Cibalo 81

Ikusola Kujaya Jesu Alimwi

MBWAANGA nciindi camupeyo, Jesu weendela mubusena bucingilidwe bwiitwa kuti mukkota lya Solomoni. Muumbali-mbali aa tempele. Awa bama Juda bamubunganina akutalika kwaamba kuti: “Ino ulaleka lili kutubikilila? Anooli nduwe Kristo, twaambile antangalala.”

Jesu waingula ategwa: “Ndakamwaambila, pele tamusyomi.” Jesu tana bagamide buya kubaambila kuti ngu Kristo mbuli mbwaakaambila mukaintu mu Samariya kumukalo. Pele, wakaliyubulula kuti nguni iciindi naakabapanduluda kuti wakazwa kujulu alimwi akuti wakaliko kale Abrahamu katanazyalwa.

Nokuba boobo Jesu uyanda kuti bantu balizibile kuti ngo Kristo kwiinda mukweelanya milimo yakwe azintu zyakasinsimwa mu Bbaibele kuti nzyayoocita Kristo. Nkakaambo kaako musyule wakaambide basikwiiya bakwe kuti bataambili muntu naba omwe kuti ngo Kristo. Alimwi nkakaambo nkakonya lino ncaambilila bama Juda basilunya kuti: “Milimo njencita muzina lya-Taata, njiindilungulula. Pele nywebo tamusyomi.”

Nkaambo nzi ncobatasyomeni? Sena nkaambo kakuti kunyina bumboni bwakuti Jesu ngo Kristo? Peepe, pele nkaambo kaceeci Jesu ncabaambila kuti: “Tamuli mbelele zyangu. Imbelele zyangu zilamvwa ijwi lyangu, ndilizizi, zilandicilila. Ndazipa buumi ubutamani, tazikooyoofwa limbi, takukwe uuyoozikwempa mujanza lyangu. Taata uwakandipa nzizyo, mupati kwiinda boonse, takukwe uukonzya kuzikwempa mujanza lya-Taata.”

Mpoonya Jesu wapandulula cilongwe cakwe cibotu a Usyi ulaamba: “Mebo a-Taata tuli umwi.” Mbwaanga Jesu uli anyika alimwi Usyi uli kujulu, cilasalala kuti taambi kuti walo a Usyi mbamwi ncobeni naa kuti mbamwi kumubili. Pele waamba kuti mbamwi mumakanze, ikuti balikamantene.

Nobanyemezyegwa amajwi aa Jesu, bama Juda babweza mabwe kuti bamujaye mbubwena mbubakacitide munsi ku Pobwe lya Zilawo naa lya Matente. Cabusicamba kaambila baabo bayanda kumujaya wati: “Ndakamutondezya milimo minjiminji mibotu iizwa kuli-Taata, ino kai nguli mulimo enaawa ngomundifusila mabwe?”

Baingula ategwa: “Kumulimo mubotu tatukufusi mabwe pe, pele nkaambo kakusanka, akuti yebo, mboli muntu, ulipa ka-Lezaleza.” Mbwaanga Jesu kunyina naakaambide kuti ngu leza nkaambo nzi bama Juda ncobaambila boobu?

Kulibonya kuti nkaambo kakuti Jesu waamba kuti ulaa nguzu zyalo nzyobasyoma kuti Leza alikke nguuzijisi. Mucikozyanyo, wazwaa kwaamba “mbelele” kuti, “Ndazipa buumi ubutamani,” calo muntunsi naba omwe ncatakonzyi kucita. Nokuba boobo, bama Juda bakaluba kaambo kakuti Jesu ulazumina kuti ulatambula bwami kuzwa kuli Usyi.

Ikutondezya kuti Jesu waamba kuti mmusyoonto kuli Leza wabuzya ategwa: “Sena takulembedwe mumulao wanu [ku Intembauzyo 82:6] kuti, Ndati, Muli baleza? Na ubaamba kuti mbaleza abo mbolyakazida ijwi lya-Leza. . . . Sena mwaamba oyo ngwaakasalazya Taata, akumutuma ansi kuti, Wasanka yebo, nkaambo ndati ndi Mwana a-Leza?”

