Cibalo 63

Lulayo Alumbi Lwakululamika

JESU abaapostolo bakwe kabacili muŋanda ku Kapernauma, babandika acimbi kunze lyakaambo kakukazyanya kwabaapostolo kujatikizya mupati akati kabo. Eci cilakonzya acalo ncintu cakacitika ciindi nobakalikupiluka ku Kapernauma Jesu naatakaliko lwakwe mwini. Imwaapostolo Johane ulaamba: “Mufundisi, twakabona muntu umwi ulatanda badaimona muzina lyako, nkabela twakamukasya, nkaambo takakali kucilila antoomwe aswe.”

Kulibonya kuti Johane baapostolo ubabona kuti njenkamu yabasilisi baalubazu bamukamwini mulimo oyo. Aboobo ulimvwa kuti mwaalumi oyu walikucita milimo yanguzu munzila iiteelede nkaambo taakali umwi wankamu yabo.

Pele Jesu walailila ategwa: “Mutamukasyi pe, nkambo taakwe muntu uucita malele muzina lyangu uuyoofwamba kundibisya-bisya. Nkaambo oyo uutali sinkondoma ngumuzwalani wesu. Ikuti umwi aumwi uuti kamunywisye cinywido camaanzi nkaambo kakuti muli bana-Kristo, ncobeni ndamwaambila kuti mane do ukajane bulumbu.”

Teekwakali kuyandika kuti oyo muntu amutobele Jesu munzila yakumubili nkokuya abe kulubazu lwakwe. Imbungano ya Bunakristo teeyakaninga kubambwa, aboobo kutaba lubazu lwankamu yabo teekwakali kwaamba kuti wakali mumbungano yaandeene. Oyu muntu wakalijisi ncobeni lusyomo muzina lya Jesu aboobo wakakonzya kutanda badaimona. Wakali kucita cimwi cintu calo cakali kukozyanisyigwa kabotu acintu Jesu ncaakaamba kuti cakaleelede bulumbu. Jesu watondezya kuti akaambo kakucita ceeci, mane do akabujane bulumbu bwakwe.

Pele ino kuti naa mwaalumi oyu wakalebezyegwa amajwi alimwi amicito yabaapostolo? Eci inga cakatazya kapati! Jesu ulaamba: “Umwi aumwi uulebya umwi wabaniini aba bandisyoma, kanaangililwa izio ipati munsingo yakwe akuwaalwa mulwizi.”

Jesu ulaamba basikumutobela beelede kugwisya zili zyoonse mubuumi bwabo iziyandisi kulimbabo mbuli janza, kuulu naa liso eezyo zikonzya kubalebya. Ncibotu kuti kotajisi cintu ciyandisi akunjila mu Bwami bwa Leza kwiinda kubaa ncico akuwaalwa mu Gehena (imulwi wamatombe uuyaka ciindi coonse afwaafwi aku Jerusalemu), calo ciiminina kunyonyoonwa kutamani.

Alimwi Jesu wacenjezya kuti: “Amucenjele. Mutasampauli umwi akati kabaniini aba, nkaambo ndamwaambila kuti kujulu baangelo babo baleebela lyoonse busyu bwa-Taata uuli kujulu.” Mpoonya watondezya cikozyanyo cambubali bayandisi “baniini” ciindi naamba kujatikizya muntu uujisi mbelele zili mwaanda pele wasowa yomwe. Jesu wapandulula kuti oyu muntu ulasiya ezyo zili 99 kuyakuyandula eyo yasweeka elyo aijana ulakondwa kwiinda mbwacita kuli zyeezyo zili 99. Jesu wamanizya ategwa, “Mbuboobo Usowanu uuli kujulu tayandi kuti afwidilile naba umwi akati kabaniini aba.”

Ambweni kayeeyede kukazyanya kwabaapostolo bakwe Jesu wakulwaizya ategwa: “Amube amunyo mulindinywe, alimwi amube aluumuno abeenzinyoko.” Izilyo zitakwe munse zilalweezyegwa kwiinda mukubikka munyo. Aboobo, munyo wacikozyanyo upa kuti muntu ncaamba citambulwe kakunyina buyumuyumu. Ikubaa munyo uuli boobu kuyoogwasya kubambilila luumuno.

Pele akaambo kakutalondoka kwabuntunsi, zimwi ziindi kulaba mapenzi mapati. Jesu ulapa malailile aambuli mbwaaendelezyegwa. Jesu ulaamba: “Kuti munyoko wakubisizya, uye umwaanze alike. Kuti waswiilila, ulijene munyoko.” Ikuti takuswiilili, Jesu walailila kuti, “uye ubweze muntu omwe nanka bobile, kuti makani oonse akasolwe kumilomo yabakamboni bobile na botatwe.”

Ilyalo nozyakatazya, Jesu ulaamba, tola makani “[ku]mbungano” nkokwaamba kuti kubalangizi beelede bambungano bakonzya kukosola makani mulubeta. Ikuti sikubisya watatobela muzeezo wabo, Jesu wamanizya ategwa, “abe kulinduwe mbuli muhedeni nanka simutelo.”

