Ooyo Uupa Calumwemwe Nguuyandwa Kuli Jehova
1. Nkaambo nzi Jehova ncali Leza uukkomene?
1 Jehova waambwa kuti ngu ‘Leza uukkomene.’ (1 Tim. 1:11) Ino ncinzi cimupa kukkomana Jehova? Akati kazintu zimwi, ulikkomene akaambo kakuti ngusibuuya alimwi ulapa, ‘ulafumbatula ijanza lyakwe akukutya kusukama kwabaumi boonse.’ (Int. 145:16) Cipego cipati ncaakatupa Mmwana wakwe kuba cinunuzyo cesu. (Joh. 3:16) Alimwi amuyeeye zilongezyo zyoonse zyakumuuya alimwi azyakumubili nzyatupa abuzuba. Masimpe, Jehova ncecikozyanyo cibotu kapati caboola kumakani aakupa “calumwemwe.” (2 Kor. 9:7) Ibbaibbele litukulwaizya kuti: “Amube basikwiiya ba-Leza.” (Ef. 5:1) Atulange-lange mbazu zimwi motukonzya kumwiiya Jehova akubona lukkomano luboola akaambo kakupa.—Inc. 20:35.
2. Ino tulimvwa buti notukambauka makani mabotu aa Bwami kubantu bamwi?
2 Tulakkomana kupa notutola lubazu mukukambauka makani mabotu aa Bwami kubantu mbotujana mucilawo cesu. Notutola lubazu mumulimo ooyu wakukambauka akuyiisya, tulakkomana kapati. Bantu ba Jehova balatola mawoola aayinda kutuulunzuma tuli cuulu amwaka munzila eeyi yakupa. Mumulimo wesu wakukambauka, tulamwaya tuulunzuma twamamagazini, mabroshuwa alimwi amabbuku kakunyina kubbadalisya.
3. Mbuti mbungano zili mumasi aatavwubide mbuli cisi cesu ca Zambia mbozyagwasyigwa?
3 Kuyungizya waawo, mumasi aatavwubide, mbuli cisi cesu, mbunga ya Jehova yagwasya mbungano zinji kuyaka Maanda aa Bwami. Eeci cipa kuti katuba amasena mabotu aakuswaanganina. Kusikila lino Maanda aa Bwami aainda ku 6,000 ayakwa mumasi aatavwubide mu Africa mulikke. Kwamyaka iili ciloba yainda, mu Zambia mbungano zili 1,302 zyagwasyigwa kuba a Maanda aabo aa Bwami kwiinda mububambe oobu. Mbungano eezi zyeelede kwaalanganya kabotu maanda aaya kweelana anguzu zyabo mpozigolela alimwi akusanga kujatikizya mali aakabelesyegwa kuyasya. Mali aaya aasangwa apa kuti mbungano zimwi azyalo zikonzye kuyaka maanda mapya ciindi kaciciliko.
4. Nzintu nzi zidula kapati zibelesyegwa mumaofesi aamutabi nyika yoonse?
4 Ba Kabunga Keendelezya kwiinda mumitabi iinda ku 100, baleendelezya mulimo wa Bwami uucitwa nyika yoonse. Kuli bakwesu abacizi bainda ku 20,000 babelekela mumitabi eeyi. Mitabi imwi balasimba mabbuku aabelesyegwa abantu mumuunda. Caino-ino mbunga yakaula mincini mipati kapati iisimba cakufwambaana iili ciloba yalo iikonzya kusimba mamagazini aali 90,000 mumuncini aumwi kwawoola lyomwe. Amuyeeye buyo zijatikizyidwe mumilimo mipati yakusimba eeyi iili boobu. Maanda mapati alayandika kutegwa kubikkwe mincini eeyi mipati yakusimba. Kuyandika mapepa manji alimwi azintu zimwi zidula kapati kutegwa kusimbwe mamagazini amabbuku. Kuyandika makkompyuta azibelesyo zimwi kutegwa mulimo wakusandulula awamuofesi kaucitwa. Alimwi kuyandika maanda aakoona aabantu babelekela ku Bbeteli. Zyoonse eezi zilacitwa akaambo kakuyanda kutola ambele mulimo wakukambauka.
5. Ino mmilimo nzi aimwi iiyandika mali manji munyika yoonse?
5 Mali amwi mbunga njiibelesya alabikkilizya akulanganya zyuulu-zyuulu zyabamisyinali alimwi abapainiya baalubazu ibabelekela muzilawo mutakwe basikumwaya banji. Alimwi kuli zyuulu-zyuulu zyabalangizi beendeenda baswaya mbungano kutegwa bayumye lusyomo lwabakwesu akubakulwaizya mumulimo wakukambauka. Tulakonzya kuzumanana kwaamba zintu Jehova zyapa kuti babelesi bakwe bazuzikizye nokuba kuti kusoogwa mali manji kapati.
