CIIYO 8

Amucikake Cikombelo Cakubeja; Akutobela Cikombelo Cakasimpe

1. Ino nkusala kuli buti bantu nkobeelede kucita sunu kujatikizya kukomba?

JESU wakaamba kuti: “Oyo nguntali awe ulandilwisya.” (Matayo 12:30) Aboobo tweelede kuba kulubazu lomwe, nkokuti kuli Jehova naa kuli Saatani. Ibantu banji bayeeya kuti bakomba Leza munzila njayanda, pele Bbaibbele lyaamba kuti Saatani uli “[mukubeena] bantu boonse baansi.” (Ciyubunuzyo 12:9) Ituulunzuma twabantu basyoma kuti balamukomba Leza, pele mubwini babelekela Diabolosi Saatani! Ibantu sunu beelede kusala: Ikubelekela Jehova ‘Leza wakasimpe’ naa Saatani “wisi wababeja.”—Intembauzyo 31:5; Johane 8:44.

Amuzwe mu Cikombelo Cakubeja

2. Ino ninzila nzi yomwe Saatani njabelesya kusola kulesya bantu kuti bakombe Jehova?

² Ikusala kubelekela Jehova nkokusala cabusongo ikupa kukkomaninwa a Leza. Pele Saatani takkomani amuntu uuli woonse uubelekela Leza pe; ulaleta mapenzi alimwi abuyumuyumu kulibaabo bacita boobo. Inzila imwi njabelesya mukucita boobo nkwiinda mukusampaulwa naa kukazyigwa kuzwa kuli bamwi, kubeenzuma alimwi abanamukwasyi buya. Jesu wakacenjezya kuti: “Nkabela basiŋanda bamuntu mwini mbibazooba basinkondonyina.”—Matayo 10:36.

3. Ncinzi ncomuyoocita ikuti banamukwasyi alimwi abalongwe kabamukazya kujatikizya kukomba Leza?

³ Ino muyootyani kuti cintu cili boobu camucitikila? Ibantu banji balizi buya kuti bukombi bwabo tabuluzi pe, nokuba boobo tabatoli ntaamu cakufwambaana kuti bazwe mubukombi oobu. Bayeeya kuti kucita boobo kutondezya kutasyomeka kumukwasyi wabo. Sena kuyeeya boobo kuli kabotu? Ikuti naa mwabona kuti banamukwasyi babelesya misamu iikola, sena tamukonzyi kubacenjezya kuti iyakubanyonyoona? Tamukonzyi kubatobela mukubelesya misamu eeyo, tabusi na?

4. Ino ncinzi Joshua ncaakabaambila bana Israyeli kujatikizya kukomba mumazubaakwe?

⁴ Joshua wakakulwaizya bana Israyeli ikusiya bukombi bulubide alimwi aziyanza zyabamawisi babo. Wakaamba kuti: “Lino amumuyoowe Jehova akumumanina milimo cakululama acakusinizya. Amusowe mizimu imbi bamauso njibakamanina milimo mutala lyamulonga amucisi ca-Egepita, mumanine Jehova milimo.” (Joshua 24:14) Joshua wakali kusyomeka kuli Leza, aboobo Jehova wakamulongezya. Ikuti katusyomeka kuli Jehova, aswebo mbubonya uyootulongezya.—2 Samuele 22:26.

Njiisyo Zyabukombi—Zyakasimpe Alimwi Azyakubeja

Butatu: Zikombelo zinji ziyiisya kuti Leza uli mu Butatu. Baamba kuti “Taata ngu Leza, Mwana [Jesu] ngu Leza, alimwi akuti Muuya Uusalala ngu Leza, nokuba boobo tabali ba Leza botatwe pe, pele ngu Leza omwe.”

Ibbala lya “Butatu” talijaniki buya mu Bbaibbele alimwi Bbaibbele taliyiisyi kuti Jehova ngumwi wabantu botatwe pe. Jehova alikke ngo Leza. Ibbuku lya 1 Ba-Korinto 8:6 lyaamba kuti: “Kulindiswe kuli Leza omwe buyo, Taateesu.” Jehova ngo Mupatikampatila. Jesu tali Leza pe, pele “Mwana wa-Leza.” (1 Johane 4:15) Mbubwenya buyo, muuya uusalala tali Leza pe. Muuya uusalala tali muntu pe. Ninguzu nzyabelesya Leza.—Incito 1:8; Ba-Efeso 5:18.
Buumi: Zikombelo zinji ziyiisya kuti, Buumi ncintu cimwi cili mukati kamuntu citafwi. Ibbaibbele liyiisya kuti buumi ngo muntu, aboobo muntu ulakonzya kufwa.—Matalikilo 2:7; Ezekieli 18:4.
Mulilo Wahelo: Zikombelo zyakubeja ziyiisya kuti, buumi bwabantu basizibi bulapenzyegwa muhelo mane kukabe kutamani. Ibbaibbele lyaamba kuti, bafwide “tabezi cintu niciba comwe.” (Mukambausi 9:5) Alimwi Bbaibbele liyiisya kuti, “Leza nduluyando.” (1 Johane 4:8) Jehova, Leza siluyando, taakwe nanga wapenzya bamwi bantu amulilo. Ino Bbaibbele liyiisya nzi kujatikizya Butatu, Buumi alimwi a Mulilo Wahelo?

