Cibalo 44

Kuumuzya Guwo Liyoosya

IBUZUBA bwa Jesu bwazwide milimo kubikkilizyaa kuyiisya makamu aabantu kunkomwe mpoonya akupanduluda basikwiiya bakwe kumbali ncozyaamba zikozyanyo. Kumazuba ulaamba: “Atuzubuke mutala.”

Kunkomwe ya Lwizi lwa Galilaya nkwiili kujwe nkukuli busena bwiitwa kuti Dekapole lisanduludwe kubbala lya Cigiliki lyakuti deʹka, lyaamba “kkumi” alyakuti poʹlis, lyaamba “munzi.” Iminzi yamu Dekapole momuzwide zilengwa zya Cigiliki nokuba kuti kakunyina akudooneka ngomunzi waba Juda banji. Nokuba boobo mulimo wa Jesu mubusena obu tauzwidilide kapati pe. Alwalo lweendo olu mbuli mbotutii bone kumbele, camwaalila kukkala ciindi cilamfwu.

Jesu naalomba kuti baye mutala, basikwiiya bakwe bamutola mubwato. Ikuunka kwabo kwazibwa. Ndilyonya abambi babweza mato aabo akuunka ambabo. Takuli kule pe mutala. Ilwizi lwa Galilaya nciziba buyo cipati cilampa makkilomita aali 21 alimwi mwida kacili makkilomita aali 12.

Jesu wakatala. Aboobo mbubatalikila buyo kweenda, walo nkulala kusyule lyabwato, wabikka mutwe wakwe acilitulisyo akoona. Bunji bwabaapostolo bakwe balicibwene kweenzya mato nkaambo bakazela kapati mu Lwizi lwa Galilaya. Aboobo mbabeenzya bwato.

Pele olu taluli lweendo luuba-uba pe. Akaambo kakukasaala atalaa lwizi lwalo lulaansi amamita aali 210 kuzwa atalaa lwizi lupati alimwi aluwo lutontola iluli mumalundu aalaafwaafwi, zimwi ziindi kulabbubbula cakuti kulaba guwo ipati kulwizi. Eci ncecacitika lino. Ndilyonya mayuwe atalika kukupila maanzi kubwato cakuti buyanda kubbila. Pele Jesu wazumanana koona!

Basikweenzya mato bacibwene basoleka canguzu kunyonoona bwato. Kunyina kudooneka kuti bakeenda kale muguwo. Pele aciindi awa luzibo lwabo lwabaaba buyo. Akaambo kakuyoowa kufwa, bamubusya Jesu. Balaamba: ‘Mufundisi, sa tokwe makani? Tuyanda kubbila! Tuvwune tulanyikila!’

Naabuka, Jesu waambila guwo alwizi ategwa: “Tontola, uumune wi!” Mpoonya luwo lwaleka kubbubbula alwalo lwizi lwabatama. Kalanga kuli basikwiiya bakwe wabuzya ategwa: ‘Muyoowela nzi boobu? Sena tamujisi lusyomo?’

Bamvwe boobo basikwiiya, bayoowa akuyoowa kupati. Batalika kubuzyanya ategwa: ‘Ino oyu muntu nguni? nkaambo waambila luwo alwizi zyoonse zilamumvwa.’

Elo watondezya nguzu kaka Jesu! Elo cilakkazika moyo kaka kuziba kuti Mwami wesu ulijisi nguzu kuzilegwaleza alimwi akuti ciindi aakutalika kulela nyika yoonse mu Bwami bwakwe, bantu boonse banooliibide akutayoowa ntenda zyazilengwaleza!

Nokwainda ciindi kuzwa guwo nolyaumuna, Jesu abasikwiiya bakwe basika kabotu-kabotu kunkomwe yakujwe. Ambweni mato amwi afwutuka kubbubbula oku kwaguwo akuti apilukila kabotu-kabotu kumunzi. Marko 4:35–5:1; Matayo 8:18, 23-27; Luka 8:22-26.

▪ Ino Dekapole ninzi, alimwi uli kubusena nzi?

▪ Nzintu nzi zipa kuti kube guwo libbubbula ku Lwizi lwa Galilaya?

▪ Nobabona kuti kunyina busongo bwabo bwamato bucibagwasya, ncinzi ncobacita basikwiiya?

Cibalo 45

Sikwiiya Uutalangilwi

ELO NKUYOOSYA cintu ncaabona Jesu naasika kunkomwe! Ibaalumi bobile bayoosya kapati bazwa kunamaumbwe aali aafwaafwi elyo baboola kabazuza kulinguwe. Banjidwe badaimona. Mbwaanga umwi wabo ulalangilwa kuti mmukali kwiinda mweenzinyina alimwi wapenga kwaciindi cilamfwu abadaimona aba, nguwabikkilwa maanu kapati.

