Mbotukonzya Kutalisya Ziiyo mu Bbuku lya Bbaibbele Ncoliyiisya

Tobanji inga twakkomana kweendelezya ciiyo ca Bbaibbele ikuti twacikonzya kucitalisya. Bbuku lipya lya Ino Ncinzi Cini Bbaibbele Ncoliyiisya? lilakonzya kutugwasya. Makani aantalisyo aali apeeji 3-7 abambilidwe kugamika uuli aŋanda kumubandi wamu Bbaibbele mukubelesya bbuku eeli. Nobaba baabo batanazyibila mumulimo ciyoobaubila-ubila kulibelesya kutalisya ziiyo.

◼ Mulakonzya kusoleka ntalisyo eeyi kubelesya peeji 3:

Mwamana kwaamba kaambo kaambwa mumuteende naa muli sikapepele naa penzi ndyobabikkila maanu bantu bamucilawo cenu, amugamike uuli aŋanda kumibuzyo iili apeeji 3 mumabala aasiisya, akumulomba kuti aingule. Mpoonya amujalule kupeeji 4-5.

◼ Ndiza inga mwayanda kutalika kwiinda mukupandulula zili apeeji 4-5:

Mulakonzya kwaamba kuti, “Sena tacikonzyi kubota kuti kucinca kutondezyedwe aawa kwacitika?” Naa inga mwabuzya kuti, “Ncisyomezyo cili akati kazeezi ncomuyanda kuti mukabone caakuzuzikizyigwa?” Amuswiililisye kubwiinguzi.

Ikuti uuli aŋanda watondezya luyandisyo mulugwalo lumwi, amumutondezye ncoliyiisya Bbaibbele kukaambo aako kwiinda mukulanga-langa mincali iili mubbuku iipandulula kaambo aako. (Amubone kabbokesi kali apepa lyamukati lyapeeji lino.) Amutulange-lange twaambo mbubonya mbomukonzya kucita lya ciiyo ca Bbaibbele. Eeci cilakonzya kucitwa mumaminiti ali osanwe kusikila kuli aali kkumi mukuswaya kwakusaanguna mpoona amulyango.

◼ Ntalisyo aimwi njakukulwaizya muntu kwaamba mbwayeeya mukubelesya peeji 6:

Amugamike uuli aŋanda kumibuzyo iili aansi aapeeji akumubuzya kuti, “Sena kuli nomwakazyingidwe kujatikizya mubuzyo umwi wayeeyi?” Ikuti watondezya luyandisisyo kumubuzyo umwi, amujalule kumincali iili mubbuku iingula mubuzyo ooyo. (Amubone kabbokesi kali apepa lyamukati lyapeeji lino.) Nomulanga-langa makani aantoomwe, mweendelezya ciiyo ca Bbaibbele.

◼ Mulakonzya kubelesya peeji 7 kutondezya mboceendelezyegwa ciiyo ca Bbaibbele:

Amubale mizila yotatwe yakusaanguna iili apeeji, mpoonya amujalule kucibalo 3 akutondezya mboceendelezyegwa ciiyo kubelesya mincali 1-3. Amupange bubambe bwakupilukila kuzoobandika bwiinguzi kumibuzyo iili mumuncali 3.

◼ Mbomukonzya kulibambila kupilukila:

Nomumanizya ciiyo cakusaanguna, amupange bubambe bwakuyoozumanana amubandi. Mulakonzya kwaamba kuti: “Mumaminiti masyoonto buyo, twaiya Bbaibbele ncoliyiisya kukaambo kayandika. Ciindi ciboola, tuyoobandika [amumusiile mubuzyo uutizoolangwe-langwe]. Sena inga ndazoosika aciindi ncimunya eecino nsondo iiboola?”

Mbotuyaabuswenenena kuciindi ncabikkide Jehova, uyoozumanana kupa kuti tuzulile kubeleka mulimo ngotweelede kucita. (Mt. 28:19, 20; 2 Tim. 3:17) Atucibelesye kabotu cibelesyo eeci cibotu kapati ikutalisya ziiyo zya Bbaibbele.

Mbolikonzya Kwaabilwa Bbuku lya Bbaibbele Ncoliyiisya

Pepa eeli lyamukati lijisi nzila ziindene-indene zyambuli mbolikonzya kwaabilwa bbuku lya Bbaibbele Ncoliyiisya. Kutegwa muzwidilile kapati, amuzyaambe mumajwi eenu, amucince ntalisyo yenu kweelana abantu bamucilawo momubelekela, alimwi amutuzyibile twaambo tugaminina tuli mubbuku tukonzya kubelesyegwa kutalisya mubandi wamu Bbaibbele. Nzila zimwi zigwasya mucilawo momubelekela zilakonzya kubelesyegwa azyalo.—Amubone Mulimo Wesu wa Bwami wa January 2005, peeji 8.

