Ikukambauka Kulatugwasya Kuliyumya

¹ Ijwi lya Leza litukulwaizya kuti “tugame kusiana nkotwabikilwa kunembo.” (Heb. 12:1) Mbubwenya sikulunduka mbwayandika kuliyumya kutegwa azwidilile, andiswe tuyandika kuliyumya kutegwa tukajane caabilo cabuumi butamani. (Heb. 10:36) Mbuti mulimo wa Banakristo mboukonzya kutugwasya kuliyumya cakusyomeka kusikila kumamanino?—Mt. 24:13.

² Tulayumizyigwa Kumuuya: Ikwaambilizya cisyomezyo citaliboteli camu Bbaibbele cijatikizya nyika mpya yabululami, kupa kuti katubikkila maano kubulangizi bwesu bwabuumi bubotu bwakumbele. (1 Tes. 5:8) Ciindi notutola lubazu mumulimo wamumuunda, citupa coolwe cakuzyibya bamwi kasimpe nkotwaiya kuzwa mu Bbaibbele. Alimwi eeci citupa coolwe cakwiiminina lusyomo lwesu calo citugwasya kuti tuyume kumuuya.

³ Kutegwa tucikonzye kubayiisya kabotu bamwi, swebo kutugama tweelede kukamvwisya kasimpe kamu Bbaibbele. Tweelede kuvwuntauzya alimwi akuzinzibala kuyeeya makani ayo. Ikusolekesya nkotucita kulapa kuti luzyibo lwesu luyungizyigwe, kulayumya lusyomo lwesu alimwi kulatukatalusya kumuuya. (Tus. 2:3-5) Aboobo, eelyo notuyandaula nzila yakugwasya bamwi, andiswe tulayumizyigwa.—1 Tim. 4:15, 16.

⁴ Ikutola lubazu cabusungu mumulimo ncibeela cimwi ciyandika ca “zilwanyo zyoonse zya-Leza” zyalo nzyotuyandika kutegwa tulwane Diabolosi amadaimona. (Ef. 6:10-13, 15) Ikujata bubi mumulimo uusetekene kulatugwasya kubikkila maano kuzintu ziyaka alimwi akukaka kusofwaazyigwa anyika ya Saatani. (Kol. 3:2) Ciindi notuyiisya bamwi kujatikizya nzila zya Jehova, lyoonse tulayibalusyigwa mbociyandika kuti katulilemeka.—1 Pet. 2:12.

⁵ Kuyumizyigwa a Leza: Camamanino, ikutola lubazu mumulimo wakukambauka kutuyiisya kusyoma muli Jehova. (2 Kor. 4:1, 7) Eeci ncibotu kapati. Ikuba alusyomo luli boobu takupi buyo kuti tucikonzye kucita mulimo wesu, pele alimwi kulatugwasya kuliyumya notusikilwa mapenzi. (Flp. 4:11-13) Masimpe, ikuba aciyanza cakusyoma cakumaninina muli Jehova kulayandika mukuliyumya. (Int. 55:22) Muunzila zinji ikukambauka mukutugwasya kuliyumya.

Cibeela 10—Ikweendelezya Ziiyo zya Bbaibbele Ziyaambele

Kuyiisya Basikwiiya mu Mulimo Waku Ŋanda Aŋanda

¹ Ciindi baalu nobabona kuti sikwiiya Bbaibbele uleelela kuba sikumwaya uutabbapatizyidwe, inga watalika kutola lubazu ambungano mumulimo wakukambauka kubuleya. (Amubone Bakamantene Mukucita Kuyanda kwa Jehova, pp. 79-81.) Mbuti mbotunga twagwasya basikwiiya kusika ambaakani yakukambauka kuŋanda aŋanda?

² Kulibambila Antoomwe: Iciyandika nkulibambila kabotu. Amumutondezye sikwiiya mpakonzya kujana zyakwaamba mu Mulimo Wesu wa Bwami alimwi amubbuku lya Kukambitsirana alimwi amumugwasye kusala nzila nguba-uba ikonzya kubeleka nkomuzwa. Mbwaatalikila buyo, amumukulwaizye kuti kabelesya Bbaibbele mumulimo wakwe.—2 Tim. 4:2.

³ Ikwiinduluka-induluka kulakonzya kumugwasya kapati sikumwaya mupya. Ciindi sikwiiya nainduluka-induluka nzyakonzya kwaamba, amumwaambile mbwakonzya kwiingula cabupampu kumibuzyo ibuzigwa kapati mucilawo momubelekela. (Kol. 4:6) Amumwaambile kuti bakambausi Banakristo tabakonzyi kuzyiba bwiinguzi bwamubuzyo uli woonse ngwakonzya kubuzya mwiniŋanda. Kanji-kanji cilainda kugwasya kwaambila mwiniŋanda kuti anzina mukavwuntauzye muyoopilukila kuzoomupa bwiinguzi.—Tus. 15:28.

⁴ Kukambauka Antoomwe: Ciindi cakusaanguna sikwiiya natola lubazu mumulimo waku ŋanda aŋanda, amumwaambile kuti amulangilile nomukambauka kwiinda mukubelesya nzila njomwalibambila antoomwe. Mpoonya amumuleke awalo atole lubazu. Muzimwi ziindi inga cainda kugwasya kuti sikumwaya mupya waamba buyo nzila njomwalibambila mbuli kubala alimwi akupandulula lugwalo. Amubikkile maano kubube alimwi aluzyibo lwa sikwiiya. (Flp. 4:5) Amumulumbaizye mbomuyaambele kumuyiisya mbazu zisiyene-siyene zyamulimo wakukambauka.

⁵ Cilayandika kugwasya sikumwaya mupya kuba abubambe bwakutola lubazu mumulimo lyoonse, ikuti kacikonzyeka kacita oobo amvwiki. (Flp. 3:16) Amubikke bubambe bugaminide bwakubeleka limwi mumulimo alimwi amumukulwaizye kubeleka abasikumwaya bamwi basungu. Icikozyanyo cabo alimwi akuyanzana ambabo kuyoomugwasya kuti ayungizye luzyibo alimwi akujana lukkomano mumulimo wakukambauka wakuŋanda aŋanda.