Cibalo 9

Ibuumi bwa Jesu Kubwana

ICIINDI Jesu nacikomena mu Nazareta, mmunzi musyoonto uutakwe ankuuya. Uli mumalundu aabusena bwiitwa kuti Galilaya, takuli kulamfwu pe kuzwa Kugundu libotu lya Jezreeli.

Kalaa myaka iitandila kwiibili yakuzyalwa, Jesu bamuleta kubusena obu kuzwa ku Egepita ba Josefa a Mariya alimwi ngomwana alikke ngwajisi Mariya. Pele kutali kwaciindi cilamfwu. Mukuya kwaciindi, Jakobo, Josefa, Simoni alimwi a Juda bazyalwa elyo Josefa a Mariya baba bazyali babana basimbi abasankwa. Mpoonya Jesu wabaa banabakwabo basankwa a basimbi ibataleli kucisambomwi.

Jesu ulijisi abambi basazinyina. Tulimuzi kale Johane imwanaakwabo kuli banyina bambi, ba Elizabeta, uukkala kulaale ku Judaya. Pele uukkala afwaafwi ku Galilaya ngu Salome walo uulibonya kuti mmwanaakwabo Mariya. Salome ukwetwe kuli Zebedayo elyo bana babo basankwa bobile ba Jakobo a Johane mu Chitonga mbanyinaa Jesu. Tatuzi naa mukukomena kwakwe Jesu ulasobana abaaba basankwa, pele kumbele bazyooba balongwe beni-beni.

Josefa weelede kubeleka caguzu ikugwasya mukwasyi wakwe uuyabukomena. Mmubezi. Josefa wamukomenzya Jesu mbuli mwanaakwe wakulizyalila elyo Jesu wiitwa kuti “mwana wamubezi.” Josefa wamuyiisya Jesu kuba mubezi awalo alimwi waiya kabotu. Nkakaambo kaako kumbele ibantu baamba Jesu kuti “Sa oyu engwe mubezi?”

Ibamukwasyi wa Josefa mbakombi ba Jehova Leza. Ikutegwa beendelane a Mulawo wa Leza, Josefa a Mariya balailila bana babo zyakumuuya, ‘ciindi nobakkala muŋanda, ciindi nobeenda munzila, ciindi noboona aciindi nobabuka.’ Kuli cikombelo ku Nazareta elyo tulakonzya kusyoma kuti Josefa ulautola mukwasyi wakwe lyoonse kukukomba. Pele kakunyina kudooneka, balakkomana kapati anyendo zyalyoonse-lyoonse kuya kutempele lya Jehova ku Jerusalemu. Matayo 13:55, 56; 27:56; Marko 15:40; 6:3; Deuteronomo 6:6-9.

▪ Basika kubungaye basyoonto ba Jesu basankwa abasimbi, alimwi mbaani mazina bamwi?

▪ Mbaani basazinyinaa Jesu basankwa botatwe ibazibidwe?

▪ Mulimo nzi wakumubili ngwacita Jesu, alimwi nkaambo nzi?

▪ Mmalailile nzi aayandika Josefa ngapa mukwasyi wakwe?

Cibalo 10

Nyendo Zyakuya ku Jerusalemu

ICILIMO casika. Alimwi casika ciindi cakuti mukwasyi wa Josefa antoomwe abeenzinyina abasizinyina baye mulweendo ndobacita cilimo mwakaa mwaka kuya ku Jerusalemu kupobwe lya Kwiindilila. Nobanyamuka mulweendo olu lulampa makkilomita aatandila ku 100 balikkomene kapati mbuli lyoonse. Jesu ulaa myaka iili 12 lino alimwi ulalilangila kapati pobwe eli.

Kuli Jesu amukwasyi wakwe, pobwe lya Kwiindilila tacili cintu cabuzuba bomwe buyo pe. Balakkala akujanika ku Pobwe Lyamukamu Uutakwe Mimena lyamazuba aali ciloba lyalo ndyobalanga kuti ncibeela capobwe lya Kwiindilila. Nkakaambo kaako lweendo loonse kuzwa kumunzi nkobazwa ku Nazareta kubikkilizya aciindi ncobakkala mu Jerusalemu, kumana nsondo zyobile. Pele uno mwaka, akaambo kakuti kuli cimwi cimujatikizya Jesu, lwatola ciindi cilamfwu.

Ipenzi lyazibilwa munzila akupiluka kuzwa ku Jerusalemu. Josefa a Mariya bayeeya kuti Jesu uyaabweendela antoomwe ankamu yabasazinyina abeenzinyina. Pele talibonyi nobalyookezya masiku kuti baone elyo baunka kuyabumuyandaula muli basilweendonyina. Tako pe. Aboobo Josefa a Mariya bapilukila alimwi ku Jerusalemu kuya kumuyandaula.

Bamuyandaula buzuba boonse pele tabamujani. Abuzuba bwabili mbubonya. Limwi buzuba bwatatu baunka kutempele. Mucibeela cimwi catempele bamubona Jesu ulikkede akati kabamayi bama Juda ulaswiilila akubabuzya mibuzyo.

Mariya wabuzya ategwa, “Mwanaangu, nkaambonzi ino ncootucitila obuya? Bona, uso amebo twali kukulangaula akukatazigwa.”

Jesu wagambwa kuti tiibalikuzi kwakumujana. Wababuzya ategwa, “Ino kai mundiyandawidanzi? Sena tamuzi kuti ndileelede kuba muŋanda ya-Taata?”

Jesu camwaalila kuteelela ncobatakonzyi kuciziba bazyali bakwe ncaamba. Elyo, Jesu wainka abazyali bakwe kumunzi alimwi wazumanana kubamvwida. Uyabukomena mubusongo aciimo alimwi ulayandwa kapati a Leza alimwi abantu. Inzya, kuzwa kubwana bwakwe, Jesu wapa citondezyo cibotu kutali buyo mukuyandaula zyakumuuya kusaanguna pele amukulemeka bazyali bakwe. Luka 2:40-52; 22:7.

▪ Ndweendo nzi ndwacita Jesu amukwasyi wakwe lyoonse cilimo, alimwi lutola ciindi cilamfwu buti?

▪ Ncinzi cacitika mulweendo lwacitwa Jesu kalaa myaka iili 12?

▪ Ncikonzyanyo nzi ncapa Jesu kubakubusi?