Harmagedoni

◼ Bantu nobamvwa bbala lya ‘Harmagedoni,’ banji bayeeya kuti nkujaigwa kwabantu banji aciindi comwe. Sena inga camugambya kuzyiba kuti Harmagedoni ncintu ncotukonzya kulangila katukkomene? [Amulindile bwiinguzi. Mpoonya mubale Ciyubunuzyo 16:14, 16.] Amubone kaambo aaka kaamba ibuumi mbobuyooba yaakumana Harmagedoni.” Amujalule kumapeeji 82-84 akubala muncali 21.

Bbaibbele

◼ “Bantu baamba Bbaibbele kuti ndi Jwi lya Leza. Sena kuli nomwakazyingidwe kuti mbuti bbuku lyakalembwa abantu mbolikonzya kweelela kwiitwa kuti ndi Jwi lya Leza? [Amulindile bwiinguzi. Mpoonya mubale 2 Petro 1:21 alimwi amuncali 5 uuli amapeeji 19-20.] Bbuku eeli lilapa bwiinguzi bwamu Bbaibbele kumibuzyo eeyi.” Amubatondezye mibuzyo iili apeeji 6.

◼ “Mazubaano bantu balakonzya kumvwa akujana twaambo tunji kwiinda mbocakabede kaindi. Pele ino muyeeya kuti nkuli nkotukonzya kujana lulayo lugwasya lukonzya kutusololela kubuumi bubotu alimwi bukkomanisya? [Amulindile bwiinguzi. Mpoonya mubale 2 Timoteo 3:16, 17 alimwi amuncali 12 uuli amapeeji 22-23.] Bbuku eeli lilapandulula mbotukonzya kupona buumi bukkomanisya Leza alimwi bukonzya kutugwasya.” Amubatondezye ccaati alimwi acifwanikiso zili amapeeji 122-123.

Lufwu/Bubuke

◼ “Bantu banji balakatazyigwa kuzyiba cini-cini cicitika muntu afwa. Sena muyeeya kuti inga twacikonzya kuzyiba? [Amulindile bwiinguzi. Mpoonya mubale Mukambausi 9:5 alimwi amincali 5-6 iili apeeji 58.] Alimwi bbuku eeli lilapandulula cisyomezyo camu Bbaibbele cabubuke mbociyoobajatikizya aabo ibafwide.” Amubatondezye cifwanikiso cili apeeji 75.

◼ “Ciindi muyandwa wesu naafwa, tacigambyi pe kuyanda kumubona alimwi muntu ooyo. Sena tabusyi oobu? [Amulindile bwiinguzi.] Bantu banji bajana luumbulizyo mucisyomezyo camu Bbaibbele cabubuke. [Amubale Johane 5:28, 29 alimwi amincali 16-17 iili apeeji 72.] Alimwi cibalo eeci cilayiingula mibuzyo eeyi.” Amubatondezye mibuzyo yantalisyo iili apeeji 66.

Buumi Butamani

◼ “Bantu banji balayanda kuba abuumi bubotu alimwi bulamfwu. Pele kuti nocali kukonzyeka, sena inga mwayanda kupona kukabe kutamani? [Amundile bwiinguzi. Mpoonya mubale Ciyubunuzyo 21:3, 4 alimwi amuncali 17 uuli amapeeji 53-4.] Bbuku eeli lilabandika mbotukonzya kuba abuumi butamani alimwi abuumi mbobuyooba cisyomezyo eeco caakuzuzikizyigwa.”

Mukwasyi

◼ “Toonse tulayandisya kuba abuumi bwamumukwasyi bukkomanisya. Sena tabusyi oobu? [Amulindile bwiinguzi.] Ibbaibbele lyaamba cintu cimwi muntu oonse mumukwasyi ncakonzya kucita kutegwa buumi bwamumukwasyi kabukkomanisya—kwiiya Leza kwiinda mukuba aluyando.” Amubale Ba-Efeso 5:1, 2 alimwi amuncali 4 uuli apeeji 135.

Maanda

◼ “Mumasena manji, kujana busena bubotu bwakukkala caba cintu cikatazya kapati. Sena muyeeya kuti kuli ciindi nokuyooba maanda manji kubantu boonse? [Amulindile bwiinguzi. Mpoonya mubale Isaya 65:21, 22 alimwi amuncali 20 uuli apeeji 34.] Bbuku eeli lilapandulula mbuli cisyomezyo eeci cizwa kuli Leza mbociyoozuzikizyigwa.”

