Cibalo 46

Wakaguma Cisani Cakwe

MAKANI aakuti Jesu wajoka kuzwa ku Dekapole amvwugwa ku Kapernauma elyo nkamu mpati yabantu yamubunganina kumbali aalwizi kuti imutambule. Cakutadooneka, bakamvwa kuti wakaumuzya guwo akuponya muntu wakanjidwe badaimona. Lino naasika kunkomwe bamubunganina kabalangila cabusungu.

Umwi wabaabo bayandide kubona Jesu ngu Jairo, mweendelezi wacikombelo. Wavwundama kumaulu aa Jesu wamukumbilisya kuti: “Kana kangu kasimbi kaamba kufwa. Koboola, ukamwaampe maanza aako, kuti afutuke, apone.” Mbwaanga ngomwanaa alikke alimwi uli buyo amyaka yakuzyalwa iili 12, ulayandwa kapati kuli Jairo.

Jesu wazumina elyo kasindikilwa ankamu bagama kuŋanda ya Jairo. Tulakonzya kuyeeyela mbobaintide bantu nobalangila aambi maleele. Pele maanu aamukaintu umwi uuli munkamu eyi ageme buyo penzi lyakwe lipati.

Kwamyaka iili 12, oyu mukaintu ulaciswa kalobola. Weenda mubasilisi awa awaawa wasowa mali aakwe oonse kubusilisi. Pele kunyina naagwasigwa pe; ipenzi lyakwe liindila buya.

Mbubonya mbuli mbomuzi, kunze lyakumumana nguzu kapati, bulwazi bwakwe obu bulajazya nsoni alimwi bulasampula. Muntu takonzyi kulyaamba caantangalala penzi lili boobu. Kunze lyaboobo, Mulawo wa Musa waamba kuti nsenselwa icita kuti mukaintu asofwaale alimwi kufwumbwa uumuguma naa zyakusama zyakwe zibijide bulowa uleelede kusamba amubili akusofwaala kusikila kumabbililo aazuba.

Mukaintu ulaamvwide maleele aa Jesu elyo lino wamuyandaula. Akaambo kakusofwaala kwakwe wainda munkamu yabantu cakuyubaila mbuli mbwakonzya akulyambauzya kati: “Kufumbwa ndaakwaampa zyakusama zyakwe buyo, njoopona.” Mbwaacitila obo, mpoona-mpoona walimvwa kuti bulowa bwaleka kuzwa!

“Ino nguni waampa zyakusama zyangu?” Ayo majwi aa Jesu amugambya kaka! Ino waziba buti? Petro ulaamba, “Mwami, bantu balikubunganine, balikuzingulukide, ino waamba kuti, Nguni uwandyaampa?”

Kamulangaula mukaintu oyu, Jesu wapandulula ategwa: “Mpali uwandyaampa, nkaambo ndalimvwa kuti nguzu zyazwa kulindime.” Masimpe, takuli kugumwa kwabuyo nkaambo ikuponesyegwa kwacitika kwamugwisya nguzu Jesu.

Naabona kuti waalilwa kulisisa, oyo mukaintu waboola wamuvwundamina Jesu kayoowede akukankama. Kumbele lyabantu boonse, waamba makani oonse aajatikizya bulwazi bwakwe alimwi ambwaaponesyegwa lino.

Akaambo kakumvwa kulyaambilila kwakwe, Jesu caluzyalo wamuumbulizya ategwa: “Mwanaangu, lusyomo lwako lwakufutula, koya, ube aluumuno akupona kubulwazi bwako.” Elo ncibotu kaka kuti Oyo Leza ngwaasala kulela nyika mmuntu uukondelezya, silubomba walo uulanganya bantu alimwi uujisi nguzu zyakubagwasya! Matayo 9:18-22; Marko 5:21-34; Luka 8:40-48; Levitiko 15:25-27.

▪ Ino Jairo nguni, alimwi nkaambo nzi ncayandila kumubona Jesu?

▪ Ndipenzi nzi lijisi mukaintu umwi, alimwi nkaambo nzi ncocili ciyumu kulinguwe kuboola kuli Jesu?

▪ Ino mukaintu waponesyegwa buti, alimwi Jesu wamuumbulizya buti?

Cibalo 47

Imisozi Yasandulwa Kuba Kukankamana Kupati

ICIINDI Jairo naabona kuti mukaintu wakali kuciswa kalobola wapona, kakunyina akudooneka ilusyomo lwakwe munguzu zya Jesu zyamaleele lwayungizigwa. Jesu walilombedwe kale kuli Jairo kuti aboole azikugwasye mwanaakwe musimbi wamyaka iili 12 yakuzyalwa ngwayanda kapati walo wali kwaamba kufwa. Nokuba boobo lino, cintu ncaayoowa kapati Jairo cacitika. Jesu kacaambaula amukaintu, kwasika baalumi bamwi akwaambila Jairo cakaumuumu kuti: “Mwanaako wafwa kale, ucimupenzezyanzi Mufundisi?”

Alatyompya kaka makani aya! Amuyeeye buyo: Oyu muntu uupegwa bulemu kapati mumunzi omu, lino maanu amumana naamvwa kuti mwanaakwe musimbi wafwa. Nokuba boobo Jesu waumvwa mubandi. Aboobo naalanga kuli Jairo waamba cakukulwaizya ategwa: “Utayoowi, kosyoma buyo.”

Jesu wasindikila muntu oyu uuli mubuumba kapati kujokela kuŋanda yakwe. Nobasika kuya bajana kuli magwete aakulila akoomoka. Inkamu yabantu babungana elyo baide kulyuumputila mizinga kulila. Mpoonya naanjila Jesu wababuzya kuti: “Ino nkaambonzi nomupyopyongana akulila? Mwana tafwide pe, uloona buyo.”

Bamvwe boobu bantu batalika kuseka Jesu akumuwelela nkaambo balizi kuti mwana musimbi ufwide ncobeni. Nokuba boobo Jesu ulaamba ulede buyo. Kwiinda mukubelesya nguzu nzyapedwe a Leza, ulabatondezya kuti bantu balakonzya kubusigwa kuzwa kubafwu munzila nguba-uba buyo mbuli kubusya muntu uuli muŋonzi zipati.

Lino Jesu wabatandila anze boonse bantu kwacaala buyo Petro, Jakobo, Johane abanyina abausyi mwana ufwide. Mpoonya wabatola aba bosanwe ooko kulede mwana musimbi. Kumwi kamujisi kujanza Jesu ulaamba: “Talitha kumi, nkukwaamba kuti, Kasimbi, buka.” Ndilyonya kasimbi kabuka katalika kweenda! Ncobabona bazyali bamusimbi oyu cabamanina maanu, cabakankamanisya kapati.

Naamana kulailila kuti mwana apegwe cakulya, Jesu waambila Jairo amukaintu wakwe kuti bataambili muntu naba omwe icacitika. Pele nokuba kuti Jesu waamba obo, impuwo yakwe yamvwigwa mucisi eco coonse. Eci nciindi cabili Jesu ncaabusya muntu kuzwa kubafwu. Matayo 9:18-26; Marko 5:35-43; Luka 8:41-56.

▪ Mmakani nzi Jairo ngaatambula, alimwi Jesu wamuyumya-yumya buti?

▪ Nciimo cili buti ncobajana nobasika kuŋanda ya Jairo?

▪ Nkaambo nzi Jesu ncaambila kuti mwana ufwide woona buyo?

▪ Mbaani bosanwe ibali aa Jesu balibonena kubusigwa oku?