Cibalo 125

Ikupengana Acisamu

JESU abamwi babbi bobile batolwa kuyoojaigwa. Afwaafwi-fwaafwi buyo amunzi, eyi nkamu yaima kubusena bwiitwa kuti Gologota naa Kaanza.

Aba baange basamununwa zisani zyabo. Mpoonya bapegwa waini uuvweleni amura. Wakabambwa a bamakaintu bamu Jerusalemu elyo bama Roma kunyina nobakasya kubapa musamu oyu abo bakankaminwa kutegwa batacimvwi kucisa. Pele naaulabila Jesu, wakaka kuunywa. Nkaambo nzi? Kulibonya kuti uyanda kuti ataziluki maano aakwe oonse aciindi eci cakusunkwa kwini-kwini kwalusyomo lwakwe.

Lino Jesu walandabikwa acisamu maanza akwe kaali atalaa mutwe wakwe. Mpoonya basilumamba bagagaila mipikili mipati mumaanza aakwe alimwi akuzituta. Wanyanyuka nkocicisa ciindi imipikili noyayasa munyama alimwi amumilambi. Nocaimikizigwa cisamu, ikucisa kwaindila nkaambo mubili lino wakwelekana akuyauka muya muli mipikili. Pele muciindi cakuti abakonge, Jesu wakombela basilumamba bana Roma ategwa: “Taata, ubajatile, nkaambo tabezi ncobacita.”

Pilato wabikka cikwankwani acisamu icilembedwe kuti: “Ngooyu Jesu waku-Nazareta, Mwami waba-Juda.” Walemba boobu kutali buyo akaambo kakuti ulamulemeka Jesu pele nkaambo kakuti bamusesemya bapaizi baci Juda akaambo kakuyandaula lufwu lwa Jesu kulinguwe. Ikutegwa boonse bakonzye kubala cikwankwani eci, Pilato wacilembya milaka yotatwe—mu Cihebrayo, muci Latini cibelesyegwa kwiinda mumulawo alimwi amu Cigiliki cinyenzi.

Ibapaizi basilutwe antoomwe a Kayafa a Anasi batyompwa kapati. Oku kwaambilizya kwakulumbaizya kwanyonganya ciindi cabo caluzundo. Aboobo balaamba: “Utalembi kuti, Mwami waba-Juda, pele lemba kuti, Wakaamba kuti, Ndi Mwami waba-Juda.” Kanyemede akaambo kakubelesyegwa mbuli sikuzuzikizya makanze aabapaizi, Pilato waingula cakucimwa ategwa: “Eeco ncindalemba ndalemba.” (BT)

Lino bapaizi antoomwe ankamu mpati yabantu babungana kubusena obo bwakujaila elyo bapaizi baakaka makani aalembwa acikwankwani. Baindulula kulungulula kwakubeja kwakapedwe musyule kulubeta lwa Nkuta Mpati. Aboobo tacikankamanisyi pe kuti basimweendanzila batalika kwaamba cakusampaula akupukapuka mitwe yabo camucapo ategwa: “Uwe uukonzya kuvwinyauna intempele akwiiyakulula mumazuba otatwe, lifutule! Kuti koli Mwana a-Leza, seluka kuzwa [kucisamu, NW].”

Ibapaizi basilutwe abasicikombelonyina banjilila ategwa: “Wakafutula bamwi, anukuti takonzyi kulifutula mwini. Ngumwami waba-Israyeli, aseluke lino kuzwa [kucisamu, NW] kuti tukamuzuminine. Wakasyoma Leza. Lino amufutule, kuti kamuyanda. Nkaambo wakati, Ndime Mwana a-Leza.”