Jehova Leza

◼ “Bantu banji basyoma muli Leza inga bayanda kuba acilongwe anguwe. Sena mulizyi kuti Bbaibbele lilatutamba kuti tube acilongwe anguwe? [Amulindile bwiinguzi. Mpoonya mubale Jakobo 4:8a alimwi amuncali 20 uuli apeeji 16.] Bbuku eeli lyakabambilwa kugwasya bantu kwiiya zinji kujatikizya Leza kababelesya Bbaibbele lyabo beni.” Amubatondezye mibuzyo yantalisyo iili apeeji 8.

◼ “Bantu banji bakombela zina lya Leza kuti lisalazyigwe, naa lilemekwe. Sena kuli nomwakazyingidwe kuti ndizina nzi eelyo? [Amulindile bwiinguzi. Mpoonya mubale Intembauzyo 83:18 alimwi amincali 2-3 iili apeeji 195.] Bbuku eeli lilapandulula cini-cini Bbaibbele ncoliyiisya kujatikizya Jehova Leza alimwi amakanze aakwe aajatikizya bantu.”

Jesu Kristo

◼ “Ibantu munyika kuli ncobazyi kujatikizya Jesu Kristo. Bamwi baamba kuti wakali muntu buyo uusumpukide. Bamwi balamukomba kali Leza Singuzuzyoonse. Sena muyeeya kuti nzyotusyoma kujatikizya Jesu Kristo zilayandika kapati?” Amulindile bwiinguzi. Mpoonya mubale Johane 17:3 alimwi amuncali 3 uuli amapeeji 37-38. Amumugamike kumibuzyo yantalisyo iili aansi aamutwe wacibalo.

Mupailo

◼ “Sena kuli nomwakazyingidwe kujatikizya Leza mbwaingula mipailo? [Amulindile bwiinguzi. Mpoonya mubale 1 Johane 5:14, 15 alimwi amincali 16-18 iili amapeeji 170-172.] Alimwi cibalo eeci cilapandulula ikaambo ncotweelede kupaila kuli Leza alimwi ancotweelede kucita kutegwa atumvwe.”

Cikombelo

◼ “Bantu banji batalika kubona zikombele zyamunyika kuti nzyezyileta mapenzi aacitikila bantu kutali kuti nkokuzwa lugwasyo. Sena muyeeya kuti cikombelo cili mukusololela bantu munzila iiluzi? [Amulindile bwiinguzi. Mpoonya mubale Matayo 7:13, 14 alimwi amuncali 5 uuli amapeeji 145-146.] Cibalo eeci cilanga-langa zibeela zili cisambomwe zyaamba cikombelo eeco Leza ncazumina.” Amubatondezye twaambo tundandamikidwe apeeji 147.

Ntenda/Kupenga

◼ “Ciindi ntenda naa penzi nolicitika, banji baladoneeka kuti naa Leza ulabalanganya ncobeni bantu alimwi naa ulakubona kupenga kwabo. Sena kuli nomwakazyingidwe kujatikizya ceeci? [Amulindile bwiinguzi. Mpoonya mubale 1 Petro 5:7 alimwi amuncali 11 uuli apeeji 11.] Bbuku eeli lilapandulula oobo Leza mbwayakwaamaninalyo mapenzi aacitikila bantu.” Amubatondezye mibuzyo yantalisyo iili apeeji 106.

Nkondo/Luumuno

◼ “Bantu boonse balalulombozya luumuno. Sena muyeeya kuti bulangizi bwaluumuno anyika nciloto buyo? [Amulindile bwiinguzi. Mpoonya mubale Intembauzyo 46:8, 9.] Bbuku eeli lilapandulula Leza mbwayoozuzikizya makanze aakwe akuleta luumuno munyika yoonse.” Amubatondezye cifwanikiso cili apeeji 35, akulanga-langa mincali 17-21 iili amapeeji 34-36.

[Kabbokesi kali apeeji 5]

Nzila Mbotukonzya Kwaamba Bubambe Bwakusanga

“Ikuti kamuyanda kupa cakusanga nociceya kumulimo wesu wanyika yoonse, ndilacitambula amaanza obile.”

“Nokuba kuti mabbuku eesu alaabilwa kakutakwe muulo, tulatambula kufwumbwa cakusanga ncomujisi kumulimo wesu wanyika yoonse.”

“Mulakonzya kuzyingwa mbotuubeleka mulimo ooyu. Nkaambo kakuti mulimo wesu wanyika yoonse ulagwasyilizyigwa kwiinda mukusanga kwakuliyandila. Ikuti kamuyanda kupa cakusanga sunu nociceya, inga ndacitambula amaanza obile.”

