Cibalo 7

Jesu Abalinguzi Banyenyeezi

BAALUMI bali mbobabede baboola kuzwa Kujwe. Aaba mbalinguzi banyenyeezi—ibantu balitaminina kukonzya kupandulula mbozikkede nyenyeezi. Kabacili kwabo Kujwe bakabona nyenyeezi mpya elyo bakaitobela kwamyaanda yamakkilomita kusika ku Jerusalemu.

Bacisika buyo ku Jerusalemu, aba balinguzi banyenyeezi babuzya kuti: “Uli kuli uuzyedwe mwami waba-Juda? nkaambo twakabona inyenyeezi yakwe kujwe, tweza kumukomba.”

Mwami Heroda naamvwa makani aya ku Jerusalemu, wanyema kapati. Aboobo waita bapaizi bapati akubabuzya nkwayoozyalilwa Kristo. Kabaingula kweelana azili mu Magwalo balaamba: “Mu-Betelehemu.” Lino Heroda wabaita balinguzi banyenyeezi akubaambila kuti: “Kamuya mukayandaule kabotu mwana, nkabela mwaakumujana muzoondaambile, kuti nze ambebo kukumukomba.” Pele masimpe ngakuti, Heroda ncayandila kumujana mwana nkuti amujaye!

Mbubazwida buyo, kwacitika cintu cikankamanisya. Inyenyeezi njobabwene Kujwe yaendela kumbele lyabo. Cilalibonya kabotu-kabotu kuti eyi taili nyenyeezi buyo pele yapedwa kuti ibasololele. Aba balinguzi banyenyeezi baitobela kusikila mane yaima ajulu lyaŋanda aakkala Josefa a Mariya.

Nobanjila muŋanda balinguzi banyenyeezi, bajana Mariya amwanaakwe musyoonto, Jesu. Bacibona boobo boonse bafwugama akumukomba. Mpoona mumabbeeke aabo bagwisya zipego zyangolida atununkilizyo twakuumpilila atwakunana. Kumane boobo, nobayanda kunyamuka kuti bapilukile kuyooambila Heroda ikuli mwana, Leza wabacenjezya muciloto kuti bataciti obo. Aboobo babweeda kulimbabo anzila imbi.

Nguni ngomuyeeya kuti ngowakapa nyenyeezi eyo yakali mujulu ikusololela balinguzi? Amuyeeye kuti nyenyeezi teeyakabasololela kuli Jesu ku Betelehemu mpoonya-mpoonya pe. Pele yakabasololela ku Jerusalemu nkubakaakujana Mwami Heroda walo wakali kuyanda kujaya Jesu. Alimwi naakacita obo kuti Leza naatakanjilila akucenjezya balinguzi kuti batamwaambili Heroda ikwakali Jesu. Wakali sinkondonyina wa Leza, Saatani Diabolosi walo wakali kuyanda kuti Jesu ajaigwe elyo wakabelesya nyenyeezi ikusola kuzuzikizya makanze akwe. Matayo 2:1-12; Mika 5:2.

▪ Ncinzi citondezya kuti inyenyeezi njobakabona balinguzi teeyakali nyenyeezi buyo?

▪ Nkuuli nkwabede Jesu ciindi nobamujana balinguzi banyenyeezi?

▪ Nkaambo nzi ncotuzi kuti Sataani nguwakapa nyenyeezi kuti isololele balinguzi abo?

Cibalo 8

Ikuloboka Kumuleli Mubyaabi

JOSEFA wabusya Mariya kutegwa amwaambile makani aabindeene. Mungelo wa Jehova wazwaa kulibonya kuli nguwe kaamba kuti: “Buka, tola mwana abanyina, uloboke uye ku-Egepita, ukakale nkuko mane nkakwaambile, nkaambo kakuti Heroda ulayandaula mwana kuti amujaye.”

Cakufwambaana aba botatwe baloboka. Alimwi bafwutukila kulunenu nkaambo Heroda waziba kuti ibalinguzi banyenyeezi bamweena elyo bazwa kale mucisi. Amuyeeye kuti bakeelede kutola makani kulinguwe ciindi nobakamujana Jesu. Heroda wakalala kapati. Elyo mukusola kuti ajaye Jesu, walailila kuti bajaigwe bana balombe boonse baku Betelehemu amasena oonse aaengelede kutalikila bana bamyaka yobilo kuza aansi. Eyi myaka waibalila kweelana amakani ngaakabuzisisya kubalinguzi banyenyeezi bakazwa Kujwe.

Ikujaigwa kwabana basankwa boonse ncintu citakondelezyi kubona! Basilumamba ba Heroda balanjila muŋanda aŋanda. Bajana mwana musankwa, balamuvwukula kuzwa kumaanzaa banyina. Tatuzi naa mbana bongaye mbobajaya pele kulila akweema kupati kwabamanyina kwazuzikizya businsimi bwamu Bbaibbele bwamusinsimi wa Leza, Jeremiya.

Aciindi awa Josefa amukwasyi wakwe beenda kabotu kuya ku Egepita elyo lino nkobakkala. Pele mungelo wa Jehova walibonya alimwi muciloto kuli Josefa masiku. “Buka, tola mwana abanyina, uinke kucisi caba-Israyeli, nkaambo balifwide bakayandaula buumi bwamwana.” Aboobo ikuzuzikizya businsimi abumbi bwamu Bbaibbele bwaamba kuti Mwanaa Leza uyooitwa kuzwa mu Egepita, mukwasyi wapilukila kucisi cokwabo.

Kulibonya kuti Josefa uyanda kukkala ku Judaya nkobakali kukkala mumunzi wa Betelehemu kabatana tija kuya ku Egepita. Pele wamvwa kuti Arkelao mwana wa Heroda mubyaabi lino ngomwami wa Judaya, mpoonya muciloto cimbi Jehova wamucenjezya kujatikizya ntenda. Aboobo Josefa amukwasyi wakwe beenda kugama kunyika akuyakukkala mumunzi wa Nazareta ku Galilaya. Mubusena obu, ikulamfwu kuzwa kucisiko cabuumi bwabukombi bwaci Juda, nkwaakomenena Jesu. Matayo 2:13-23; Jeremiya 31:15; Hosea 11:1.

▪ Nobatajoka balinguzi banyenyeezi, ncintu nzi cibyaabi ncacita Mwami Heroda, pele Jesu wakwabililwa buti?

▪ Mukupiluka kuzwa ku Egepita, nkaambo nzi ncaatakkalila mu Betelehemu alimwi Josefa?

▪ Mbusinsimi nzi bwamu Bbaibbele ibuzuzikizigwa muciindi eci?