Mbwaanga Magwalo alabaita nobaba babetesi bataluleme ibantunsi kuti “mbaleza,” mmulandu nzi ngobanga bamujanina Jesu bama Juda aba akaambo kakwaamba kuti “Mwaana a-Leza”? Jesu wayungizya ategwa: “Kuti nsiciti milimo ya-Taata, mutandisyomi. Pele kuti ndiicita, nomutandisyomi mebo, amusyome milimo, kuti muzibe akumvwa kuti Taata uli mulindime, amebo ndi muli-Taata.”

Naamba boobu Jesu, bama Juda basoleka kumujata. Pele wabapusyuka mbubwena mbwaakacitide kukusaanguna ku Pobwe lya Zilawo. Wazwa mu Jerusalemu, waunka kutalaa Mulonga wa Jordano kuya kubusena nkwakatalikila kubbapatizya Johane myaka iitandila kwiine musyule. Obu busena tabuli kulamfwu kapati kuzwa kunkomwe yakumusanza ya Lwizi lwa Galilaya, lweendo lutola mazuba obile naa aainda awa kuzwa ku Jerusalemu.

Ibantu banji baboola kuli Jesu kubusena obu akutalika kwaamba kuti: “Ncobeni Johane takacitide citondezyo, anu zyoonse zintu zyamuntu oyu nzyaakali kwaamba Johane zyakali zyakasimpe.” Aboobo banji bamusyoma Jesu oku. Johane 10:22-42; 4:26; 8:23, 58; Matayo 16:20.

▪ Muunzila nzi Jesu mwayanda kuti bantu bamuzibe kuti ngu Kristo?

▪ Ino Jesu a Usyi muunzila nzi mobali bamwi?

▪ Nkaambo nzi bama Juda ncobaambila kuti Jesu ulipa ka Lezaleza?

▪ Ino mbuti kuzubulula kwa Jesu kuzwa ku Intembauzyo mbokutondezya kuti tataminini kuti uleelene a Leza?

Cibalo 82

Jesu Wagama ku Jerusalemu Alimwi

KANO kaindi Jesu uli mulweendo alimwi, kayaabuyiisya kumunzi amunzi alimwi akukanzi akanzi. Kulibonya kuti uli mucooko ca Pereya mutala aa Mulonga wa Jordano kuzwa ku Judaya. Pele kwini nkwaya nkuu Jerusalemu.

Injiisyo yabusongo bwaba Juda yakuti kuli buyo mweelwe weelede uyootambula lufwutuko ambweni njiyapa kuti muntu umwi abuzye kuti: “Omwami, sena aabo bayoofutulwa banooli bace buyo?” (BT) Akaambo kakwiingula kwakwe, Jesu wapa kuti bantu batalike kuyeeya iciyandika kutegwa bafwutulwe: “Kamusolekesya [nkokwaamba kuti, amukakatisye naa kulipenzya] kunjila kumulyango uusyanikide.”

Ikusolekesya kuli boobu kulibindeene ‘nkaambo banjibanji’ Jesu wazumanana, “bayooyanda kunjila, pele bayookakilwa.” Nkaambo nzi ncobayookakilwa? Wapandulula ategwa ‘mukamwini ŋanda anyamuka akujala mulyango amana bantu baime anze akukonkomona kabati, “Omwami, tujulile,” uyooamba kuti: “Nsimuzi nkomuzwa, amuzwe kulindime nywebo nyoonse nomucitazibi.” ’

Kulibonya kuti abo bajalilwa anze baboola aciindi cili kabotu kuli mbaabo balikke. Pele mulyango wacoolwe wajalwa kale akukkiigwa. Ikuti nobali basikunjila, baleelede kusika kufwambaana nokuba kuti nokwaba kubakatazya kucita boobo. Masimpe, cileetezya ncobabikkilidwe aabo bakanza kuyoobubikka akale ambele ibukombi bwa Jehova mubuumi bwabo!

