Cibalo 89

Imulimo wa Luzyalo mu Judaya

INSONDO zisyoonto zyainda, nokwakali Pobwe lya Kusalazya tempele ku Jerusalemu, bama Juda bakali kuyanda kumujaya Jesu. Aboobo wakaunka kulubazu lwakunyika, kulibonya kuti nkuubusena butali kulamfwu kuzwa ku Lwizi lwa Galilaya.

Lino walikugama kumusanza alimwi kumbali ku Jerusalemu, kayaabukambauka muminzi yaku Pereya kucooko cili kujwe aa Mulonga wa Jordano. Naamana kwaamba cikozyanyo ca muntu muvwubi a Lazaro, wazumanana kuyiisya basikwiiya bakwe izintu nzyaakayiiside kale musyule naakali ku Galilaya.

Mucikozyanyo ulaamba ncibotu kuti muntu “aangwe bbwe munsingo yakwe awaalwe mulwizi” kwiinda kuti walo ape kuti umwi “wabaniini” ba Leza alebezyegwe. Alimwi wakankaizya ambokuyandika kulekelela kapandulula kuti: “Kuti [munyoko] wakubisizya ziindi izili musanu muzibili mubuzuba bomwe, aboola kulinduwe ziindi izili musanu muzibili ati, Ndeempwa, umujatile.”

Ciindi basikwiiya nobalomba kuti, “Yungizya lusyomo lwesu,” Jesu waingula ategwa: “Mwanoojisi lusyomo ululi mbuli nseke yamusitada, muyooambila mubula oyu kuti, Zyuka awa, ukasimpwe mulwizi, uyoomumvwa.” Elyo lusyomo naluceya lulakonzya kucita zintu zipati.

Mpoonya Jesu waluula cintu cikonzya kucitika mubuumi icitondezya nzila njayelede kulanga zintu imubelesi wa Leza singuzuzyoonse. Jesu ulaamba: “Pele ino nguni kulindinywe uujisi muzike uulima, na uuembela, akotoka buyo, ateeti kulinguwe, Koboola eno, ukale ulye? Sena takoomwaambila kuti, Ndilulamikila ndilalile, libambe undipampwide, nsaangune kulya akunywa, nkukuya ayebo noti kalye akunywa? Sena uyoomulumba muzike oyo, mbwaacita ncaakalaililwa? Ndiyeeya kuti pe. Mbubonya obo anywebo, mwamana kucita zyoonse nzomwalaililwa, amukaambe, Tuli bazike buyo, twacita ncotwali kweelede kucita.” Aboobo babelesi ba Leza tabeelede kulimvwa kuti bamufwida nkumbu Leza kwiinda mukumubelekela. Pele lyoonse beelede kuyeeya mukuli ngobajisi wakumukomba kabali banamukwasyi basyomeka bamuŋanda yakwe.

Kulibonya kuti naamana buyo kuluula cikozyanyo eci Jesu, kwasika mutumwa. Watumwaa Mariya a Marta bacizyi ba Lazaro ibakkala ku Betaniya mu Judaya. Oyu mutumwa ulaamba: “Omwami, langa, oyo ngoyanda ulaciswa.”

Jesu waingula ategwa: “Bulwazi obu tabuli bwalufu lwamuntu, pele mbwakulemeka Leza, kuti  Mwana a-Leza alemezegwe ambubo.” Naakkala mazuba obile oko nkwabede, Jesu waambila basikwiiya bakwe ategwa: “Atubweede ku-Judaya.” Pele bamuyeezya ategwa: “Rabi, ba-Juda eneeno bazwa akuyanda kukufusa mabwe, sena ubweeda alimwi nkukonya?”

Mukwiingula Jesu wabuzya ategwa: “Tee buzuba bujisi maoola aali kkumi aabili? Muntu weenda sikati talifumpuli, nkaambo uleenda zuba kalibala. Pele ooyo weenda masiku ulalifumpula nkaambo uli mumudima.” (BT)

Ambweni ncaamba awa Jesu ncakuti ‘maoola abuzuba’ naa ciindi Leza ncapiminide mulimo wa Jesu waanyika taaninga mana pe alimwi kusika akacite obo, kunyina uukonzya kumucita cimwi cintu. Weelede kucibelesya kabotu ciindi ca “sikati” ciceede mbwaanga kwamana waawo kulaboola “masiku” basinkondonyina baakumujaya.

Jesu wayungizya ategwa: “Mulongweesu Lazaro uloona, pele ndainka mebo nkamusinsimune.”

Ambweni kabayeeya kuti Lazaro ulyookezya buyo muŋonzi akuti ncitondezyo cakuti ulalangilwa kuti ulapona, basikwiiya bakwe baingula ategwa: “Mwami, anooli uloona, uyoopona.”

Mpoonya Jesu wakapwaya ulaamba: “Lazaro wazaya [wafwa]. Kwalo ndabosya kutabako nkaambo kanu, kuti muzuminisye, nokubaboobo katuya kulinguwe.”

