Cibalo 23

Aambi Maleele mu Kapernauma

MUBUZUBA bwa Sabata ibwatobela kuzwa ciindi Jesu naakaita basikwiiya bakwe bone bataanzi—Petro, Andreya, Jakobo a Johane—boonse baunka kucikombelo cokwabo mu Kapernauma. Okuya Jesu watalika kuyiisya elyo bantu bakankamana nkaambo wabayiisya mbuli sibwami ikutali mbuli balembi pe.

Mubuzuba obu bwa Sabata, kuli muntu umwi uunjidwe daimona. Nokwainda kaindi woonzomoka ajwi pati ategwa: “Ino makaninzi ngutujisi ayebo, Jesu omuna-Nazareta? Sa weza kuzootumanizya? Ndikuzi mbobede, nduwe Musalali wa-Leza.”

Daimona weendelezya muntu oyu ngumwi wabangele ba Saatani. Kakalalila daimona, Jesu ulaamba: “Umuna, uzwe mumuntu oyu.”

Mpoonya daimona wamusuntusya muntu oyu akoongolola ajwi pati. Pele wazwa mumuntu oyu kakunyina akumucisa. Boonse bagambwa! Babuzya balaamba: “Ino ncinzi eci? . . . Ulalailila abadaimona, abalo balamvwa.” Impuwo yamakani aya yamwaika mumasi oonse aaengelede.

Nobazwa mucikombelo, Jesu abasikwiiya bakwe baunka kuŋanda ya Simoni naa Petro. Okuya baakujana banyinazyala Petro mbalwazi, mubili kaupya kapati. Bamulomba ategwa, ‘kobagwasya twakomba.’ Aboobo Jesu waunka nkubalede, wabajata kujanza akubabusya. Mpoonya-mpoonya bapona batalika akubamba cakulya!

Mpoonya mangolezya bantu kuzwa mucisi coonse batalika kuboola kuŋanda ya Petro abalwazi babo. Nkabela munzi woonse wabungana amulyango! Elyo Jesu wabaponya boonse baciswa malwazi aandeene-andeene. Alimwi watanda abadaimona. Nobazwa badaimona aba mbatanda balaamba: “Yebo uli Mwana a-Leza.” Pele Jesu wabakalalila alimwi taabazumizya kwaamba nkaambo balimuzi kuti ngo Kristo. Marko 1:21-34; Luka 4:31-41; Matayo 8:14-17.

▪ Ncinzi cacitika mucikombelo mubuzuba bwa Sabata bwatobela kuzwa ciindi Jesu naakaita basikwiiya bakwe bone?

▪ Naazwa mucikombelo Jesu nkuli nkwaaunka, alimwi mmaleele nzi ngaacita oko?

▪ Ncinzi cacitika kumangolezya buzuba mbweenoobo?

Cibalo 24

Ncaakaboolela Anyika Jesu

IBUZUBA mbwaakkala Jesu abasikwiiya bakwe bone mu Kapernauma bwali bwamilimo, kumamanino bantu bamu Kapernauma baleta balwazi babo boonse kuti basilikwe kumangolezya. Kwanyina ciindi cakuliiba.

Lino nkuubucedo buzuba butobela. Kakucisiya Jesu wabuka, wazwa alikke. Wainka kubusena buliibide kuyookomba kuli Usyi. Pele kuliiba kwa Jesu nkwaciindi buyo cisyoonto nkaambo Petro abamwi-bamwi baziba kuti tako, baunka kuya bumuyandaula.

Nobamujana Jesu, Petro ulaamba: “Bantu boonse balayandula nduwe.” Ibantu baku Kapernauma bayanda kuti Jesu akkale ambabo. Balumba kapati kuzintu nzyaabacitila! Pele sena Jesu wakaboolela buyo kuzyoocita maleele aakuponya aali boobu anyika? Waamba nzi walo kujatikizya makani aya?

Kweelana amakani amwi aamu Bbaibbele, Jesu wabaingula basikwiiya bakwe ategwa: “Katuya kumbi kuminzi iiswaangene, kuti nkakambauke oko akwalo, nkaambo nciceeco ncendazida.” Nokuba kuti bantu bakulwaizya Jesu kuti akkale, wabaambila kuti: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.”

Masimpe, Jesu ncaakaboolela anyika kapati nkuzyookambauka kujatikizya Bwami bwa Leza bwalo buyoosalazya zina lya Usyi akwaamanizyila limwi mapenzi oonse aabantu. Nokuba boobo ikutondezya kuti wakatumwa a Leza, Jesu ulasilika camaleele. Munzila njiyonya, Musa, myaanda yamyaka minji yakainda, wakacita maleele ikutondezya kuti wakali mubelesi wa Leza.

Lino Jesu naazwa mu Kapernauma akuyookambauka muminzi imbi, basikwiiya bakwe bone baunka anguwe. Aaba bone mbaa Petro amunyina Andreya alimwi a Johane amunyina Jakobo. Mulayeeya kuti insondo yomwe buyo yainda, bakatambwa kuti babe basikweenda limwi a Jesu bataanzi.

Ilweendo lwa Jesu lwakukambauka mu Galilaya antoomwe abasikwiiya bakwe lwazwidilila kapati! Mane mpuwo yamilimo yakwe yamvwigwa amu Suriya yoonse. Makamu-makamu aabantu bazwa ku Galilaya, Judaya alimwi amutala lya Mulonga wa Jordano bamutobela Jesu abasikwiiya bakwe. Marko 1:35-39; Luka 4:42, 43; Matayo 4:23-25; Kulonga 4:1-9, 30, 31.

▪ Ncinzi cacitika cifwumofwumo nobwainda buzuba mbwaakajisi bubi Jesu mu Kapernauma?

▪ Ncinzi ncaakatuminwa anyika Jesu, alimwi maleele akwe abeleka mulimo nzi?

▪ Mbaani baunkaa Jesu mulweendo lwakwe lwakukambauka ku Galilaya, alimwi yazwidilila buti milimo ya Jesu?