Cibalo 105

Matalikilo aa Buzuba Bukatazya

ICIINDI Jesu naazwa mu Jerusalemu mu Muhhulo mangolezya, wapilukila ku Betaniya kunselelo yakujwe ya Cilundu ca Elaioni. Mazuba obile aamulimo wamamanino mu Jerusalemu amana. Kakunyina kudooneka Jesu waona kumulongwaakwe Lazaro alimwi. Kuzwa ciindi naakasika kuzwa ku Jeriko muli Bwasanu, obu mbusiku bwane mbwaakkala mu Betaniya.

Lino cifwumofwumo muli Bwabili, Nisani 11, walo abasikwiiya bakwe bali munzila alimwi. Obu bwajanika kuba buzuba bukatazide mumulimo wa Jesu, ibwamilimo kwiinda oonse kuzwa naakatalika. Mbuzuba bwamamanino mbwaalibonya mutempele. Alimwi mbuzuba bwamamanino bwamulimo wakwe wakubuleya kalutana lubeta lwakwe akujaigwa.

Jesu abasikwiiya bakwe batola nzila njiyonya iinda atalaa Cilundu ca Elaioni kugama ku Jerusalemu. Kabali munzila omo kuya ku Betaniya, Petro wabona cisamu ncaakasinganya Jesu buzuba bwainda cifwumofwumo. Ulaamba: “Mwami, kolanga, bukuyu obuya mbowakasinganya bwakayuma nta!”

Pele ninzi ncaakacijaila cisamu eci Jesu? Wapandulula ncaakacitila boobo naazumanana kwaamba kuti: “Ncobeni ndamwaambila kuti, mwaba alusyomo lwakutadoneeka, teensi eci camukuyu luzutu ncimuyookonzya, pele nikuba kuti mwaambila cilundu eci [Cilundu ca Elaioni mpobaimvwi] kuti, Zyuka awa akuwaalwa mulwizi, ciyoocitwa mbubonya. Alimwi zintu zyoonse nzimukumbila mukukomba kwanu, nimwasyoma muyoozipegwa.”

Aboobo kwiinda mukupa kuti cisamu ciyume, Jesu upa ciiyo ncobanga babona basikwiiya bakwe kujatikizya mbobayandika kubaa lusyomo muli Leza. Mbubwenya mbwaamba: “Coonse ncimukomba akukumbila, amusyome kuti mulatambula nciconya, elyo mulacipegwa ncobeni.” Elo cilayandika kaka ciiyo eci kuti baciiye ikapati mbokulangilwa masunko mabyaabi lino-lino! Pele nkobuli abumbi mbokuswaangene ikuyuma kwacisamu camukuyu aciimo calusyomo.

Icisi ca Israyeli mbubwena mbuli mukuyu oyu, cilacenga mbocilibonya. Nokuba kuti cisi cili mucizuminano a Leza alimwi kunze cilakonzya cilibonya kuti cilaitobela milawo yakwe, cajanika kuti tacijisi lusyomo pe, tacizyali micelo mibotu. Akaambo kakubula lusyomo, mane lino cikanza kukaka Mwanaa a Leza mwini-mwini! Aboobo kwiinda mukupa kuti mukuyu uutazyali uyume, Jesu utondezya iciyoocitika kucisi eci citazyali citakwe lusyomo.

Mukaindi kaniini, Jesu abasikwiiya bakwe banjila mu Jerusalemu alimwi mbuli cilengwa cabo, baunka kutempele kwalo Jesu nkwaatalika kuyiisya. Ibapaizi basilutwe alimwi abapati, kakunyina kudooneka kabayeeyede mucito wa Jesu wabuzuba bwakainda kubantu bakali kucincana mali, bamubuzya ategwa: “Ino mbwaminzi mbozicitya ezi? alimwi ngwani wakakupa bwami obu?”

Mukwiingula Jesu ulaamba: “Ambebo ndamubuzya mubuzyo omwe. Kuti mwandaambila, lino ambebo ndamwaambila bwami mbunzicitya ezi. Lubapatizyo lwa-Johane lwakazwa kuli? Sa lwakazwa kujulu nanka kubantu?”

Ibapaizi basilutwe abapati batalika kubuzyanya kuti naa balaingula buti. “Na twaambe kuti lwakazwa kujulu, ulatwaambila kuti, Pele nkaambonzi nimwatakamuzuminina? Pele na twaambe kuti lwakazwa kubantu tulayoowa bantu, nkaambo boonse balayeeya kuti Johane kali musinsimi.”

Ibasololi tabazi cakwiingula. Aboobo baingula Jesu ategwa: “Tatuzi pe.”

Mpoonya Jesu ulaamba: “Ambebo nsikoomwaambila bwami mbunzicitya ezi.” Matayo 21:19-27; Marko 11:19-33; Luka 20:1-8.

▪ Ino buzuba bwamuli Bwabili mu Nisani 11 mbuzuba bupati buti?

▪ Nziiyo nzi Jesu nzyaapa ciindi naacita kuti mukuyu uyume?

▪ Ino Jesu wabaingula buti abo bamubuzya kuti naa mbwami nzi mbwazicitya zintu ezi?

Cibalo 106

Kuyubululwa Kwiinda Muzikozyanyo zya Muunda

JESU uli kutempele. Wazwaa kuzinga basololi bacikombelo balo bali kuyanda kuziba kuti naa mbwami nzi mbwazicitya zintu. Kabatanakkalikana kuzwa mukuzingwa kwabo Jesu wabuzya ategwa: “Muyeeyanzi?” Mpoonya kwiinda mucikozyanyo, wabatondezya kuti naa mbantu bali buti ncobeni.