(1) Mubuzyo, (2) Lugwalo, Alimwi (3) Cibalo

Nzila nguba-uba yakwaabila bbuku lya Ino Ncinzi Cini Bbaibbele Ncoliyiisya? njeeyi: (1) amubuzye mubuzyo kutegwa muzyibe mbwayeeya muntu, (2) amubale lugwalo lweelede, alimwi (3) amwaambe cibalo cili mubbuku cibandika kaambo aako kwiinda mukubala mibuzyo yantalisyo iili aansi aamutwe wacibalo. Ikuti uuli aŋanda watondezya luyandisisyo, mulakonzya kumutondezya mboceendelezyegwa ciiyo ca Bbaibbele kubelesya mincali yakusaanguna yacibalo eeco. Ntalisyo eeyi ilakonzya kubelesyegwa kutalisya ciiyo mukuswaya kwakusaanguna naa nomupilukila.

◼ “Sena muyeeya kuti inga cakonzyeka kubantu balya maila kumuzyiba Mulengi wesu singuzuzyoonse, mbuli mbokwaambidwe aawa mu Bbaibbele?” Amubale Incito 17:26, 27 akulindila bwiinguzi. Mpoonya amubandike cibalo 1.

◼ “Sena muyeeya kuti inga cakonzyeka kujana luumbulizyo alimwi abulangizi kumapenzi ngotucitikilwa mazubaano zyalo zyaambidwe waawa?” Amubale Ba-Roma 15:4 akulindila bwiinguzi. Mpoonya amubandike cibalo 2.

◼ “Ikuti nomwalijisi nguzu zyakucita boobu, sena inga mwazicinca zintu eezi?” Amubale Ciyubunuzyo 21:4 akulindila bwiinguzi. Mpoonya amubandike cibalo 3.

◼ “Sena muyeeya kuti bana besu baya kujanika zyaakucitika zintu zyaambwa waawa?” Amubale Intembauzyo 37:10, 11 akulindila bwiinguzi. Mpoonya amubandike cibalo 3.

◼ “Sena muyeeya kuti kuli buzuba imajwi aaya naayoozuzikizyigwa?” Amubale Isaya 33:24 akulindila bwiinguzi. Mpoonya amubandike cibalo 3.

◼ “Sena kuli nomwakazyingidwe kuti naa bafwide balizyizyi nzyobacita baumi?” Amulindile bwiinguzi. Mpoonya amubale Mukambausi 9:5 akubandika cibalo 6.

◼ “Sena muyeeya kuti bumwi buzuba tuyoobabona alimwi bayandwa besu bafwide mbubwenya mbwaakaamba Jesu mutupango ootu?” Amubale Johane 5:28, 29 akulindila bwiinguzi. Mpoonya amubandike cibalo 7.

◼ “Mukuyeeya kwanu, mbuti mbocinga cakonzyeka kuti luyando lwa Leza lucitwe ansi ano mbubonya mbuli kujulu, mbubwenya mbokwaambidwe mumupailo ooyu uuzyibidwe kapati?” Amubale Matayo 6:9, 10 akulindila bwiinguzi. Mpoonya amubandike cibalo 8.

◼ “Sena muyeeya kuti tupona muciindi caambidwe mubusinsimi oobu?” Amubale 2 Timoteo 3:1-4 akulindila bwiinguzi. Mpoonya amubandike cibalo 9.

◼ “Bantu banji balazyingwa kujatikizya mapenzi aabacitikila ncaalibonya kuti ayabwiindila buya. Sena kuli nomwakabulanga-langa bupanduluzi bwaambidwe mukapango aaka kuti bulakonzyeka?” Amubale Ciyubunuzyo 12:9 akulindila bwiinguzi. Mpoonya mubandike cibalo 10.

◼ “Sena kuli nomwakali kuyanda kuzyiba bwiinguzi kumubuzyo uuli mbuli yooyu?” Amubale Jobu 21:7 akulindila bwiinguzi. Mpoonya mubandike cibalo 11.

◼ “Sena muyeeya kuti kubelesya lulayo oolu luzwa mu Bbaibbele inga kwabagwasya bantu kuba abuumi bukkomanisya mumukwasyi?” Amubale Ba-Efeso 5:33 akulindila bwiinguzi. Mpoonya mubandike cibalo 14.

Ciiyo ca Bbaibbele cilakonzya kulipootwa noceendelezyegwa kwaziindi zyobile kuzwa ciindi bubambe bwaciiyo nobwakacitwa alimwi ikuti kakuli kaambo kasinizya kuti ciiyo cilazumanana.