Amubagwasye Bantu Kwiiya zya Muntu Mupati
1 Ibantu banji ibakalibala bbuku lyakuti Muntu Mupati Kwiinda Iwakaponede balalumba akaambo kakuti lyabagwasya mubuumi bwabo. Umwi wakalemba kuti: “Nindakamanizya kulibala bbuku eeli, ndakalimvwa mbuli kuti Jesu wanditamba kuti tuyanzane anguwe, tukkale limwi, tupengele antoomwe, ndilimvwe mbwaakali kulimvwa, akutola lubazu mumbazu zyoonse zyamulimo wakwe. . . . Kubala bbuku eeli cili mbuli kweebelela filimu iitondezya buumi bwa Jesu.”
2 Bbuku lya Muntu Mupati lilatugwasya kumuzyiba kabotu Jehova ikutali buyo Jesu. (Joh. 14:9) Mwana umwi uuli amyaka yakuzyalwa iili 12 wakaamba boobu kujatikizya bbuku eeli: “Lyakanduumbulizya cakunga ndakapaila kuli Jehova amisozi yalukkomano mbondakalibalila buyo. Mumoyo, ndakayumizyigwa kuzyiba kuti Jehova a Jesu balatulanganya.” Kweelana ambokulembedwe mulugwalo lwa Johane 17:3, Jesu wakaamba kuti kuzyiba Jehova a Mwanaakwe caamba buumi butamani kulindiswe. Kwiiya bbuku eeli lijatikizya buumi bwa Jesu citupa luzyibo lulibedelede lujatikizya bube bwa Jehova nkaambo Jesu ‘ncikozyanyo cini-cini cambwabede Leza.’—Heb. 1:3.
3 Mabbuku aa Muntu Mupati aainda ku 19 miliyoni akasimbwa mumyaambo iinda ku 70. Eeci citondezya mbobaliyanda kapati bbuku eeli bantu. Bantu banji balalibala bbuku eeli lyoonse mbubalitambwida buyo. Mwaalumi umwi wakajisi luyandisisyo wakamanizya kulibala nikwakainda nsondo zyobilo kuzwa ciindi naakalitambula. Mupati wacikombelo iwakatambula bbuku eeli wakaamba kuti: “Cilandaalila kuleka kulibala bbuku eeli. Mebo abakaintu bangu tulabala cibeela comwe cabbuku eeli masiku katutanoona.”
4 Bukambausi Bwamukwiizya: Mukwesu umwi wakatondezya bbuku lya Muntu Mupati kubantu bakali kubusena ooko nkwaakali kubelekela. Bantu banji bakazyiba kuti wakalijisi bbuku eeli, alimwi bakali kwaambila bamwi twaambo tuli mubbuku eeli. Babelesinyina bakalemba mazyina aabantu boonse bakali kuyanda bbuku eeli. Wakaabila mabbuku aali 461! Bantu bosanwe akati kabaabo bakatambula bbuku eeli bakatalika kwiiya Bbaibbele. Mucizyi umwi naakali kweenda mundeke, wakaabila bbuku lya Muntu Mupati kumupaizi wacikombelo wakali kuunka kuyoojanika kwakali kusalwa umwi wabapaizi bapati. Mupaizi wakakkede kale myaka iili 40 mu Vatican. Toonse tweelede kubelesya coolwe ncotujisi cakwaambila bamwi kujatikizya bbuku eeli.
5 Bakubusi Balalikkomanina: Bakubusi balalikkomanina kapati bbuku eeli. Mwana umwi uujisi myaka iili fwuka wakalemba kuti: “Bbuku ndendiyandisya kapati ndya Muntu Mupati Kwiinda Iwakaponede nkaambo kuli zyintu zinji nzyondiiya mulindilyo.” Ciindi nituswaanganya bakubusi mumulimo wamumuunda, tweelede kujana ciindi cakubatondezya bbuku eeli bakubusi aaba akwiinduluka twaambo tupati-pati alimwi azifwanikiso kuti naa bazyali babo kababazumizya. Tulakonzya kubaabila mabbuku bana aaba. Ciindi nobapegwa coolwe cakwiiya kujatikizya Jesu, bakubusi mazuba aano balakonzya kwiiya cikozyanyo cakwe. Jesu wakali muntu uusikilika.—Mt. 19:14, 15.
6 Kubala bbuku lya Muntu Mupati kulakonzya kubacinca bantu. Amubagwasye bantu banji kuzyiba ncolyaamba bbuku eeli. Amubelesye kaambo kali kumamanino aapeeji lyamajwi aantalisyo, ansi aakatwe kaamba kuti “Amugwasyigwe Kwiinda Mukwiiya Kujatikizya Nguwe.” Cibeela eeci ciyoobagwasya bantu kubikkila maano kuzyintu nzyobakonzya kujana kwiinda mukubala bbuku eeli. Bantu banji ibali mucilawo canu balakonzya kwaamba mbwaakaamba muntu umwi naakamana kubala bbuku eeli kuti: “Nsinabalide bbuku libotu kwiinda leeli! Lyabucinca buumi bwangu.”