Cibalo 15

Maleele aa Jesu Aakusaanguna

KWIINDIDE buyo buzuba bomwe naa obile kuzwa ciindi nobakaba basikwiiya ba Jesu bataanzi ba Andreya, Petro, Johane, Filipo, Natanayeli antela a Jakobo. Lino aba bali mulweendo kuya kumunzi ku Galilaya nkobazwa boonse. Ikwini nkobaya nkuu Kana, ikuzwa Natanayeli imunzi uuli mumalundu ikutali kule kuzwa ku Nazareta kwakakomenena Jesu. Batambwa kupobwe lyabwiinga ku Kana.

Abalo banyina Jesu baboola kubwiinga. Mbwaanga mulongwe wamukwasyi wabaabo bakwatana, Mariya uboneka kuti ujisi bubi kweendelezya zintu ziyandika kubeenzu. Aboobo wafwambaana kubona kuti kuli camana, calo ncaambila Jesu ategwa: “Tabajisi waini.”

Iciindi Mariya naasendekezya boobo kukulwaizya kuti Jesu agwasye akaambo kakuti waini wamana, Jesu walengaana kukusaanguna. Wabuzya ategwa: “Yoo mwanakazi, ndili enzi ayebo?” Mbuli mbwali Mwami uusalidwe wa Leza, tayelede kwaambilwa buya kucita mulimo wakwe abanamukwasyi na balongwe. Aboobo, cabusongo Mariya wazisiya zyoonse mumaanzaa mwanaakwe akwaambila basimilimo kuti: “Zyoonse nzyati mwaambile, kamuzicita.”

Eno kuli matalo aamabwe aali cisambomwi, lomwe likonzya kuyumuna magaloni aali kkumi. Jesu walailila basimilimo ategwa: “Amwaazuzye maanzi matalo.” Nkabela batila mulingawo azula mwa. Mpoona Jesu ulaamba: “Amuteke eno, mutole kulisimwaaba kulya.”

Simwaaba kulya wakkomana kapati akaambo kakubota kwawaini katazi kuti wapangwa kwiinda mumaleele. Wamwiita sikukwata akwaamba kuti: “Bantu boonse balatalika kubika waini mubotu, banywa mubotu bantu nokugwisigwa mubi, yebo pe, wakalimuyobwede waini mubotu mane eno.”

Aya ngamaleele aakusaanguna Jesu ngaacita, aboobo nobabona boobo basikwiiya bakwe bapya, lusyomo lwabo lwayumizigwa. Kumane, walo abanyina abanabakwabo basankwa, beenda kuya ku Kapernauma kufwaafwi a Lwizi lwa Galilaya. Johane 2:1-12.

▪ Ndilili mukati kamulimo wa Jesu nolyacitika pobwe lyabwiinga ku Kana?

▪ Nkaambo nzi Jesu ncaakaka kukulwaizigwaa banyina?

▪ Mmaleele nzi ngaacita Jesu alimwi abajatikizya buti bamwi?

Cibalo 16

Busungu Kukukomba Jehova

IBANABAKWABO Jesu bamwi—ibana ba Mariya—mbaa Jakobo, Josefa, Simoni alimwi a Juda. Boonse aba kabatana endelaamwi a Jesu abasikwiiya bakwe kuya ku Kapernauma, imunzi uuli munsi a Lwizi lwa Galilaya, ambweni baleya kumunzi wabo ku Nazareta kutegwa mukwasyi ubweze zintu nzyobayooyandika.

Pele nkaambo nzi Jesu ncaunka ku Kapernauma muciindi cakuya buyo ambele amulimo wakwe mu Kana, mu Nazareta naa mumasena amwi buyo mumalundu aaku Galilaya? Nkaambo kakuti munzi wa Kapernauma ukkede abusena buli kabotu alimwi munzi mupati. Alimwi bunji bwabasikwiiya ba Jesu bapya bakkala nkuko naa munsi-munsi aku Kapernauma, aboobo tabakasiyi maandaabo kuya kukuyiisigwa anguwe.

Mukati kaciindi ncakkede mu Kapernauma, Jesu wacita milimo mibotu mbubwena mbwaakaamba mwini myezi yakatobela. Pele mukaindi, Jesu abalongwe bakwe bali mulweendo alimwi. Ncilimo elyo bali mulweendo kuya ku Jerusalemu kuya kujanika ku pobwe lya Kwiindilila lyamu 30 C.E. Kabacili kokuya, basikwiiya bakwe kuli ncobabona kujatikizya Jesu ambweni ncobatanabwene pe.

Kweelanaa Mulawo wa Leza, ibana Israyeli beleede kucita zipaizyo zyabanyama. Aboobo kutegwa eci cuubaube basimakwebo mu Jerusalemu balauzya banyama naa bayuni akaambo kamulimo nguwena oyu. Pele bauzizya mukati mwini mutempele alimwi bacenga bantu kwiinda mukuyanda mali manji kwiinda aaelede.

Akaambo kakukalala kapati, Jesu woosa ciswepu caloozi akubatandila anze basikuuzya. Wamwaya mali aabasikucincana akutingamuna matafule aabo. Waambila baabo bauzya nziba ategwa: “Amuzigwisye ezi zintu, mutiiciti ŋanda ya-Taata kuti ibe ŋanda yamakwebo.”

Bazikubone boobu basikwiiya ba Jesu, bayeeya businsimi bujatikizya Mwanaa Leza bwakuti: “Busungu bwakuŋanda yako bwandilya kundimaninina.” Pele ba Juda babuzya ategwa: “Ncili citondezyo ncoti tutondezye, oocita izili bobuya?” Jesu wakaingula ategwa: “Amumwaye ntempele ino, ndiyooiyakulula kumazuba otatwe.”

Iba Juda bayeeya kuti Jesu waamba tempele lini aboobo babuzya ategwa: “Myaaka iili makumi one amusanu muumwi ndeyakayakwa ntempele, anu yebo uiyakulule kumazuba otatwe sena?” Pele, Jesu waamba tempele lyamubili wakwe. Aboobo nokwakainda myaka yotatwe, basikwiiya bakwe bakayeeya kaambo kakwe aka ciindi naakabusigwa kuzwa kubafwu. Johane 2:12-22; Matayo 13:55; Luka 4:23.

▪ Nolyamana pobwe lyabwiinga ku Kana, nkuumasena nzi Jesu nkwaunka?

▪ Nkaambo nzi Jesu ncaakalala alimwi ncinzi ncaacita?

▪ Ncinzi ncobayeeya basikwiiya ba Jesu nobabona micito yakwe?

▪ Ncinzi ncaamba Jesu kujatikizya “tempele ino,” alimwi upandulula nzi?