Cibalo 5

Kuzyalwa kwa Jesu—Ikuli Alimwi Lili?

IMULELI wacisi ca Roma, Kaisara Augusto wabikka mulawo wakuti umwi aumwi apilukile kucisi nkwaakazyalilwa akalembwe. Elyo Josefa waunka nkwaakazyalilwa kumunzi wa Betelehemu.

Bantu banji bali mu Betelehemu kukulilembya aboobo busena bulikke mbobanga bajana bwakukkala ba Josefa a Mariya muucaanda cabanyama. Omu mukkala mbongolo abanyama bamwi, mwaazyalilwa Jesu. Mariya wamuzambaila muzisani akumulazika mucilido cabanyama.

Masimpe Kaisara Augusto wakuubamba oyu mulawo wakulilembya kwiinda mukusololelwa a Leza. Eci cakapa kuti cikonzyeke kuti Jesu azyalilwe ku Betelehemu, imunzi wakasinsimwa kaindi mu Magwalo kuti nkwayoozyalilwa muleli uusyomezyedwe.

Elo kaka mbusiku bupati obu! Musokwe kwalibonya mumuni kunkamu yabeembezi. Mbulemu bwa Jehova! Elyo mungelo wa Jehova wabaambila kuti: “Mutayoowi, amulange, ndamuletela makani mabotu aacoolwe cipati iciti be kubantu boonse, nkaambo sunu mwazyalilwa Mufutuli mumunzi wa-Davida, ngu-Kristo Mwami. Eno nceeci citondezyo kulindinywe, muyoojana muvwanda uuzambaidwe masila, ulilede mucilido caŋombe.” Ndilyonya kwalibonya bambi bangelo banji balaimba ategwa: “Akube bulemu kuli-Leza kujulu lyamajulu, aalo ansi akube luumuno kubantu mbakondwa.”

Bacizwa buyo bangelo, beembezi bamvwana ategwa: “Atugame ku-Betelehemu, tukabone nkani eyi mbwiibede, njaatuzibya angelo.” Baunka cakufwambaana baakujana Jesu mpoonya eni-eni mungelo mpaamba kuti bayakumujana. Beembezi nobaamba makani aabaambila mungelo, boonse bamvwa makani ayo bagambwa kapati. Mariya wazibamba zintu zyoonse ezi akuziyeyeesya mumoyo wakwe.

Ibantu banji sunu basyoma kuti Jesu wakazyalwa mu December 25. Pele mwezi wa December ku Betelehemu, nciindi camvula, icitontola. Beembezi tabakonzyi kuti inga kabali musokwe masiku oonse abutanga bwabo aciindi eco camwaka. Alimwi Kaisara waku Roma naatakaambila bantu kuti babweze lweendo kuya kulilembya mumupeyo uli boobu balo bakalibambilide kale kumuzangila. Kuboneka kuti Jesu wakazyalwa kumatalikilo aamupeyo wakulimbabo mumwaka. Luka 2:1-20; Mika 5:2.

▪ Nkaambo nzi Josefa a Mariya ncobaunkila ku Betelehemu?

▪ Ncintu nzi cikkomanisya cacitika mubusiku mbwaazyalwa Jesu?

▪ Tuzi buti kuti Jesu tanaakazyalwa mu December 25?

Cibalo 6

Mwana wa Cisyomezyo

MUCIINDI cakupilukila ku Nazareta, Josefa a Mariya bakkala nkukonya ku Betelehemu. Elyo Jesu naakkwanya mazuba aali lusele wapalulwa mbubwena Mulawo wa Leza mboulailila kuli Musa. Alimwi ncilengwa ikupa zina kumwana musankwa mubuzuba bwa lusele. Aboobo baulika mwanaabo kuti ngu Jesu mbubwena mbwaakalailila mungelo Gabriyeli kumatalikilo.

Mazuba aainda kumwezi omwe ainda, elyo Jesu wabaa mazuba aali 40 aakuzyalwa. Ino bazyali bakwe bamutola kuli lino? Kutempele lyaku Jerusalemu ikulampa buyo makkilomita masyoonto kuzwa nkobakkala. Kweelana a Mulawo wa Leza kuli Musa, kwainda mazuba aali 40 aakuzyalwa kwamwana musankwa, banyina beelede kupa cituulo cakulisalazya kutempele.

Obo mbwaacita Mariya. Waleta tuyuni tucili tuniini tobilo twakuzootuula. Eci ciyubulula cimwi cintu kujatikizya ciimo ca Josefa a Mariya kumakani aalubono. Mulawo wa Musa waamba kuti kabelele keelede kutuulwa nkaambo kalijisi bulemu kalo kwiinda tuyuni. Pele kuti banyina kabatakonzyi kucita obu, inziba zyobile naa nkwilimba zyobile zilakonzya kuzulila.

Mutempele munene umwi wamubweza Jesu mumaanzaakwe. Izina lyakwe ngu Simeoni. Leza wakamuyubunwida makani aakuti takafwi katanamubona Kristo uusyomezyedwe wa Jehova naa Mesiya. Ucisika buyo kutempele Simeoni buzuba obu, wasololelwa amuuya uusalala kumwana uunyamude Josefa a Mariya.

Kumwi Simeoni kamujisi Jesu walumba kuli Leza ategwa: “Osimalelaangu, muleke eno muzike wako, kuti ainke caluumuno, mbuli kwaamba kwako, nkaambo meso aangu abona lufutuko lwako ndookalulamika kubusyu bwabantu boonse, umumuni wakumunikila bamasi, abulemu bwacisi cako ca-Israyeli.”

Josefa a Mariya bagambwa kumvwa makani aya. Mpoonya Simeoni wabalongezya akwaambila Mariya kuti mwanaakwe “wabikilwa kuwa akubuka kwabanjibanji ba-Israyeli” alimwi akuti mause aali mbuli ceba libosya ayooyasa moyo wakwe.

Uumbi uuliko ciindi eci musinsimi mukaintu wazina lya Ana uulaamyaka iili 84. Mane kwiina naakali kubulika mutempele. Aciindi nciconya eco waswena afwaafwi akutalika kulumba Leza akwaamba kujatikizya Jesu kuli boonse bakali kuswiilila.

Elo bazikkomanina kaka ba Josefa balaa Mariya zintu ezi zyacitika kutempele! Masimpe, zyoonse ezi zibatondezya kuti mwana oyu ngonguwe Uusyomezyedwe wa Leza. Luka 2:21-38; Levitiko 12:1-8.

▪ Ndilili nocakali cilengwa cakuulika zina mwana musankwa muna Israyeli?

▪ Ncinzi cakali kuyandika kumutumbu muna Israyeli ciindi mwanaakwe musankwa naakali amazuba aali 40 aakuzyalwa, alimwi ino kuzuzikizya kwaceelelo eci kuyubulula buti ciimo ca Mariya kumakani aalubono?

▪ Mbaani bamuziba Jesu aciindi awa, alimwi batondezya buti?