Jesu ulaamba: “Muntu umwi kajisi bana bobile, nkabela wakeza kumutaanzi, wakati, Mwanaangu, koya ukabeleke sunu mumuunda wangu. Walo wakavuwa, wakati, Nsiyandi pe, nekubaboobo musule wakeempwa, wakaya. Alimwi wakeza kuliwabili, wakaamba mbubonya. Walo wakavuwa kuti, Ndainka, taata. Nekubaboobo teewakaya pe. Ino nguli akati kabaabo bobile wakacita luyando lwawisi?” Jesu wabuzya.

Basikumukazya baingula balaamba: “Mutaanzi.”

Aboobo Jesu wapandulula ategwa: “Ncobeni ndamwaambila kuti basimutelo abasikuvwuula balamusaangunina kunjila mu-Bwami bwa-Leza.” Basimutelo abasikuvuula masimpe kukusaanguna bakakaka kubelekela Leza. Pele, mbuli mwana wakusaanguna, bakeempwa akutalika kumubelekela. Kulubazu lumwi, ibasololi bacikombelo, mbubwenya mbuli mwana wabili, bakali kulyaamba kuti balamubelekela Leza, pele mbubwenya Jesu mbwaamba ategwa: “Johane [Mubbapatizi] wakeza kulindinywe munzila yabululami, pele inywe teemwakamuzuminina anukuti basimutelo abasibwaamu bakamuzuminina, nkabela inywe nimwakabona obo, musule teemwakeempwa akumuzuminina.”

Mpoonya Jesu watondezya kuti ikwaalilwa kwabasololi abo bacikombelo takuli kwakukaka buyo kubelekela Leza. Peepe, aaba mbantu bampelenge batalibijili. Jesu ulaamba: “Kakuli muntu umwi mwiniŋanda iwakazikila muunda, wakauzyuungulusya lubaya, wakasya idindi ipati lyakusinina mulinguwo, wakayaka cisanza, wakuubika mumaanza aabalimi, lino wakaya kucisi cimbi. Lino ciindi camicelo nicakaba afwiifwi wakatuma bazike bakwe kubalimi kuti batambule micelo yakwe. Nkabela balimi bakabajata bazike bakwe, bamwi bakabauma, bamwi bakabajaya, abamwi bakabafusa mabwe. Alimwi wakatuma bazike bambi banji kwiinda bataanzi, nkabela abalo bakabacitila mbubonya.”

“Bazike” mbasinsimi balo “mwiniŋanda” Jehova Leza mbaakatuma ku “balimi” bamu “muunda” wakwe. Aba balimi mbaiminizi balaambele bacisi ca Israyeli, icisi caambwa kuti “muunda” wa Leza mu Bbaibbele.

Mbwaanga “balimi” balapezya akujaya “bazike,” Jesu wapandulula ategwa: “Lino musule [mwinimuunda] wakabatumina mwanaakwe, wakati, Mbali mwanaangu balamulemeka. Nekubaboobo abo balimi nibakabona mwana bakabuzyanya kuti, Ngooyu simulya izina wasika! Amuboole, tumujaye, kuti tumunyanzye lubono lwakwe. Mpawo bakamujata, bamutanda kuzwa mumuunda, bamujaya.”

Lino kaambila basololi bacikombelo, Jesu wabuzya ategwa: “Ino mwinimuunda naazoosika, uzoobacitilanzi abo balimi?”

Basololi bacikombelo baingula ategwa: “Kuvwinyauna uzoovwinyauna babi abo, nkabela uzoobika muunda mumaanza aabalimi bambi, bazoomupa micelo muziindi zyayo.”

Aboobo cakutayeeya balipimina cisubulo beni mbwaanga balibikkilizidwe akati kabana Israyeli “balimi” bamu “muunda” wa Jehova icisi ca Israyeli. Imicelo Jehova njalangila kuzwa kubalimi bali boobu ndusyomo mu Mwanaakwe, Mesiya mwini-mwini. Akaambo kakwaalilwa kupa mucelo uli boobu, Jesu wacenjezya ategwa: “Sa tamubalide mumagwalo [ku Intembauzyo 118:22, 23] kuti, ibbwe ndibakasowa bayaki lyakaba mutwe wacooko. Inkani eyi yakazwa ku[li]-Jehova, ilagambya mumeso esu. Nkaambo kaako ndamwaambila kuti Bwami bwa-Leza buzoonyanzigwa kulindinywe, buzoopegwa musyobo umbi uuzyala micelo yabo. Lino oyo uuwida abbwe elyo uzootyokooka, pele umwi aumwi uzoowidwa ndilyo, lizoomupwasaula.”

Lino balembi abapaizi basilutwe baziba kuti Jesu waamba mbabo aboobo bayanda kumujaya, “simulya izina” weelede. Aboobo coolwe cakuyakuba baleli mu Bwami bwa Leza ciyoobwezegwa kuzwa kulimbabo cisi coonse elyo cisi cipya ‘cabalimi bamumuunda’ ciyoobambwa calo ciyoozyala micelo iiluzi.

Akaambo kakuti basololi bacikombelo bayoowa makamu aabantu balo balanga Jesu kuti musinsimi, teebasola kumujaya pe aciindi awa. Matayo 21:28-46; Marko 12:1-12; Luka 20:9-19; Isaya 5:1-7.

▪ Ino bana bobile bali mucikozyanyo ca Jesu cakusaanguna baiminina nzi?

▪ Mucikozyanyo cabili, mbaani baimininwaa “mwiniŋanda,” “muunda,” “balimi,” “bazike,” alimwi a “simulya izina”?

▪ Ncinzi ciyoocitikila ‘balimi bamumuunda,’ alimwi mbaani bayoobweza busena bwabo?