6. Ino mali oonse aapa kuti mulimo wa Leza kaucitwa azwa kuli?
6 Aboobo nomulanga mulimo mupati uucitwa munyika yoonse, mulakonzya kugambwa nkwaazwa mali aapa kuti milimo eeyi kaicitwa. Mali oonse aaya taazwi kubakwesu bavwubide naa masi masyoonto aavwubide. Azwa kutuulunzuma twabakwesu bavwubide abapengede abaabo bajisi luyandisisyo ibabona mbouyandika mulimo ooyu Jesu ngwaakatulailila kucita. (Mt. 24:14; 28:19, 20) Mali oonse aaya aasangwa ali mbuli tudosi twamvwula twalo mukuya kwaciindi tupanga kalonga kaya mumulonga. Mulonga ooyo utila mulwizi eelyo akuba aamayuwe manji. Bakamboni ba Jehova tabainzyi mbale yakubwezelela mali ciindi camiswaangano yabo naa kunyina nobalombelela mali. Aabo boonse bagwasyilizya mulimo ooyu mupati balasanga akaambo kakuti balamuyanda Jehova.
7. Mbuti bantu ba Leza mbobalimvwa lyoonse kujatikizya kupa zyakusanga kumulimo wa Jehova?
7 Kupa zintu zyakumubili cakuliyandila kujatikizya bukombi bwa Jehova busalala lyoonse ngomusemo wabakombi ba Jehova bakasimpe. Abrahamu naakabazunda basikondonyina bakatola Loti mwana wamunyina, wakapa mupaizi Melkisideke zintu zyakumubili. (Matl. 14:18-20) Mwami Davida wakapa ngolida, nsiliva, mukuba, butale alimwi azintu zinji zimwi buyo zyakali kuyandika kujatikizya kuyakwa kwatempele eeyo mwana wakwe njaakazooyaka. (1 Mak. 29:1-5) Jehova naakalailila Musa kuyaka itente lyakubunganina munkanda, bantu bakasanga cakuliyandila. Icibalo ku Kulonga 35:21 caamba boobu: “Nkabela muntu umwi aumwi, na moyo wakwe wakamubusya, alimwi miyeeyo yakwe yakamuzuminizya, wakeza kuletela Jehova cipaizyo cakubelesya milimo.” Ee, ‘myoyo yabo yakayandisisya’ alimwi ‘miyeeyo yabo yakabazuminizya’ kusanga cakuliyandila izintu zidula zyakulisakatizya azimwi buyo nzyobatakali kukonzya kuula alimwi kumbele. Kwakali kuyanda kwabo kuti batole ambele bukombi bwakasimpe.
8. Ino nciiyo nzi ciyandika ncotwiiya kucibalo ca Luka 21:1-4?
8 Mbocibede asunu. Lugwasyo lwakugwasilizya mulimo wa Bwami wanyika yoonse luzwa kuli baabo bajisi myoyo iibazumizya kusanga. Bunji bwabo mbacete pele balagwasyilizya kumulimo wakukambauka kwiinda mukusanga, kanji-kanji nokuba kuti tabajisi cintu cili coonse mbuli mukamufwu mucete mbwaakacita muciindi ncaakali kupona Jesu. Icibalo ca Luka 21 caamba mbuli Jesu abasikwiiya bakwe mbobakali kubalangilila bantu bakali kubikka zipo zyabo muziyobwedo zyamali mutempele. Mpoonya kwakasika mukamufwu mucete akubikka tuli tuniini tobilo tunyina ampindu. Naakamubona mukaintu ooyu, Jesu wakaambila baapostolo bakwe kuti: “Ncobeni ndamwaambila kuti oyu mukamufu mucete wabika kwiinda boonse, nkaambo aba boonse bakabika muzipo zya-Leza akuvula kwalubono lwabo, pele walo abucete bwakwe wakabika coonse ncajisi, ncapona aco.” (Lk. 21:2-4) Mukamufwu wakalumbaizyigwa akaambo kakuti wakalyaaba kapati. Cibalo eeci citondezya kuti naaba mali masyoonto aasangwa kuzwa kubakwesu bacete alayandika kapati alimwi alamukkomanisya Jehova a Mwana wakwe Jesu Kristo.
9. Ino tweelede kuba amuuya uuli buti notupa zintu zyakumubili?
9 Caboola kumakani aakupa kubukombi bwa Jehova bwakasimpe, tweelede kucita oobo amoyo uulumba. Bana Israyeli nobakaleka kubikkila maano kutempele lya Jehova, muciindi cakuleta banyama bali kabotu bakupaizya, bakali kuleta mbobakalizi kuti tabakonzyi kunyonyookelwa, bakali kuleta banyama baciswa, bataboni abalemene. Sena inga Jehova wazikkomanina zipaizyo zili boobu? Peepe! Wakaamba kuti bakamufwubaazya akaambo kakumupa zipaizyo zili boobu. (Lev. 1:10; Malk. 1:13) Kupa kwesu kubukombi bwakasimpe takweelede kuba kwakwiinzya buyo mulawo. Luyando lwesu lwakutola ambele bukombi bwakasimpe lweelede kutukulwaizya; ee, myoyo yesu yeelede kutukulwaizya kupa cakulyaaba kwini-kwini mbuli mukamufwu mucete. Jehova uyootulongezya mbuli mbwaakasyomezya bana Israyeli ikuti bagwasyilizya bukombi bwakwe.—Malk. 3:10.
