Cibalo 25

Ikumufwida Luzyalo Sicinsenda

JESU abasikwiiya bakwe bone nobaswaya minzi ya Galilaya, impuwo ya milimo mibotu njacita yamvwigwa mucooko eco coonse. Ijwi lyamilimo yakwe lyasika kumunzi umwi kukkala muntu uuciswa cinsenda. Imusilisi Luka umupandulula kuti wakali “ecinsenda mubili woonse.” Ikuti nocikomena cilwazi eci cibyaabi, cilalemeka zizyo zyamubili aasyoonto-syoonto. Aboobo oyu sicinsenda uli muciimo ceetezya kapati.

Jesu naasika mumunzi, oyu sicinsenda wasika kuli nguwe. Kweelana a Mulawo wa Leza, sicinsenda weelede kucenjezya kaamba kuti, “Nsisalali, nsisalali.” ikukwabilila bambi kuti batabooli munsi lyakwe akuyambukilwa. Sicinsenda lino wavwundama akumulomba Jesu ategwa: “Omwami, na wayanda ulakonzya kundisalazya.”

Elo ulaa lusyomo kaka muntu oyu muli Jesu! Pele uleelede kuti uleetezya mbuli mbwalibonya akaambo kacilwazi eci! Ino Jesu ulacita buti? Ino nywebo inga mwacita buti? Akaambo kakumumvwida luzyalo, Jesu watambika janza lyakwe akujata muntu oyu kaamba kuti: “Ndayanda, usalale.” Mpoonya-mpoonya cinsenda camana kulinguwe.

Sena inga mwayanda muntu ulaa luzyalo boobu kuti abe mwami wanu? Inzila njaalanganya sicinsenda oyu Jesu itupa lusyomo lwakuti ciindi ca bulelo Bwakwe mu Bwami, ibusinsimi bwamu Bbaibbele buyoozuzikizigwa bwakuti: “Bacete abatengwana ulabafwida luzyalo; buumi bwabacete ulabufutula.” Inzya, mpoonya Jesu uyoozuzikizya ncayandisya kucita, ikugwasya boonse bapengede.

Nociba ciindi katana ponya sicinsenda, mulimo wa Jesu walaa mpuwo kapati akati kabantu. Ikuzuzikizya businsimi bwa Isaya, Jesu lino waambila muntu oyu waponesyegwa kuti: “Utaambili muntu.” Mpoonya wamulailila kuti: “Koya, ukalitondezye kumupaizi, ukatuulile kusalazigwa kwako mbubonya mbwaakalailila Musa, kuti cibe citondezyo kulimbabo.”

Pele muntu oyu wakkomana kapati cakuti takonzyi kwaaumuna buyo maleele aya. Waunka uyabwaambilizya makani koonse-koonse, calo capa kuti kube mpuwo kapati akati kabantu cakuti Jesu tacicikonzyi pe kunjila mumunzi caantangalala. Aboobo Jesu wakkala kulaale aminzi ikutakkali bantu, elyo bantu kuzwa kumabazu aandeene-andeene baboola kuzyoomuswiilila akusilikwa zilwazi zyabo. Luka 5:12-16; Marko 1:40-45; Matayo 8:2-4; Bapaizi 13:45, BT; Levitiko 14:10-13; Intembauzyo 72:13; Isaya 42:1, 2.

▪ Mbunyonyoosi buli buti cinsenda mbocijisi, alimwi nkucenjezya nzi sicinsenda nkwaakeelede kupa?

▪ Ino sicinsenda wamulomba buti Jesu, alimwi ncinzi ncotukonzya kwiiya twabona mbwaacita Jesu?

▪ Ino oyu muntu waponesyegwa waalilwa buti kumvwida Jesu, aboobo ncinzi cacitika?

