi bbuku litondezya nkobujanwa bwiinguzi, mweelede kuvwuntauzya kutegwa mujane bwiinguzi.—Amubone bbuku lya Cikolo Camulimo, pp. 36-7.]

ZIBEELA ZYAKUKANANA

1. Mbuti mbotukonzya kucita kutegwa kukanana kwesu kube kooko kumvwugwa? [be p. 226 munc. 1-p. 227 munc. 1]

2. Mabala nzi aanga ayandika kupandulula? [be p. 227 munc. 2-p. 228 munc. 1]

3. Ino ninzila nzi iikonzya kutugwasya kwaamba makani munzila inga yagwasya kapati baswiilizi kumvwa caambwa? [be p. 231 munc. 1-3]

4. Mbuti mbotukonzya kucita notubala lugwalo luzyibidwe kapati kutegwa lukonzye kubagwasya baswiilizi? [be p. 231 munc. 4-5]

5. Ino mbubotu nzi bukonzya kujanwa mukukulwaizya baswiilizi kubikkila maano kutwaambo tupati-pati tuli mucibalo ca Bbaibbele cizyibidwe? [be p. 232 munc. 2-4]

MAKANI NA. 1

6. Ncinzi cibikkilizyidwe mukuyiisya bantu ‘kulemeka Leza akubamba milawo yakwe’? (Muk. 12:13) [be p. 272 munc. 3-p. 273 munc. 1]

7. Mbuti mbociyandika kukankaizya mbwabede Jehova ikutali buyo kukankaizya izina lyakwe? (Joel. 2:32) [be p. 274 munc. 3-5]

8. Mbuti mbociyandika kumuzyiba Jesu alimwi akwaamba zyanguwe? (Joh. 17:3) [be p. 276 munc. 1]

9. Mbuti kuba acilongwe a Leza akumvwisya Bbaibbele mbokuswaangenyi cacigaminina kuti tulamubikkila maano Jesu? [be p. 276 munc. 2]

10. Mbuti mbotukonzya kutondezya kuti masimpe tulasyoma kuti Jesu Kristo Mwami? [be p. 277 munc. 4]

KUBALA KWA BBAIBBELE KWANSONDO ANSONDO

11. Sena wisi Abrahamu Tera wakali mukombi wamizimo? (Jos. 24:2)

12. Sena caamba kuti Gideoni tanaakali sicamba kuzuzikizya mulimo Jehova ngwaakamupa? Nkaambo nzi ncomuvwiilila boobo? (Bab. 6:25-27)

13. Ncinzi ncotukonzya kwiiya munzila Gideoni mbwaakabaambila bamusyobo wa Efraimu? (Bab. 8:1-3)

14. Ncinzi cakatondezyegwa mukutabikkila maano kwabana Gibeya kukutambula beenzu? (Bab. 19:14, 15)

15. Ikuti naa “muntu woonse wakacita kufumbwa cakabota mumeso aakwe,” sena eeci caamba kuti taku mulawo wakaliko? (Bab. 21:25)