Kabbokesi: Ncinzi Bbaibbele ncoliyiisya kujatikizya Butatu, buumi alimwi amulilo wahelo?

Amuzisowe Zintu Zibelesyegwa Mukukomba Kwakubeja

Mukaintu uumpa zintu zyakwe zyamasalamuzi

5. Nkaambo nzi ncotweelede kuzinyonyoona zintu zyamasalamuzi?

⁵ Alimwi ikuzwa mucikombelo cakubeja cimwi ncicaamba ncakuti tweelede kuzinyonyoona kufwumba zintu zyamasalamuzi nzyotujisi mbuli misamu yakulicingilila, zitumwa, inweenwe alimwi ankaya zyamasalamuzi azimwi zili boobu. Kucita boobo kulayandika kapati nkaambo tutondezya kuti tubikka lusyomo lwesu loonse muli Jehova.

6. Ino Banakristo bakusaanguna bakaacita buti mabbuku aabo aamasalamuzi?

⁶ Amubone ncobakacita Banakristo bamwi bakusaanguna nobakasala kutobela cikombelo cakasimpe. Ibbaibbele lyaamba kuti: “Banjibanji abakali basonzi bakabungika mabbuku aabo, bakaatenta kumbele lyabo boonse.”—Incito 19:19.

7. Ino ncinzi ncotukonzya kucita ikuti madaimona atalika kutupenzya?

⁷ Ibamwi ibatalika kubelekela Jehova ibakali kulowa naa bakali kucita zintu zyamasalamuzi balakonzya kupenzyegwa amadaimona. Ikuti cili boobu camucitikila, amupaile cakupozya kamubelesya zina lya Jehova. Walo uyoomugwasya.—Tusimpi 18:10; Jakobo 4:7.

8. Ino Banakristo bailanga buti mituni, zitondezyo alimwi azifwanikiso zibelesyegwa mubukombi bwakubeja?

⁸ Aabo bayanda kubelekela Jehova tabeelede kubamba naa kubelesya kufwumbwa mutuni naa cifwanikiso cibelesyegwa cikombelo cakubeja. Banakristo bakasimpe ‘nkuulusyomo nkubeenda, takweensi kukubona pe.’ (2 Ba-Korinto 5:7) Balautobela kapati mulawo wa Leza uukasya kubelesya zitondezyo mukukomba.—Kulonga 20:4, 5.

Amuyanzane Abantu ba Jehova

Banyina amwanaabo musimbi babamba cakulya antoomwe

9. Ndulayo luli buti Bbaibbele ndolipa kujatikizya makani aakuba muntu musongo?

⁹ Ibbaibbele lyaamba kuti: “Uuenda abasongo ulasongwaala.” (Tusimpi 13:20) Ikuti katuyanda kusongwaala, tweelede kweenda alimwi akuyanzana a Bakamboni ba Jehova. Mbabantu bali mukweenda munzila iisololela kubuumi butamani.—Matayo 7:14.

10. Mbuti Bakamboni ba Jehova mbobakonzya kumugwasya kubelekela Leza?

¹⁰ Masimpe, Bakamboni balabalanganya kabotu bantu. Imulimo wabo ngwakugwasya bantu babombe myoyo kuteelela kasimpe kamu Bbaibbele kasololela kubuumi butamani. Balakonzya kumugwasya kwiinda mukwiiya Bbaibbele andinywe kamutabbadeli. Bayooyingula mibuzyo yanu alimwi akumutondezya mbomukonzya kubelesya luzibo lwamu Bbaibbele mubuumi bwanu.—Johane 17:3.

11. Ino miswaangano ya Bunakristo iyoomugwasya buti?

¹¹ Kanjikanji kumiswaangano yabo njobacitila ku Ŋanda ya Bwami, muyooyiya zinji kujatikizya nzila zya Jehova. Muyookulwaizyigwa kubaa luyando lwakutobela cikombelo cakasimpe. Alimwi muyooyiisigwa mbomunga mwagwasya bamwi kwiiya kasimpe kamu Bbaibbele.—Ba-Hebrayo 10:24, 25.

Muswaangano wambungano ku Ŋanda ya Bwami

12. Mbuti mupailo mboukonzya kumugwasya kubelekela Leza?

¹² Mbomuyaabwiiya zinji kujatikizya luyando lwa Jehova alimwi amakanzaakwe, cakutadooneka kuteelela kwanu alimwi ambomuzyilumbaizya inzila zyakwe zyaluyando kuyooyaambele. Alimwi mweelede kuluyungizya luyando lwanu lwakucita zintu zimubotela Leza akutacita zyeezyo zimunyemya. Kamuyeeya kuti mulakonzya kumusikila Jehova mumupailo akumulomba kutegwa amugwasye kucita zintu ziluleme akutantamuka micito mibyaabi.—1 Ba-Korinto 6:9, 10; Ba-Filipi 4:6.