Nobakosola boobu makani, balangizi beelede kutobelesya kapati malailile aa Jwi lya Jehova. Aboobo ciindi muntu naajaninwa kaambo alimwi akweelela kusubulwa, muzeezo ‘unooangidwe kale kujulu.’ Alimwi ciindi ‘nobaangulula ansi’ nkokuti nobatamujanini kaambo muntu, ‘cinooanguludwe kale kujulu.’ Mukweendelezya mbeta zili boobu, Jesu ulaamba, “nkubabede bantu bobile nanka botatwe babungene muzina lyangu, nkukonya oko nkumbede ambebo akati kabo.” Matayo 18:6-20; Marko 9:38-50; Luka 9:49, 50.

▪ Nkaambo nzi ncocatakali cintu ciyandika buya mumazubaa Jesu kweenda anguwe?

▪ Mmapati buti makani aakulebya baniini, alimwi Jesu watondezya buti mbubayandika aba baniini?

▪ Ncinzi capa kuti Jesu akulwaizye baapostolo kuti babe aamunyo akati kabo?

▪ Ino mmapati buti makani ‘akwaanga’ a ‘kwaangulula’?

Cibalo 64

Ciiyo Kujatikizya Kulekelela

KULIBONYA kuti Jesu ucili muŋanda yaku Kapernauma abasikwiiya bakwe. Walikubandika ambabo mbuli mbobeelede kweendelezya mapenzi ababunyina aboobo Petro wabuzya kuti: “Mwami, kuti mukwesu wandibisizya, ziindi zyongae nzenti kamulekelele?” Mbwaanga bamayi bacikombelo caci Juda bayanda kulekelela muntu kusika kuziindi zyotatwe, ambweni Petro ucibwene kuti nduzyalo kapati naamba kuti “sa nkusikila kumusanu azibili?”

Pele muzeezo oonse wakubikkilila makani aali boobu ulilubide. Jesu wamululamika Petro ategwa: “Nsikwaambili kusikila kuziindi zili 7 pele kusikila kuziindi zili 70 x 7.” Utondezya kuti kunyina mbaakani yeelede kuba kuziindi Petro zyalekelela banyina.

Ikukankaizya kuti basikwiiya beelede kulekelela, Jesu wapa mukozyanyo. Ngwamwami wakali kuyanda kuti bazike bapilusye zikoloto kulinguwe. Muzike umwi waletwa kulinguwe uujisi cikoloto camali manji aasika kumatalenta aali 10,000. Kunyina mbwakonzya kwaapilusya. Aboobo mbubwena Jesu mbwaapandulula, mwami walailila kuti auzigwe amukaintu wakwe abana kutegwa mulandu umane.

Amvwe boobo muzike oyu, wafwugamina mwami wakwe, wamulomba kuti: “Ndeengelele, ndilakuboozezya!” (BT)

Akaambo kakumufwida luse, mwami wamulekelela muzike cikoloto camali manji. Jesu wazumanana kuti, pele mbwaacitilwa boobo, oyo muzike waunka kumuzikenyina wakamukolotela masheleni aali 100. Oyu mwaalumi wamujata muzikenyina wamusina akumwaambila kuti: “Bbadela eeco ncookakolota!” (BT)

Pele muzikenyina unyina mali. Aboobo wamufwugamina muzike oyo ngwaakolotela akumukumbila kuti: “Ndeengelele, ndilakuboozezya!” (BT) Oyu muzike taacita mbuli mwami, walo takwe lubomba aboobo wamubikka muntolongo muzikenyina.

Jesu wazumanana ategwa, ibazike bamwi babona cacitika baunka baakwaambila mwami. Wamwiita muzike cabukali. Ulaamba: “Uwe muzike mubi! ndakakulekelela mulandu oyo woonse nkaambo kakuti wakandikumbila. Sa teewakeelede ayebo kufwida luzyalo muzikenyoko, mbuli ndime mbundakafwida nduwe luzaylo?” Mukunyema mwami wamutumya kuli basintolongo muzike oyu uunyina luzyalo kuti aangwe mane do akabbadele mulandu woonse.

Mpoonya Jesu wamanizya ategwa: “Mbubonya obo alakwe Taata uuli kujulu mbwazoomucitila nywebo kuti tamulekeleli nyoonse bakwanu camumyoyo yanu.”

Elo nkubota ciiyo cijatikizya kulekelela! Kukweelanya aacikoloto cipati cakubisya Leza ncaakatulekelela, ikulubizya kuli koonse nkotunga twacitilwa abakwesu Banakristo nkusyoonto kapati. Kunze lyaboobo, Jehova Leza watulekelela ziindi zinjaanji. Kanjikanji, tatuzizibi azibi nzyotumucitila. Aboobo sena tatukonzyi kulekelela bakwesu ziindi zisyoonto nokuba kuti kaliluzi kaambo nkotutongooka? Amuyeeye, mbubwenya Jesu mbwaakayiisya Makani aakwe aa Cilundu, Leza ‘uyootulekelela milandu yesu, mbubonya mbuli mbutubalekelede aswe bali amilandu kulindiswe.’ Matayo 18:21-35; 6:12; Ba-Kolose 3:13.

▪ Ncinzi capa kuti Petro abuzye mubuzyo kujatikizya kulekelela babunyina, alimwi nkaambo nzi ncabonena kuti muzeezo wakwe wakulekelela umwi ziindi zili ciloba ngwaluzyalo?

▪ Ino kwiingula kwamwami kukukombelezya kweengelelwa kwamuzike kwaindana buti akwiingula kwamuzike kukukombelezya kwamuzikenyina?

▪ Ncinzi ncotwiiya kuzwa kucikozyanyo ca Jesu?