10. Amupandulule mbobubeleka bubambe bwakusanga kujatikizya mabbuku.
10 Kubantu bamwi, tababumvwisyi kabotu bubambe bwakusanga kujatikizya kumwaya mabbuku amamagazini. Notubweza mabbuku naa mamagazini ku Ŋanda ya Bwami, tweelede kucibona kuba coolwe kusanga kuzintu nzyotubweza. Munzila eeyi tulasoleka kubbadelela mali aamwi aabelesyegwa kuzintu zimwi. Notupa bantu mabbuku mumulimo wesu wamumuunda, tulakonzya kwaamba bubambe bwakusanga kumatalikilo kwini. Kulayandika kwaamba makani aakusanga akubaleka kuti basange ku Mulimo Wanyika Yoonse. Ibanji baziba ncowaamba mulimo wesu wanyika yoonse, cilabakkomanisya kusanga.
11. Mbuti mbotweelede kulimvwa notubelesya zintu zyesu zyakumubili kubukombi bwa Jehova?
11 Twayeeyesya kulyaaba kwesu kuli Jehova, tulizi kuti twakalyaaba kuli Jehova swebo alimwi azintu zyoonse nzyotujisi. Nyika azyoonse zili mumo nzizya Jehova. (Int. 24:1) Aboobo, notusanga kumulimo wanyika yoonse, tujosya kuli Jehova eezyo nzyaakatupa kale. Mwami Davida wakaamba makani aaya ciindi walo abana Israyeli nobakapa zintu cakulisungula kukuyaka tempele. Wakaamba boobu mumupailo kuli Jehova: “Mebo ndimeni? Abalo bantu bangu mbobani? Ncinzi citugwasya kuleta zipo zili boobu? Nkaambo zintu zyoonse zilazwa kulinduwe, azipo nzitwakupa nzezyakazwa kumaanza aako omwini.” (1 Mak. 29:14) Masimpe, muntu aumwi weelede kusala mumoyo wakwe ncayanda kupa kweelana ambwakonzya. Jehova uyoobaleleka boonse ibapa calumwemwe amoyo uulumba.
12. Nkaambo nzi ncocili kabotu kuli aumwi wesu kulilingula kujatikizya mbotugwasyilizya kumulimo wa Bwami?
12 Cili kabotu kulilingula kujatikizya mbotugwasyilizya kumulimo wa Bwami. Ziindi zimwi bakwesu baamba kuti tabajisi zyakusanga kumulimo wanyika yoonse naa mali aakubambuluzya Ŋanda ya Bwami pele balajana mali aakubelesya kuzintu zitayandiki kapati. Caboola kumakani aakubamba bwiinga, kanji-kanji mali manji alabelesyegwa mukucita cintu eeci calo cimana mubuzuba bomwe buyo. Sena eeci tacitondezyi kuti bamwi tababambi kabotu zintu zyeelede kucitwa kusaanguna caboola kumakani aakugwasyilizya kumulimo wa Bwami kwiinda mukusanga?—Flp. 1:10.
13. Mbuti mbotukonzya kusanga kumulimo wanyika yoonse, alimwi mbuti mali aaya mbwaayelede kubelesyegwa ambungano?
13 Mali aasangwa kumulimo wanyika yoonse alakonzya kutuminwa kuofesi yamutabi naa alakonzya kubikkwa mukabbokesi kakusangila ku Ŋanda ya Bwami. Kumamanino aamuswaangano uuli woonse kweelede kuba bakwesu bobilo beelede kubala mali aasangwa akulemba mweelwe wamali alisiiti. Kuti bakwesu bajisi mukuli ooyu wakulanganya mali aasangwa kabasyomeka, bakwesu tabakawayiwayi kubikka mali aabo mutubbokesi twakusangila ku Ŋanda ya Bwami. (1 Kor. 4:2) Mali oonse aasangwa kumulimo wanyika yoonse ayelede kutuminwa kuofesi yamutabi kumamanino aamwezi uuli woonse.
14. Ncinzi ncotukonzya kusinizya ikuti twagwasyilizya kumulimo wakukambauka Bwami kwiinda mukusanga?
14 Jehova wakabaleleka kapati bana Israyeli nobakagwasyilizya cakusyomeka kubukombi bwakwe bwakasimpe kababelesya zintu zyabo zyakumubili. Tulakonzya kuba masimpe kuti uyootuleleka andiswe ikuti cakusyomeka twagwasyilizya kumulimo wakukambauka Bwami alimwi ‘akulemeka Jehova ambono zyesu.’—Tus. 3:9, 10.