Cibalo 119

Watolwa Kuli Anasi Mpoonya Kuli Kayafa

KAANGIDWE mbuli similandu, Jesu watolwa kuli Anasi uulemekwa walo iwakali mupaizi mupati. Anasi wakali mupaizi mupati ciindi Jesu naakagambya bamayi bamulawo kutempele kali amyaka iili 12. Ibunji bwabana ba Anasi bakazyooba bapaizi bapati, alimwi lino imukwaakwe Kayafa nguujisi cuuno eci.

Ambweni Jesu wasaanguna kutolwa kuŋanda ya Anasi nkaambo oyu mupaizi silutwe wakabeleka bwakaindi mumulimo wacikombelo caba Juda. Ikuleya oku kwapa kuti Imupaizi Mupati Kayafa abungike Basinkuta Mpati yaba Juda ibali 71 antoomwe abakamboni babeji.

Lino mupaizi silutwe Anasi wabuzya Jesu kujatikizya basikwiiya bakwe alimwi akuyiisya kwakwe. Pele mukwiingula Jesu ulaamba: “Ndakaamba cakutasisa kunyika, lyoonse ndali kwiisya muzikombelo amuntempele, oko nkobabunganina ba-Juda boonse, taakwe ncendali kwaambila kumbali pe. Ino undibuzizyanzi? Buzya abo abakandimvwa makani ngendakali kubaambila, balo balizi ngendakabaambila.”

Naamba boobo, umwi wabasilumamba wiimvwi munsi aa Jesu wamukwapula lubayi kumeso ulaamba: “Sena mbovuwa obo kumupaizi mupati?”

Jesu waingula ategwa: “Kuti nandaamba bubi, lungulula bubi, pele na cililuzi, ino wanduuminanzi?” Nokwamana kwaambaula kuli boobu, Anasi watuma Jesu kuli Kayafa kaangidwe.

Aciindi awa ibapaizi basilutwe, ibapati, balembi, inzya boonse Basinkuta Mpati batalika kuyoboloka. Nkobabunganina kulibonya kuti nkuuŋanda ya Kayafa. Ikubaa lubeta iluli boobu mubusiku bwapobwe lya Kwiindilila kulalibonya kuti nkutyola mulawo waci Juda. Pele eci teecatyompya basololi bacikombelo kuti bacite makanze abo mabyaabi.

Insondo zisyoonto zyainda ciindi Jesu naakabusya Lazaro, Basinkuta Mpati bakali kanzide kale akati kabo kuti weelede kufwa. Alimwi mazuba obile buyo musyule, muli Bwatatu, beendelezi bacikombelo bakasola kumujata Jesu cakumweena kuti bamujaye. Amuyeeye buyo, mane wakali singanizidwe kale kalutana lubeta olu!

Bajisi bubi lino kuyandaula bakamboni babeji balo batipe bumboni bwakubeja kutegwa bamujanine mulandu Jesu. Pele kunyina bakamboni bajanwa balo bakozyenye mukulungulula kwabo. Limwi bantu bobile balisungula balaamba: “Swebo twakamumvwa uuamba kuti, Mebo njoomwayula eci cikombelo icakayakwa amaanza aabantu, elyo amana mazuba otatwe njooyaka cimbi, icitayakwi amaanza aabantu pe.”

“Sa tovuwi yebo?” wabuzya Kayafa. “Ino kai mbumboninzi obo mbubakuzangauzya?” Pele Jesu waumuna buyo. Nomuba mumulandu oyu wakutamikizya, icausisya Basinkuta Mpati, itwaambo twabakamboni aba tatweendelani pe. Aboobo, mupaizi mupati wasoleka nzila imbi.

Kayafa ulizi mbobalimvwa bama Juda kuti muntu umwi waamba kuti Mwanaa Leza mwini-mwini. Iziindi zyobile zyamusyule, bakaambide kuti Jesu ngusikusampaula Leza uueelede kujaigwa, aciindi cimwi bakamuyeeyela kuti wakali kulyaamba kuti baleelene a Leza. Lino Kayafa cabucenjezu ulaamba: “Ndakukonkezya kuli-Leza muumi kuti utwaambile na nduwe Kristo Mwana a-Leza.”

Kufwumbwa naa zinzi nzyobayeeya bama Juda, Jesu Mmwanaa Leza mwini-mwini. Ikuti waumuna buyo inga kwaambwa kuti ukaka kuti tali Kristo. Aboobo Jesu waingula cabusicamba ategwa: “Ndime, alimwi muyoobona Mwana a-Muntu ulikede kululyo lwasinguzu akuboola amakumbi aakujulu.”

Ucaamba buyo boobu, Kayafa wazapaula zyakusama zyakwe akwaamba kuti: “Watukila Leza! Tucilangilanzi bakamboni. Amulange! Mwaswiilila lino mbwaatukila Leza. Ino muyeeyanzi?”

Basinkuta Mpati balaamba: “Uleelede kufwa.” Mpoonya batalika kumubbookezya alimwi baamba zintu zinji zyakumusampaula. Bamuuma mbayi kumeso akumuswida mate. Bamwi bamuvwumba kubusyu akumudinkaula amfwaindi zyabo akwaamba cakasaaza ategwa: “Tulungulwide, uwe Kristo. Nguni wakuuma?” Oku kutalilemeka kwakutundulula ikutyola mulawo kwacitikila kulubeta lwamasiku. Matayo 26:57-68; 26:3, 4; Marko 14:53-65; Luka 22:54, 63-65; Johane 18:13-24; 11:45-53; 10:31-39; 5:16-18.