Nobaibililwa amuuya nguwenya oyu, abalo basilumamba batalika kufwubaazya Jesu. Bamupa waini uupapa cakumubbokezya, alimwi kulibonya kuti baujatila ambele-mbele buyo aamilomo yakwe miyumu. Bafwubaazya balaamba: “Wanooli Mwami waba-Juda, lifutule.” Abalo babbi—umwi uukankaminidwe kululyo lwa Jesu, umwi kulumwensyi—batalika kumutukila. Amuyeeye buyo! Imuntu mupati kwiinda iwakaponede, inzya, oyu wakagwasyanya a Jehova Leza ikulenga zintu zyoonse, wasampaulwa boobu!

Basilumamba babweza zyakusama zya Jesu akuzicita muzibeela zyone. Baziwaala cisolo kuti babone naa zilaba zyani. Nokuba boobo cakusama cakwe camukati, ncilembo buyo comwe, musyobo uudula kapati. Aboobo basilumamba baambilana ategwa: “Tutacizapauli, pele atuwaale cisolo, na cilaba cani.” Aboobo cakutaziba bazuzikizya lugwalo lwaamba kuti: “Bakaabilana zyakusama zyangu, bakawaalila cibaki cangu cisolo.”

Muciindi, umwi wababbi waziba kuti Jesu weelede kuti mwami ncobeni. Aboobo kasinsa mweezinyina, ulaamba: “Sena a-Leza tomuyoowi yebo ooumwa mbubonya? Alimwi swebo ncobeni kuliluleme nkaambo twatambula iceelede milimo yesu, pele walo taakwe naabisya cintu.” Mpoonya waambila Jesu cakukombelezya ategwa: “Ukandiyeeye, Mwami, waakusika mubwami bwako.”

Jesu waingula ategwa: “Ncobeni ndakwaambila [sunu, NW], tunooli ayebo mu-Paradaiso.” Icisyomezyo eci ciyoozuzikizigwa ciindi Jesu anoolela kali Mwami kujulu akubusya sizibi oyu weempwa kubuumi bwaanyika mu Paradaiso yalo basikufwutuka Amagedoni abeenzinyina mobayoobaa coolwe cakulima. Matayo 27:33-44; Marko 15:22-32; Luka 23:27, 32-43; Johane 19:17-24.

▪ Nkaambo nzi Jesu ncaakaka kunywa waini uuvwelene amura?

▪ Nkaambo nzi ncocabikkilwa cikwankwani acisamu ca Jesu, alimwi nkwaambaula nzi nkocaleta akati ka Pilato abapaizi basilutwe?

▪ Nkusampaulwa nzi akumbi nkwaatambula Jesu acisamu, alimwi kulibonya kuti ncinzi caletelezya?

▪ Ino businsimi bwazuzikizigwa buti kwiinda mumucito wacitwa kuzisani zya Jesu?

▪ Nkusanduka nzi nkwaacita umwi wababbi, alimwi Jesu uyookuzuzikizya buti kulomba kwakwe?

Cibalo 126

“Ncobeni Oyu Muntu Kali Mwana a-Leza”

KAKUTANAINDA ciindi cilamfwu kuzwa ciindi Jesu naabikkwa acisamu, acilungulungu kwazyooba mudima uuyoosya watola mawoola otatwe. Takuli akaambo kakubola kwazuba nolisitililwa amwezi nkaambo eci cicitika buyo ciindi mwezi nowakkala pele lino mwezi ulizwide aciindi capobwe lya Kwiindilila. Kunze lyaboobo, ikubola kwazuba amwezi kutola buyo maminiti masyoonto. Aboobo mudima oyu wazwa kuli Leza! Ambweni wacita kuti bayozye abo bafwubaazya Jesu akucita kuti masampu abo alekwe.

Ikuti eci cintu ciyoosya nocacitika sizibi katanamusinsa mweenzinyina alimwi akulomba Jesu kuti akamuyeeye, nokwategwa ncocapa kuti ayempwe. Ambweni nciindi nokwali mudima bamakaintu bone, banyina Jesu alimwi amwanaakwabo Salome, Mariya Magadelene alimwi a Mariya banyina mwaapostolo Jakobo Muniini balo nobakonzya kusika aafwaafwi acisamu cakupenzyenzya. Johane, imwaapostolo uuyandwa kapati a Jesu awalo uli ambabo.

