Cibalo 13

Ikwiiya Kuzwa Kumasunko aa Jesu

MBWAAMANINA buyo kubbapatizigwa, Jesu wasololelwa amuuya wa Leza kuya munkanda yaku Judaya. Ujisi zinji zyakuyeeya nkaambo aciindi calubbapatizyo lwakwe, “kujulu kwakajaluka” aboobo wakayeeya zintu zyakujulu. Masimpe nzinji nzyaelede kunzinzibala kuyeeya!

Jesu watola mazuba amasiku aali 40 munkanda alimwi muciindi eci kunyina ncalya. Mpoonya ciindi Jesu naafwa nzala kapati, Diabolosi wamusikila kuti amusunke ulaamba: “Kuti koli Mwana a-Leza ambila mabwe aya, abe insima.” Pele Jesu ulizi kuti cililubide ikubelesya nguzu zyakwe kucita maleele kutegwa alikkomanisye mwini. Aboobo wakaka koongelezyegwa.

Pele Diabolosi tatyompwi pe. Wasoleka imbi nzila. Wamwaambila Jesu kuti aliwaale kuzwa ansonje yaciluli catempele kutegwa bangelo ba Leza bamukwabe. Pele Jesu taasola kucita cintu cili boobu. Kazubulula kuzwa mu Magwalo Jesu watondezya kuti cililubide kusunka Leza munzila iili boobu.

Mumusunko watatu, Diabolosi watondezya Jesu zisi zyoonse zyaanyika munzila imwi yamaleele akwaamba kuti: “Ezi zyoonse ndakupa, kuti wafugama akundikomba.” Pele alimwi Jesu wakaka kutolelezyegwa amasunko akubisya, wasala kuzumanana kusyomeka kuli Leza.

Tulakonzya kwiiya kuzwa kumasunko aa Jesu aya. Mucikozyanyo, alatondezya kuti Diabolosi tacili ciimo buyo cabubi mbuli bantu bamwi mbobaamba pele kuti mmuntu wini uutalibonyi. Alimwi masunko aa Jesu atondezya kuti mfwulumende zyanyika zyoonse nzizya Diabolosi. Nkaambo ino kuzyaaba kwa Diabolosi kuli Kristo nowakaba buti musunko wini-wini nozyatakali zyakwe?

Alimwi amuyeeye kaambo aka: Diabolosi wakaamba kuti wakali libambilide kulumbula Jesu kuti wafwugama akumukomba ciindi comwe buyo, nokuba kumupa zisi zyoonse zyamunyika. Diabolosi ulakonzya kutusunka munzila iikozyanya antela kwiinda mukututondezya zyoolwe mbotunga twajana lubono, nguzu naa cuuno cabulemu. Pele inga twaba basongo kaka kuti twatobela cikozyanyo ca Jesu cakuzumanana kusyomeka kuli Leza kufwumbwa nouba musunko uuli buti! Matayo 3:16; 4:1-11; Marko 1:12, 13; Luka 4:1-13.

▪ Nzintu nzi Jesu zyalangilwa kuti zyazinzibala kuyeeya mumazuba aali 40 ngaakali munkanda?

▪ Muunzila nzi Diabolosi njaasola kumusunka Jesu?

▪ Ncinzi ncotukonzya kwiiya kuzwa kumasunko aa Jesu?

Cibalo 14

Basikwiiya ba Jesu Bataanzi

NOKWAINDA mazuba aali 40 kali munkanda, Jesu wapilukila kuli Johane iwakamubbapatizya. Mbwazaabuza afwaafwi, Johane watondeka kulinguwe akwaambila baabo baliko kuti: “Amubone, Mwanaambelele wa-Leza, uugwisya cibi cenyika. Ngonguwe oyo ngwendakali kwaamba kuti, Munsi lyangu uleza muntu uuli kumbele lyangu, nkaambo ngomutaanzi kulindime.” Nokuba kuti Johane mmupati kumunyina Jesu, Johane ulizi kuti Jesu wakaliwo kale kali muntu wamuuya kujulu.

Pele, nsondo zisyoonto buyo zyainda, ciindi Jesu naakaboola kuti azikubbapatizigwe, Johane tanaakazi kuti Jesu nguyooba Mesiya. Johane wazumina ategwa: “Eno nsendali kumuzi, pele kuti ayubululwe kuli-Israyeli, ncendakazida kuzoobapatizya amaanzi.”