Naayeeya kuti Jesu inga kayakujaigwa mu Judaya, pele kalombozya kumugwasya, Tomaso wakulwaizya basikwiiyanyina kuti: “Atweende aswebo, tukafwe awe.” Aboobo buumi bwabo kabuli muntenda kapati, basikwiiya bamusindikila Jesu mulweendo olu lwakuya kucita mulimo waluzyalo mu Judaya. Luka 13:22; 17:1-10; Johane 10:22, 31, 40-42; 11:1-16.

▪ Nkuli nkwaali kukambaukila Jesu lino-lino?

▪ Nkuyiisya nzi Jesu nkwaaindulula, alimwi mbukkale buli buti mbwaapandulula, ikusalazya kaambo kali?

▪ Mmakani nzi Jesu ngaatambula, alimwi ncinzi ncaamba naati “sikati” alimwi a “masiku”?

▪ Ncinzi ncaamba Tomaso naati ‘Atweende tukafwe awe’?

Cibalo 90

Ibulangizi Bwabubuke

LIMWI Jesu wasika munsi-munsi aku Betaniya, imunzi ulaa musinzo ulampa makkilomita aatandila kwaatatu kuzwa ku Jerusalemu. Kwainda buyo mazuba masyoonto kuzwa ciindi Lazaro naakafwa akuzikkwa. Bacizyi bakwe ba Mariya a Marta bacilila elyo bantu banji baboola kuŋanda yabo kuti bazikubaumbulizye.

Kabacilila, umwi waambila Marta kuti Jesu ulimunzila. Aboobo wanyamuka akufwambaana kuyoomucinga, kulibonya kuti taamwaambila mwanaakwabo. Naasika kuli Jesu, Marta waindulula majwi ambweni ngobakali kwaamba ziindi zinji amwanookwabo mumazuba one aainda ategwa: “Kuti nowakali kokuno, mwanaakwesu naatakafwa.”

Nokuba boobo, Marta watondezya lusyomo, kanyonekezya kuti Jesu ulakonzya kucita cimwi cintu kumwanaakwabo. Ulaamba: “Ndilizi kuti kufumbwa ncokumbila kuli-Leza, inga Leza ulakupa ncico.”

Jesu wasyomezya ategwa: “Mwanaakwanu ulabuka.”

Marta wamvwa mbuli kuti Jesu waamba kubusigwa kuli kumbele kwaanyika kwalo Abrahamu abamwi babelesi ba Leza nkobakali kulangila. Aboobo waingula ategwa: “Ndilizi kuti uyoobuka mubuzuba bwakubuka bwakumamanino.”

Nokuba boobo, Jesu upa bulangizi bwakuubululwa ndilyonya kaingula ategwa: “Ndime kubuka abuumi.” Wayeezya Marta kuti Leza wakamupa nguzu zyakuzuda lufwu kaamba kuti: “Oyo uusyoma ndime, naanoli wakafwa, unooli muumi, naba uli buti muumi uusyoma ndime, takooyoofwa pe.”

Awa Jesu taambili Marta kuti ibasyomeka ibapona aciindi awa tabakafwi pe. Peepe, pele kaambo nkaamba nkakuti ikusyoma nguwe kuletela buumi butamani. Ibuumi buli boobu buyoojanwa abantu banji akaambo kakubusigwa mubuzuba bwamamanino. Pele bamwi basyomeka bayoofwutuka mamanino aabweende obu bwazintu anyika elyo kuli baaba majwi aa Jesu aayoozuzikizigwa munzila mbuli mbwaambidwe. Tabakafwi pe! Naamana kwaamba kaambo aka kagambya, Jesu wabuzya Marta ategwa: “Wazumina obo na?”

Waingula ategwa: “Ii, Mwami, ndazumina kuti nduwe Kristo, Mwana a-Leza, nguwenya oyo uutegwa uleza muno munyika.”

Mpoonya Marta wafwambaana wakwiita mwanookwabo, wamwaambila kumbali ategwa: “Mufundisi mpali, ulakwiita.” Ndilyonya Mariya wazwa muŋanda. Bamwi nobabona kuti wazwa, bamutobela kabayeeya kuti uya kucuumbwe.

Naasika kuli Jesu, Mariya waliwaala kumatende aakwe kalila. Ulaamba: “Omwami, nowakali kokuno, mwanaakwesu naatakafwa.” Jesu wapenga kapati mumoyo naabona Mariya amakamu-makamu aabantu bamutobela kabalila. Wabuzya ategwa: “Ino nkuli nkomwakamuzikila?”

Baingula ategwa: “Omwami, koboola ubone.”

Awalo Jesu walila calo capa kuti bama Juda baambe kuti: “Amubone mbwaali kumuyanda.”

Bamwi bayeeya kuti Jesu naakali ku Pobwe lya Zilawo myezi misyoonto yainda, wakaponya mwana musankwa wakazyedwe moofu elyo babuzya ategwa: “Kai oyu nguwakabonya meso aamoofu, sena takakonzya kucita oyu muntu kuti atafwi?” Johane 5:21; 6:40; 9:1-7; 11:17-37.

▪ Ndilili naasika Jesu munsi-munsi aku Betaniya, alimwi nciimo cili buti cili nkuko?

▪ Ncinzi Marta ncasyomena mububuke?

▪ Ino Jesu walimvwa buti akaambo kalufwu lwa Lazaro?