Cibalo 26

Wapiluka Kumunzi ku Kapernauma

LINO mpuwo ya Jesu yasika kulamfwu-lamfwu alimwi bantu banji baleenda mumasena aakulaale nkwabede. Nokuba boobo nokwainda mazuba, wapilukila ku Kapernauma munsi lya Lwizi lwa Galilaya. Ndilyona makani amvwigwa mumunzi oonse aakuti wajoka kumunzi, elyo banji baboola kuŋanda nkwabede. Iba Farisi abamayi ba Mulawo baboola kuzwa mumasena aakulamfwu mbuli ku Jerusalemu.

Inkamu nimpati kapati cakuti kumulyango kwiina aaindwa alimwi mukati amwalo kucinyina busena pe bwakuti bamwi banjile. Omu momuciimo imuticikitikile cintu cikankamanisya ncobeni. Icicitika aciindi awa ncintu cipati nkaambo citugwasya kuziba kuti Jesu ulijisi nguzu zyakugwisya ntalisyo yamapenzi aabantu alimwi akupa buumi bubotu kuli baabo boonse mbaasala.

Kaciyiisya makamu aaya Jesu, baalumi bone baleta muntu uuyuminide mubili kuŋanda eyi abulo. Bayanda kuti Jesu amuponye pele akaambo kakuvwula kwabantu bakakilwa kunjila mukati. Elo batyompwa kaka! Pele tabajoki munsi pe. Batanta atalaa ciluli akucidonkola mpoonya balengelezya bulo aalede muntu uuyuminide mubili munsi-munsi aali Jesu.

Sena Jesu wanyema akaambo kakukosokezyegwa oku? Peepe! Pele wakkomana kapati akaambo kalusyomo lwabo. Waambila yooyo uuyuminide mubili ategwa: “Walekelelwa zibi zyako.” Pele sena Jesu ulakonzya kulekelela zibi? Tabusi mbobayeeya pe obo balembi aba Farisi. Batalika kulibuzya-buzya mumyoyo yabo ategwa: “Nkaambonzi oyu muntu ncaamba boobo? Ulasampaula Leza. Nguni uukonzya kulekelela zibi, pele Leza alike?”

Kazi kuti mbobayeeya obo Jesu wabaambila kuti: “Ino mulikopelanzi boobo mumyoyo yanu? Icuuba ncili, sa nkwaambila uuyuminide mubili kuti, Walekelelwa zibi zyako, nanka kuti, Buka, bweza bulo bwako, enda.”

Mpoonya Jesu watondezya nkamu eyo antoomwe abaabo bamukazya icitondezyo cakuti ulijisi nguzu zyakulekelela zibi anyika alimwi akuti masimpe ngomuntu mupati wakaponede. Walanga kuliyooyo uuyuminide mubili wamwaambila wati: “Webo, ndakwaambila kuti, Buka, bweza bulo bwako, uye kuŋanda yako.” Elyo wacita obo ndilyona, weenda abulo bwakwe kabeebelela boonse! Kabagambidwe kapati bantu, batembaula Leza bati: “Tatuna kabwene kali bobuya”!

Sena mwabona kuti Jesu waamba zibi kuti zilaa mboziswaangene amalwazi alimwi akuti kulekelelwa kwazibi kuliswaangene akujana buumi bubotu bwakumubili? Ibbaibbele lilapandulula kuti muzyali wesu wakusaanguna Adamu, wakabisya alimwi akuti toonse twakona mapenzi aaletwaa cibi mbuli kuciswa akufwa. Pele mubulelo bwa Bwami bwa Leza, Jesu uyoolekelela zibi zyabaabo boonse bamuyanda Leza akumubelekela mpoonya kuciswa kuyoogwisigwa. Elo ciyoobota kaka eco! Marko 2:1-12; Luka 5:17-26; Matayo 9:1-8; Ba-Roma 5:12, 17-19.

▪ Muuciimo nzi mwakacitikila cintu cikankamanisya ncobeni?

▪ Ino muntu uuyuminide mubili wakasika buti kuli Jesu?

▪ Nkaambo nzi ncotuli basizibi toonse, pele Jesu wakapa buti bulangizi bwakuti kulekelelwa kwa zibi alimwi abuumi bulondokede zilakonzyeka?