Johane wazumanana kupanduluda baswiilizi bakwe icakacitika naakali kubbapatizya Jesu ategwa: “Ndakabona Muuya ulaseluka, uli mbuli nziba iizwa kujulu, wakakala alinguwe. Nsendali kumuzi, pele oyo uwakandituma kuyoobapatizya amaanzi, walo wakandaambila kuti, Oyo ngoyoobona kuti Muuya waseluka alinguwe akumukala, ngonguwe uubapatizya a-Muuya Uusalala. Eno ndakabona, ndakalungulula kuti oyu ngo-Mwana a-Leza.”

Mpoonya buzuba butobela Johane uliimvwi abasikwiiya bakwe bobile. Alimwi Jesu nazaabuza ulaamba: “Amulange. Mwanaambelele wa-Leza.” Nobamvwa boobo basikwiiya ba Johane Mubbapatizi aba bobile, bamuccilila Jesu. Umwi wabaaba bobile ngu Andreya elyo umwi kuboneka kuti muntu nguwenya wakalemba zintu ezi wakali kwiitwa kuti Johane. Oyu Johane awalo munyina Jesu, mmwanaa Salome mwanaakwabo Mariya.

Naacebuka, wabona Andreya a Johane kabamuccilila, Jesu wababuzya kuti: “Muyandaulanzi?”

Bamubuzya kuti: “Rabi, ukala kuli?”

Jesu waingula ategwa, “Amuboole muzoobone.”

Iciindi citandila kuma 16 hours kumazuba elyo Andreya a Johane bakkala a Jesu buzuba boonse obo. Nkabela Andreya wakkomana kapati cakuti wafwambaana kuti ajane mwanookwabo wazina lya Petro. Wamwaambila kuti, “Twamujana Mesiya.” Elyo wamutola Petro kuli Jesu. Antela aciindi mpoonya Johane wajana mwanaakwabo Jakobo akumuleta kuli Jesu; pele Johane waasotoka makani aamujatikizya mukulemba kwakwe kwa Makani Mabotu.

Bucica, Jesu wajana Filipo waku Betsaida, mumunzi mumwena muzwa Adreya a Petro. Wamutamba ategwa: “Ndicilila.”

Mpoonya Filipo wajana Natanayeli nguwena uutegwa Bartolomayo wati: “Twamujana muntu Mozesi ngwaakalemba mumabbuku aamilawo, ngonguwenya uulembedwe amumabbuku aabasinsimi, ngu Jesu waku Nazaleta, mwanaa Josefa.” (BT) Natanayeli wadooneka. Wabuzya kuti: “Sena kuli cintu cibotu icikonzya kuzwa mu-Nazareta?”

Filipo wamukulwaizya ategwa: “Koboola uzoobone.” Mbubazya bweenda kuboola kuli Jesu, walo Jesu waamba boobu kujatikizya Natanayeli: “Amubone, mu-Israyeli mwinimwini uutakwe luuni.”

Natanayeli wabuzya kuti: “Ino wandiziba buti?”

Jesu waingula ategwa: “Katana kukwiita Filipo, ndakubona ucili kunsi abukuyu.”

Natanayeli wagambwa. Ulaamba: “Rabi, [nkokwaamba kuti mwiiyi] nduwe Mwana a-Leza, nduwe Mwami wa-Israyeli.”

Jesu wabuzya kuti: “Sena mbwendaamba kuti ndakubona ucili kunsi abukuyu, ncowasyoma na? Uzoobona zimbi zintu zipati iziinda ezi.” Mpoonya wasyomezya kuti: “Ncobeni ndamwaambila kuti, Muyoobona ijulu lyaba bukwazi, abaangelo ba-Leza balatanta akuseluka a-Mwana a-Muntu.”

Elyo mbukwaindila buyo kaindi Jesu antoomwe abaciiya bakwe bapya, bazwa kugundu lya Jordano akuunka ku Galilaya. Johane 1:29-51.

▪ Mbaani basikwiiya ba Jesu bataanzi?

▪ Ino Petro antela a Jakobo bazibwa buti kuli Jesu?

▪ Ncinzi capa kuti Natanayeli asyome kuti Jesu Mwanaa Leza?