“Kwaamba Kwanu Kulweezegwe Amunyo”
1. Ino ‘kwaamba kwesu kulweezyedwe amunyo’ kwaamba nzi?
1 “Kwaamba kwanu kulweezegwe amunyo wakulumba, kuti mube abusongo bwakutaba kabotu kubantu boonse bamubuzya makani.” (Kol. 4:6) Kwaamba zintu zijisi munyo caamba kusala majwi mabotu akwaamba munzila iikonzya kupa kuti baswiilila bakkomane. Ikucita boobo notuli mumulimo kulayandika kapati.
2. Mbuti Jesu mbwaakacikonzya kukambauka kumukaintu muna Samariya?
2 Cikozyanyo ca Jesu: Naakali kulyookezya kumugoti, Jesu wakaambaula amukaintu muna Samariya iwakaboola kuzikuteka meenda. Ziindi zinji nobakali kubandika, mukaintu ooyu wakaamba twaambo tunji twakali kujatikizya kutamvwana kwakali akati kabama Juda aba Samariya. Alimwi wakali kusyoma kuti, bana Samariya bakazwa kuli Jakobo nokuba kuti bama Juda bakali kusyoma kuti bana Samariya bakali bamasi. Muciindi cakuti Jesu atalike kukazyanya amukaintu ooyo kumakani ngaakaamba, mubandi wakwe wakali kukkomanisya. Akaambo kaboobo, wakali kukonzya kupa bumboni bwakamugwasya abantu bamumunzi oomo.—Joh. 4:7-15, 39.
3. Mbuti mbotukonzya kwiiya cikozyanyo ca Jesu notuli mumulimo?
3 Notukambauka, tweelede kuziba makanze ngotujisi—‘aakukambauka makani mabotu.’ (Rom. 10:15) Tuyanda kubandika amukamwini ŋanda makani aakulwaizya aazwa mu Bbaibbele ikutali kumutondezya kuti tukazya nzyasyoma. Ikuti waamba cintu citaluzi, tatweelede kumwaambila kuti walubizya. Sena kuli cintu cimwi ncaamba cili kabotu cikonzya kupa kuti tumulumbaizye? Katutana bala lugwalo ambweni inga twaabuzya kuti, “Sena kuli nomwakayeeyede kuti eeci inga cabeleka?”
4. Mbuti mbotukonzya kucita ikuti mukamwini ŋanda kaambaula cabukali?
4 Ino mbuti kuti mukamwini ŋanda kaambaula cabukali naa ulibonya kuti uyanda buyo kukazyanya andiswe? Tweelede kuzumanana kuba batete moyo notwaambaula. (2 Tim. 2:24, 25) Ikuti muntu ooyo katayandi kuswiilila mulumbe wa Bwami, inga cainda kubota ikuti twamusiya muluumuno.—Mt. 7:6; 10:11-14.
5. Nimpindu nzi mucizi umwi njaakajana akaambo kakwiingula kabotu?
5 Mpindu: Mucizi umwi naakasola kukambaukila simukobonyina, mukaintu ooyu cabukali wakatalika kumutukila. Munzila yalubomba mucizi ooyu wakati: “Amundijatile, tiindalizi kuti mbomulimvwa oobu. Mbubo ndaunka.” Nokwakainda nsondo zyobilo, mukaintu ooyu wakaunka kwaakulilekelela kumucizi akaambo kakumutukila akumwaambila kuti wakalilisugude kuswiilila nzyakali kuyanda kwaamba mucizi ooyu. Kwiingula kabotu kanji-kanji kuletela mpindu.—Tus. 15:1; 25:15.
6. Ino nkaambo nzi ncotuyandika kubelesya majwi mabotu notuli mumulimo?
6 Amusole kwaambaula kabotu nomukambauka makani mabotu. Noliba leelyo mukamwini ŋanda natayandi kuswiilila, ulakonzya kuswiila ciindi Bakambon ba Jehova bamwi baakumuswaya.