Kwaciindi cilamfwu muntu oyu wali kukkala mutundulu akati kazyuumbwe. Masiku amasikati ulalila lyoonse akulitendaula amabwe. Mmukali kapati cakuti kunyina uukonzya kwiinda munzila eeyo. Basoleka kumwaanga pele ulazizutaula nketani akutyolaula nsimbi zyaangidwe kumaulu aakwe. Kunyina uumwiinda nguzu pe.

Mbwayaabuza kuli Jesu akuvwundama kumaulu aakwe, ibadaimona bamweendelezya bamucita kuti akwiile ategwa: “Ino makaninzi ngetujisi mebo ayebo, Jesu omwana a-Leza wakujulu kwini-kwini? Ndalisisya kuli-Leza utandipenzyi.”

Jesu waamba ategwa: “Kozwa mumuntu oyu yebo odaimona uusofweede.” Pele Jesu wabuzya ategwa: “Nduweni izina lyako?”

“Ndime Legione, nkaambo tuli banji,” mbobwiinguzi obo. Badaimona balakkomana babona mbobapenga abo mbobakonzya kunjila, balabotelwa kubavwumpa cabuyoofwu. Pele nobaswaangana a Jesu balomba kuti batasowelwi mumulindi uutagoli. Alimwi awa twabona kuti Jesu wakalijisi nguzu kapati; wakakonzya kuzunda nobaba badaimona bakali. Alimwi eci ciyubulula kuti badaimona balizi kuti ikusowegwa kwabo mumulindi antoomwe amusololi wabo Saatani Diabolosi, nkwayoobacitila Leza kumbele.

Ibutanga bwangulube zitandila ku 2,000 bulacela munsi-munsi kumbali aamulundu. Elyo badaimona balaamba: “Tutume kungulube tunjile mulinzizyo.” Kulibonya kuti badaimona balajana lukkomano lunyongene kwiinda mulunya lwakunjila mibili yazilenge zyanyama. Ciindi Jesu naabazumizya kunjila mungulube, zyoonse zili 2,000 zyazuza kuya kujeleele elyo zyadumpukila mulwizi.

Nobabona boobu beembezi, batijaana kuya kwaamba makani mumunzi amutunzi. Bamvwe boobo bantu baboola kuzikubona cacitika. Nobasika, babona muntu wakanjidwe madaimona. Ulisamide alimwi walilemeka cabuntu, kakkede kumaulu aa Jesu!

Abo balibonena baamba mbuli muntu oyu mbwaaponesyegwa. Baambila bantu alufwu lwangulube lukankamanisya. Ibantu nobamvwa boobu bayoowa kapati elyo batalika kukumbila Jesu kuti azwe mucisi cabo. Aboobo wazumina, wanjila mubwato. Oyu muntu wakagwisigwa daimona walomba Jesu kuti aunke anguwe. Pele Jesu wamwaambila kuti: “Koya kuŋanda yako kubeenzinyoko, ukabalwiide ezyo nzyaakucitila Mwami, ambwaakufwida luzyalo.”

Kanjikanji Jesu ulailila bantu mbaponya kuti bataambili umbi nkaambo tayandi kuti bantu kabaamba zyakwaambaamba akaambo kamakani ngobamvwa buyo. Pele awa aciindi uleelede kutaamba obo nkaambo oyu wakagwisigwa daimona uyoopa bumboni kubantu ambweni Jesu mbatakajanini ciindi cakwaambaula ambabo. Kunze lyaboobo, ikubako kwamuntu oyu kuyoopa bumboni bwakuti Jesu ulijisi nguzu zyakubeleka milimo mibotu, ikutontozya-tontozya matongoosi aanga kaambaulwa kujatikizya kusowekelwa ngulube.

Kweendelana amalailile aa Jesu oyu muntu wakagwisigwa daimona waunka. Watalika kwaambilizya mumunzi wa Dekapole oonse izintu nzyaamucitila Jesu elyo bantu boonse bagambwa. Matayo 8:28-34; Marko 5:1-20; Luka 8:26-39; Ciyubunuzyo 20:1-3.

▪ Nkaambo nzi ambweni nkaabikkilidwa maanu omwe uunjidwe badaimona kakuli bali bobile?

▪ Ncinzi citondezya kuti badaimona balikuzi kusoogwa kwabo mumulindi kwakumbele?

▪ Nkaambo nzi badaimona ncobayandila kunjila bantu azinyama?

▪ Nkaambo nzi Jesu ncaandaanizyila kumuntu wakanjidwe badaimona, ikumulailila kuti akaambile bamwi Nzyaamucitila?