Buzuba bwa Jehova Buli Afwaafwi

¹ Banakristo balakuyandisya kubola kwa buzuba bwa Jehova eelyo nayoonyonyoona bweende oobu bwa zintu akuleta nyika mpya yabululami. (2 Pet. 3:12, 13) Mbwaanga tatuzyi ciindi cini buzuba oobu nobuyoosika, tweelede kuzumanana kulangila akugwasya bamwi kucita mbubwenya oobu. (Ezk. 33:7-9; Mt. 24:42-44) Ikuzinzibala kuyeeya Jwi lya Leza lya businsimi kuyooyumya lusyomo ndotujisi lwakuti “buzuba bupati bwa-Jehova buli kufwaafwi.”—Zef. 1:14.

² Bweende bwa Masi Aayeendelezya Nyika Yoonse: Mbuli mbukulembedwe ku Ciyubunuzyo 17:9-11, mwaapostolo Johane waamba zya “bami bali musanu ababili” ibaiminina bweende bwamasi aayeendelezya nyika yoonse. Alimwi Johane waamba zya ‘mwami walusele’ walo lino wiiminina mbunga ya United Nations. Sena kuli cisi cimwi ceendelezya nyika yoonse ncotunga twalangila kubako? Peepe. Ibusinsimi bwaamba kuti mwami ooyu walusele “ulaya kulunyonyooko” eelyo kunyina bami bambi baansi baambidwe. Ibusinsimi oobu bulamugwasya kuzyiba mazuba ngotupona.

³ Lugwalo lwa Daniele 2:31-45 lutugwasya kuzyiba kuboola kwa buzuba bwa Jehova. Mubusinsimi oobu, cikozyanyo cipati ncaakabona Nebukadinezara muciloto ciiminina bweende bwamasi aayeendelezya nyika yoonse. Imasi aaya oonse aalibonya kale. Ino tukkede kuciindi cili mazuba aano? Tuli kuciindi ciimininwa azituta zyacikozyanyo. Ibusinsimi oobu bulacisalazya kwaamba ciyootobela lino. Bulelo bwa bantu buyoonyonyoonwa akunjililwa busena a “bwami butakooyoonyonyoonwa abuniini mane kukabe kutamani.” Tee kayi mwabona eeci mbocitondezya kuti buzuba bwa Jehova buli afwaafwi?

⁴ Ibumboni Abumwi: Twalibonena bumboni abumwi butondezya kuti buzuba bwa Jehova buli afwaafwi. Twabona kuzuzikizyigwa kwa makani ngaakasinsima mwaapostolo Paulo kujatikizya ciimo ca bantu “kumazuba aakumamanino.” (2 Tim. 3:1-5) Alimwi tulatola lubazu mukupa bumboni nyika yoonse mamanino kaatanasika. (Mt. 24:14) Mulimo wesu wakubuleya autondezye mbociyandika kutobela majwi amungelo aakuti: “Amuyoowe Leza akumupa bulemu, nkaambo casika ciindi calubeteko lwakwe.”—Ciy. 14:6, 7.

Cibeela 9—Ikweendelezya Ziiyo zya Bbaibbele Ziyaambele

Kugwasya Basikwiiya Kupa Bumboni Bwamukwiizya

¹ Ciindi Andreya a Filipo nobakazyiba kuti Jesu ngo Mesiya wakasyomezyedwe, tiibakawaya-waya kwaambila bamwi makani aaya aakkomanisya. (Joh. 1:40-45) Ncimwi buyo amazuba aano, eelyo basikwiiya Bbaibbele nobatalika kutondezya lusyomo muzintu nzyobaiya, balakulwaizyigwa kwaamba nzyobaiya. (2 Kor. 4:13) Mbuti mbotunga twabakulwaizya kupa bumboni bwamukwiizya alimwi akubagwasya kuti bacite oobu cakuzwiidilila?

² Inga mwacita oobu kwiinda mukubuzya sikwiiya ikuti naa kuli nakaambila bamwi nzyaiya kuzwa mu Bbaibbele. Ambweni kuli balongwe alimwi abasazinyina mbakonzya kutamba kuti bamusangane aciiyo cakwe. Amumubuzye ikuti naa kuli mbabeleka limwi, basicikolonyina naa beenzinyina ibatondezya luyandisyo mumakani mabotu. Munzila eeyi ulakonzya kutalika kupa bumboni. Amumugwasye kumvwisya mbociyandika kubelesya bupampu alimwi akutondezya bulemu aluzyalo ciindi naambila bamwi kujatikizya Jehova Leza alimwi amakanze aakwe.—Kol. 4:6; 2 Tim. 2:24, 25.

³ Kwaambila Bamwi Nzyobasyoma: Cilayandika kapati kuyiisya basikwiiya Bbaibbele kubelesya Jwi lya Leza nobaambila bamwi nzyobasyoma. Muziindi zili mbozibede nomwiiya, amubuzye sikwiiya kuti: “Mbuti mbomunga mwabelesya Bbaibbele kupandulula kasimpe aaka kumukwasyi wanu?” naa “Ndugwalo nzi lwamu Bbaibbele ndomunga mwabelesya kusalazya kaambo aaka kubalongwe banu?” Amuswiilile naingula eelyo amumutondezye mbwakonzya kubelesya Magwalo mukuyiisya kwakwe. (2 Tim. 2:15) Kwiinda mukucita boobu, muyoogwasya sikwiiya kupa bumboni bwamukwiizya alimwi mane aakweelela, mukutola lubazu mumulimo wakukambauka antoomwe ambungano.

⁴ Ncamaano kugwasya basikwiiya Bbaibbele kulangila kuti balakonzya kukazyigwa. (Mt. 10:36; Lk. 8:13; 2 Tim. 3:12) Ciindi bamwi nobabuzya mibuzyo naa kwaamba twaambo tujatikizya Bakamboni ba Jehova, eeci cilakonzya kupa kuti basikwiiya bape bumboni. Ibroshuwa yakuti Mboni za Yehova—Kodi Iwo Ndani? Kodi Amakhulupirira Chiyani? ilakonzya kubagwasya ‘kuba bantu balibambide lyoonse kupandulula.’ (1 Pet. 3:15) Ibroshuwa eeyi ilijisi twaambo tuluzi ntobakonzya kubelesya bapya kugwasya balongwe abasazinyina babayanda alimwi bababikkila maano kumvwisya nzyotusyoma alimwi amilimo yesu iiyeeme aa Bbaibbele.