Mulalilo wa Mwami—Ncilengwa Cimupa Bulemu Leza

BANAKRISTO balaililwa kucita Ciibalusyo calufwu lwa Kristo. Icilengwa eeci alimwi ciitwa kuti “Mulalilo wa-Mwami.” (1 Ba-Korinto 11:20) Ino ncinzi cipa kuti kauyandika kapati? Ndiilili alimwi mbuti mboweelede kucitwa?

Jesu Kristo wakatalisya cilengwa eeci imasiku mubuzuba bwapobwe lyaba Juda lya Kwiindilila mu 33 C.E. Ipobwe lya Kwiindilila lyakali pobwe lyakali kucitwa ciindi comwe buyo amwaka, mubuzuba bwa 14 bwamwezi waba Juda uutegwa Nisani. Ikutegwa bazyibe buzuba oobo, kulangilwa kuti ba Juda bakali kulindila buzuba ciindi cakumatalikilo kwamupeyo eelyo ibuzuba abusiku nobulampa mawoola aasika ku 12. Imwezi mupya wakusaanguna wakalibonya afwaafwi abuzuba oobo ngaakali matalikilo aamwezi wa Nisani. Ipobwe lya Kwiindilila lyakacitwa nolyabbila izuba nokwakainda mazuba aali 14 kuzwa leelyo.

Jesu wakasekelela pobwe lya Kwiindilila abaapostolo bakwe, wakagusya Judase Iskariote, amane wakatalisya Mulalilo wa Mwami. Mulalilo nguwakanjila mubusena bwapobwe lyaba Juda lya Kwiindilila, aboobo weelede kucitwa buyo ciindi comwe amwaka.

Makani Mabotu ngaakalemba Matayo aamba kuti: “Jesu wakabweza mukamu, walumba, wakomona, waabila basikwiiya, waamba wati, Amubweze, mulye, nkaambo ngooyu mubili wangu. Alimwi wakabweza kanywido walumba, wabaabila, waamba wati, Amunywide mulinkako nyoonse, nkaambo mboobu bulowa bwangu bwamulongo butililwa bantu banji kuti balekelelwe milandu yabo.”—Matayo 26:26-28.

Bamwi bantu basyoma kuti Jesu wakasandula mukamu kuba mubili wakwe wini-wini awaini kuba bulowa bwini. Nokuba boobo, mubili wa Jesu wakacili muumbulu naakaabila mukamu ooyu. Sena baapostolo ba Jesu mubwini bakali kulya nyama yakwe yini akunywa bulowa bwakwe? Peepe, nkaambo eeco nocakaba kulyana alimwi akutyola mulawo wa Leza. (Matalikilo 9:3, 4; Levitiko 17:10) Ikweelana abbuku lya Luka 22:20, Jesu wakati: “Cinywido eci ngomulongo mupya wamubulowa bwangu, ubutikaikila ndinywe.” Sena cinywido eeco cakasanduka akuba “mulongo mupya”? Eeco nocatakakonzyeka pe, mbwaanga mulongo ncizuminano, tacili cintu cini-cini pe.

Aboobo, mukamu alimwi awaini nzitondezyo buyo. Mukamu wiiminina mubili wa Kristo uulondokede. Jesu wakabelesya mukamu wakaceede kucakulya capobwe lya Kwiindilila. Mukamu wakanyina bumena pe. (Kulonga 12:8) Ibbaibbele libelesya bumena kacili citondezyo cacibi naa kubola. Aboobo mukamu wiiminina mubili wa Jesu uulondokede ngwaakatuula. Wakanyina cibi pe.—Matayo 16:11, 12; 1 Ba-Korinto 5:6, 7; 1 Petro 2:22; 1 Johane 2:1, 2.

Waini uusubila wiiminina bulowa bwa Jesu. Ibulowa oobo bupa kuti kacibeleka cizuminano cipya. Jesu wakati ibulowa bwakwe bwakatilwa kutegwa bantu “balekelelwe milandu yabo.” Aboobo bantunsi balakonzya kubonwa kuti balasalala kucibi mumeso aa Leza alimwi inga bakonzya kuba mucizuminano cipya a Jehova. (Ba-Hebrayo 9:14; 10:16, 17) Ooyu mulongo naa cizuminano upa kuti cikonzyeke ku Banakristo basyomeka bali 144,000 kuunka kujulu. Ooko bayoobeleka kabali bami abapaizi kutegwa banamaleya boonse balongezyegwe.—Matalikilo 22:18; Jeremiya 31:31-33; 1 Petro 2:9; Ciyubunuzyo 5:9, 10; 14:1-3.

Ino mbaani ibeelede kulya zitondezyo eezyi zya Ciibalusyo? Cakweelela, balikke ibali mucizuminano cipya—nkokuti aabo ibajisi bulangizi bwakuya kujulu mbabeelede kulya mukamu akunywa waini. Muuya wa Leza uusalala ulabasinizya aaba kuti balisalidwe kuba bami kujulu. (Ba-Roma 8:16) Alimwi bali mucizuminano cijatikizya Bwami a Jesu.—Luka 22:29.

Ino mbuti kujatikizya baabo bajisi bulangizi bwakupona kukabe kutamani mu Paradaiso anyika? Balautobela mulawo wa Jesu alimwi cabulemu balajanika ku Mulalilo wa Mwami, pele balajanika kabali basikulangilila buyo, ikutali batola lubazu mukulya akunywa. Ciindi comwe amwaka lyabbila zuba mu Nisani 14, Bakamboni ba Jehova balacita Mulalilo wa Mwami. Nokuba kuti nzyuulu buyo zisyoonto nyika yoonse zyabaabo baamba kuti bajisi bulangizi bwakuya kujulu, icilengwa eeci cilayandika kapati ku Banakristo boonse. Nciindi boonse nobayeeya cabusungu aluyando lutalikomeneni lwa Jehova Leza alimwi a Jesu Kristo.—Johane 3:16.