Bama Juda balo Jesu mbatumidwe kuyoobelekela bakakilwa kapati kubelesya coolwe cabo cibotu icakutambula cipo Leza ncapede calufwutuko. Aboobo Jesu ulaamba bayoolila akuluma ntwino baakusowelwa anze. Pele bantu bazwa “kujwe akumbo, akunyika akumabizi” inzya kuzwa kumasi oonse, “[ba]zookala mu-Bwami bwa-Leza.”

Jesu wazumanana ategwa: “Nkobali bamunsi [Bamasi basulaikidwe antoomwe abama Juda badyaamininwa] abayooba bataanzi, alimwi nkobali bataanzi [bama Juda balaa lubono lunji alimwi bajisi zyuuno kucikombelo] abayooba bamunsi.” Ikuba munsi kwabo caamba kuti aaba ibalenga alimwi batalumbi tabakabi mu Bwami bwa Leza pe.

Iba Farisi lino baboola kuli Jesu akwaamba kuti: “Konyamuka, uzwe okuno, nkaambo Heroda [Antipa] uyanda kukujaya.” Ambweni Heroda lwakwe mwini nguwakatalisya maŋunuŋunu kutegwa Jesu azwe mubusena obu. Heroda ulakonzya wakali kuyoowa kujatikizigwa alimwi mukujaya umbi musinsimi wa Leza mbuli mbwaakajatikizigwa mukujaya Johane Mubbapatizi. Pele Jesu waambila ba Farisi ategwa: “Kamuya mukaambile mwaaba oyo kuti, Bona, sunu ejunza ndicigwisya badaimona akuponya bantu, ezyona ndiyoozyulizya mulimo wangu.”

Naamanizya mulimo wakwe kuya, Jesu wazumanana mulweendo lwakwe kuya ku Jerusalemu nkaambo kweelana ambwapandulula, “takuzuminiki kuti musinsimi afwide kumbi, pele ku-Jerusalemu.” Nkaambo nzi ncocilangilwa kuti Jesu uyoojaigwa ku Jerusalemu? Nkaambo kakuti Jerusalemu ngomunzi mupati ikuli Basinkuta Mpati ibali 71 alimwi nkokubusena ikutuulilwa zipaizyo zyanyama. Aboobo inga takuzuminiki kuti “Mwanaambelele wa-Leza” ajailwe kumbi kutali ku Jerusalemu.

Jesu walila ategwa: “Akaka Jerusalemu, Jerusalemu, yebo oojaya basinsimi akubawaala mabwe abatumwa kulinduwe. Kanjikanji  ndali kuyanda kubungika antoomwe bana bako, mbuli nkuku mbwiifukatila twana twayo mumababa aayo, pele mwakaka. Amubone, iŋanda yanu mwiilekelelwa kiimwaikide.” Akaambo kakukaka Mwanaa Leza, cisi coonse cilisinganizidwe!

Kaciya ku Jerusalemu Jesu, watambwa kuŋanda yaumwi mupati waba Farisi. Muubuzuba bwa Sabata elyo bantu balamulangisya nkaambo kuli muntu uuliko simulungu, uulaa bulwazi bwakutumpa mumilambi ambweni yamumanzaakwe amumaulu. Jesu waambila ba Farisi abasongo ba Mulawo ibaliko wababuzya ategwa: “Sena kuliluzi kuponya ku-Sabata, na pe?”

Boonse baumuna buyo. Aboobo Jesu wamuponya muntu oyu akumuleka wainka. Mpoonya wabuzya ategwa: “Nguuli akati kanu uunga imbongolo niiba ŋombe yawida mucikala, sena takooigwisya cakufwambaana kubuzuba bwa-Sabata?” Alimwi boonse baumuna buyo kunyina waingula. Luka 13:22–14:6; Johane 1:29.

▪ Ino Jesu watondezya kuti ncinzi ciyandika kuti muntu afwutuke, alimwi nkaambo nzi banji ncobajalilwa anze?

▪ Mbaani “bamunsi” ibaba bataanzi alimwi mbaani “bataanzi” ibaba bamunsi?

▪ Kulangilwa kuti nkaambo nzi ncokwakaambilwa kuti Heroda uyanda kujaya Jesu?

▪ Nkaambo nzi ncocitazumizyilwi kuti musinsimi ajailwe kumbi kutali ku Jerusalemu?