Makani Aantalisyo

Nomuyandwa Basikubala:

Sena mulimvwa kuti mulijisi cilongwe a Leza? Kubanabunji eeco cilibonya kuti tacikonzyeki abuniini pe. Ibamwi balimvwa kuti Leza ulisumpukide kapati; bambi balimvwa kuti tabeelede naaceya kuba acilongwe anguwe. Nokuba boobo, Ibbaibbele caluyando litukulwaizya kuti: “Amuswene kuli Leza, eelyo awalo ulaswena kulindinywe.” (Jakobo 4:8) Alimwi mane usyomezya bakombi bakwe kuti: “Mebo nde Jehova Leza wako, ndilikujatide kujanza lyako lyalulyo, ndendime Yooyo uukwaambila kuti, ‘Utayoowi pe. Mebo ndilakugwasya.’”​—Isaya 41:13.

Ino inga twaba buti acilongwe cili boobo a Leza? Mucilongwe cimwi acimwi ncotupanga, icaanzyo cacilongwe eeco ciyeeme akuzyiba muntu ooyo ngotupanga limwi cilongwe, alimwi akubikkila maano kubube bubotu mbwajisi. Aboobo, ibube bwa Leza alimwi anzila zyakwe kweelana ambolitondezya Bbaibbele, makani aayandika kapati ngotweelede kwiiya. Kuzinzibala kuyeeya mbwatondezya bube bumwi abumwi mbwajisi Jehova, akubona mbuli mbwaakabutondezya cakulondoka Jesu Kristo alimwi akuzyiba mbotukonzya kuba ambubo kuyootupa kuba acilongwe a Leza. Tuyoobona kuti Jehova ngo Mwami weelela alimwi uuyandika mububumbo boonse. Kunze lyaboobo, ngu Taata uukonzya kutugwasya toonse. Mbwaanga ngusinguzu, uliluleme, musongo alimwi ngusiluyando, kunyina nalekelezya bana bakwe basyomeka.

Ibbuku eeli alimugwasye kuzumanana kuba acilongwe a Jehova Leza, icilongwe citakonzyi kumana ikutegwa kamumutembaula lyoonse mane kukabe kutamani.