Banamukwasyi babala Bbaibbele antoomwe — Mbuti mbomunga mwabutobela bukombi bwakasimpe?

13. Mbuti mbomunga mwamukkomanisya Jehova?

¹³ Mukuya kwaciindi, mbomuya bukomena munzila yakumuuya, cakutadooneka muyoobona mbociyandika kuba Kamboni wa Jehova uulyaabide alimwi akubbapatizigwa. Kwiinda mukuba aakati kabantu ba Jehova, muyoopa kuti moyo wa Jehova ubotelwe. (Tusimpi 27:11) Muyooba akati kabantu bakkomene aabo Leza mbaamba kuti: “Nzookala akuya bweendeenda akati kabo, nzooba Leza wabo, abalo bazooba bantu bangu.”—2 Ba-Korinto 6:16.

Ndakaanguluka Kuzwa Kumadaimona

Buzuba bumwi imasiku notwakalede abalumi bangu, ndakamvwa ijwi kaliita zina lyangu iziindi zyotatwe. Mpoonya ndakabona ciluli cavwumbuka, eelyo cintu cili mbuli bbola cakali kuyaka mulilo cakawida ada lyangu. Pele, balumi bangu taakwe nociba comwe ncibakabona pe. Nokuba boobo, ndakali kumvwa kupya kapati kwamyezi minji yakatobela.

Nokwainda myezi iili cisambomwi, ijwi lyakandiita alimwi. Ndilyona, ŋanda yoonse yakalibonya mbuli kuti ibbide mumaanzi manji. Mpoonya kwakazwa muceka mumaanzi akutalika kumyokamyoka kujanza lyangu. Ndakasoleka kuti ndimugwisye pele ndakaalilwa. Ndakayoowa kapati. Kuzwawaawo maanzi alimwi anzoka zyakazimaana mpoonya ndakasowelwa ansi kuzwa abulo. Ndakayuminina kwamawoola ali mbwaabede. Mpoonya jwi lyakandaambila kuti ndipiluke kumunzi kutempele lyamizimo kwakali kusilikilwa. Nondakabuzya izina lyadaimona, ndakaambilwa zina lyakali kupandulula kuti “silubono pele kakutakwe mwana.” Daimona eeli lyakandisyomezya lubono lunji kwiinda mukundipa nguzu zyakusilika.

Ibantu balwazi bakali kuboola kulindime kuzwa mumasena aali munsi-munsi alimwi ayaayo aali kule. Kabacili kulaale aŋanda yangu, bakali kulibonya mucimbonimboni cangu cilibedelede. Mpoonya mbwaasikila buyo umwi, twakali kuumana mumaanza, aboobo bulwazi mbwajisi naa penzi antoomwe amusamu wakali kuyandika mukusilika zyakali kuyubununwa kulindime mpoonya-mpoonya. Alimwi daimona lyakali kundaambila mweelwe wamali bantu ngobakeelede kubbaddela.

Mali alimwi azipego zyakali kuboola akaambo kakucizyiba kusilika. Ndakaba “silubono,” pele alimwi ndakazyiba ncocakali kwaamba “kutabaa mwana.” Kufwumbwa ndazyala mwana, imupati ngubatobelana amumvanda wakali kufwa. Eeci cakali kutyompya kapati. Kwamyaka iili 12 njondakabelekela daimona eeli, ndakafwidwa ibana bali cisambomwi.

Ndakatalika kupaila kuli Leza kutegwa andigwasye. Ndakapaila camoyo woonse. Bumwi buzuba Bakamboni ba Jehova bakakonkomona amulyango wangu. Nokuba kuti lyoonse ndakali kubatanda, buzuba oobo ndakayeeya kuti ndiswiilile. Mumubandi wakatobela, ndakazoozyiba kuti ndakali kubelekela daimona! Aboobo ndakasala kuleka micito yamizimu.

Nondakazyibya daimona eeli kumakani aaya, lyakandicenjezya kujatikizya ntaamu njendakali kuyanda kubweza. Nokuba boobo, ndakaamba kuti: “Ndaleka kuba mulongwe wako.”

Ndakazyuumpa zintu zyoonse nzyondakali kubelesya mukusonda. Ndakayiya Bbaibbele a Bakamboni ba Jehova, akuba mubelesi wa Jehova alimwi akubbapatizigwa mu 1973. Lino ndijisi bana bosanwe bayumu nta. Awalo mulumaangu wakazooba Kamboni uubbapatizidwe.—Ikuluula kwa Josephine Ikezu.

Kabbokesi: Mbuti umwi mukaintu mbwaakalyaangulula kuzwa kumadaimona?