▪ Nkuli nkwaatolwa kusaanguna Jesu, alimwi ncinzi camucitikila kuya?

▪ Nkuli nkwaatolwa Jesu kuzwawaawo, alimwi nkuyakucita nzi?

▪ Ino Kayafa wabayunga buti Basikuta Mpati kuti baambe kuti Jesu weelede kujaigwa?

▪ Ino nkulilemeka kuli buti kubyaabi kwacitika ciindi calubeta?

Cibalo 120

Ikutama Mubbuwa

NOBAMUMWAIKA Jesu mumuunda wa Getesemane akutija kabayoowede antoomwe abaapostolo bambi, Petro a Johane baima. Ambweni bamujana Jesu naalikutolwa kuŋanda ya Anasi. Iciindi Anasi naamutuma ku Mupaizi Mupati Kayafa, Petro a Johane bamutobela aalaale, kulibonya kuti balinyongene akaambo kakuyoowa kujaigwa alimwi akuyeeya citicitikile Mwami wabo.

Nobasika kuŋanda ya Kayafa iitalikomeneni, Johane wakonzya kunjila mubbuwa nkaambo ulizibidwe kumupaizi mupati. Pele Petro wacaala kaimvwi anze amulyango. Pele kaindi kaniini Johane wapiluka akwaambaula amusimbi mulelwa uulindila mulyango elyo Petro wazumizigwa kunjila.

Lino kwatontola aboobo bazike abasilumamba bamupaizi mupati bakutula mulilo wamakala. Petro wabasangana kutegwa akasaalilwe nacilindila kukosolwa kwalubeta lwa Jesu. Awo, akaambo kamumuni wamulimo, oyo uulindila mulyango iwazumizya Petro kuti anjile wamulangisya buya kabotu lino. Oyu musimbi ulaamba: “Ayebo wakali awe Jesu mu-Galilaya.”

Kanyemede akaambo kakuzibwa, Petro wakazya kabamvwide boonse kuti kunyina namuzi Jesu pe. Ulaamba: “Pe, nsizi nikuba kumvwa mboamba.”

Naamba boobo, Petro waunka anze kumbali aamulyango. Oko aumbi musimbi wamubona akwaambila baabo baimvwi munsi-munsi ategwa: “Oyu alakwe wakali awe Jesu mu-Nazareta.” Alimwi Petro wakazya akukonka ategwa: “Nsimuzi muntu oyu.”

Petro wakkala mubbuwa akusola kulisisa mbuli mbwakonzya. Ambweni aciindi awa watilimusigwa akulila kwamukombwe kubucedo. Aciindi awa lubeta lwa Jesu luciyaambele, kulibonya kuti lucitilwa mucibeela caŋanda iili atalaabbuwa. Kakunyina kudooneka, Petro abamwi-bamwi balindilila ansi bababona bakamboni baandeene-andeene kabasika akuunka balo baitwa kuti balungulule.

Iciindi citandila kuwoola cainda kuzwa ciindi Petro naazibwa kuti mulongwe wa Jesu. Lino bunji bwabaabo baimvwi munsi-munsi baboola kulinguwe akwaamba kuti: “Ncobeni ayebo uli wankamu yabo, nkaambo mwaambo wako awalo ulakuyubulula.” Umwi wabaabo bali munkamu musazinyinaa Malko oyo uulaa kutwi nkwaakosola Petro. Ulaamba: “Sena enduwe ngwendakabona mumuunda antoomwe awalo?”

“Nsimuzi muntu oyu,” Petro waingula cankazi. Mane wabaambila kuti balilubizide boonse kwiinda mukulisinganya akukonka kumakani aya akwaamba kuti cibi cibe alinguwe kuti kakubee ulabeja.

Mbwaatamina buyo lwatatu Petro, imukombwe walila. Elyo aciindi awa, Jesu uulibonya kuti wazwa mukoce lyaŋanda iili atalaabbuwa wacebuka akumulanga. Ndilyonya Petro wayeeya ncaamwaambilide Jesu mawoola masyoonto buyo aainda muŋanda yamujulu ategwa: “Mukombwe katana kulila kobile, ulanditama kotatwe.” Kauside kapati amukuli wacibi cakwe, Petro wazwida anze waakulila kapati.

Ino cabaaba buti obu? Imuntu walikulidunda kuti muyumu munzila yakumuuya, ino inga Petro wamutama buti Mwami wakwe ziindi zyotatwe iziile kutobelenye? Kakunyina kudooneka, izintu zyeenda mbwaatali kulangila Petro. Ikasimpe kazibinganizigwa alimwi Jesu waambwa kuti ngusimilandu mubi kapati. Icintu ciluzi nceciboneka kuti taciluzi, muntu uunyina mulandu wapegwa mulandu. Aboobo akaambo kaciimo ciliko awa, Petro waamba caambaambe. Mukulaba kwaliso, ikusyomeka kwakwe kwakopana; icamuusisya waangana mumizeezo kuyoowa bantu kwalo. Twakomba eco citabi nociyoocitika pe kulindiswe! Matayo 26:57, 58, 69-75; Marko 14:30, 53, 54, 66-72; Luka 22:54-62; Johane 18:15-18, 25-27.

▪ Ino Petro a Johane bakonzya buti kunjila mubbuwa lyamupaizi mupati?

▪ Petro a Johane kabali mubbuwa, ncinzi citola busena muŋanda?

▪ Ino mukombwe walila ziindi zyongaye, alimwi ziindi zyongaye Petro nzyaakazya kuti tamuzi Kristo?

▪ Ino caamba nzi kuti Petro wasinganya akukonka?

▪ Ncinzi capa kuti Petro akazye kuti tamuzi Jesu?