Elo kaka bamyongwa banyina Jesu nkobalangilila mwanaabo ngobakalikomezyela akulela kalengeenga lino mumacise aataambiki! Pele Jesu tayeeyi mbuli mbwaapenga walo pele uuyeeya mbobatipone banyina. Cakulikakatizya kapati, wagamika mutwe kuli Johane akwaambila banyina ategwa: “Mwanakazi, bona, ngooyu mwanaako.” Mpoonya walanga kuli Mariya waambila Johane ategwa: “Bona, mbaaba banyoko.”

Aboobo Jesu wabikka mulimo wakulanganya banyina balo balibonya kuti mbaamukamufwu lino mumaanza aamwaapostolo ngwayandisya. Wacita boobo nkaambo bana ba Mariya bambi tabanalutondezya lusyomo mulinguwe. Aboobo wapa cikozyanyo cibotu icakutagwasya banyina munzila yakumubili buyo pele akubagwasya munzila yakumuuya.

Ambweni ciindi kacitandila kuwoola lyatatu kuzwaa cilungulungu, Jesu ulaamba: “Ndafwa nyota.” Jesu waziba kuti cili mbuli kuti Usyi waleka kumukwabilila kutegwa ikusyomeka kwakwe kusunkwe mbuli mbokweelede. Aboobo woongolola ajwi pati ulaamba: “Leza wangu, Leza wangu, wandisiilanzi?” Nobamvwa boobo bamwi ibaimvwi munsi-munsi balaamba: “Bona, ulaita Eliya.” Ndilyonya umwi wazuza wanyika insinsa muwaini uupapa, waangilila kutete wamunywisya. Pele bamwi balaamba: “Amumuleke, tubone na Eliya ulasika kuzoomuselusya.”

Jesu naatambula waini uulula wati: “Kulimanide.” Inzya wazimanizya zyoonse nzyaakamutumide Usyi anyika kuti azyoocite. Mpoonya kumamanino ulaamba: “Taata, nduupeda muuya wangu mumaanza aako.” Aboobo Jesu wapa muuya wakwe kuli Leza kasyomede kuti Leza uyoomujosezya alimwi. Mpoonya wakotamika mutwe wakwe wafwa.

Mbwaamaniinida buyo Jesu, kwaba muzuzumo mupati waandaula mabwe. Imuzuzumo oyu mupati cakuti zyuumbwe zili anze aa Jerusalemu zyavwumbauka elyo mitunta yasowelwa atala. Basimweendanzila babona mitunta eyi yasiigwa atuba banjila mumunzi kuyooluula.

Kunze lyaboobo, ciindi Jesu naafwa, cisitilizyo icaandaanya busena Busalala a Busalalisya mutempele cayauka muzibeela zyobilo kuzwa ajulu do ansi. Eci cisitilizyo ceebeka cilampa mamita aali 18 alimwi ncilemu! Aya maleele aayoosya taatondezyi buyo bukali bwa Leza kubajayi ba Mwanaakwe pele atondezya kuti inzila yakuya kubusena Busalalisya, kujulu kwini, yajalulwa lino kwiinda mulufwu lwa Jesu.

Lino bantu nobamvwa muzuzumo akubona zintu zyacitika bayoowa kapati. Silumamba uubwene makani aakujaya walumbaizya Leza. Ulaamba: “Ncobeni oyu muntu kali Mwana a-Leza.” Ulalangilwa kuti wakaliko ciindi naakabandikwa makani aakuti Jesu Mmwanaa Leza aciindi calubeta lwakwe kuli Pilato. Elyo lino wasyoma kuti Jesu Mwanaa Leza, inzya ikuti masimpe ngomuntu mupati kwiinda iwakaponede.

Bamwi abalo bayoowa akaambo kamaleele aya elyo batalika kupiluka kumaanda kabalyuuma azyamba ikutondezya kuusa kupati abweemya. Ibeebelezyela alaale mbaamakaintu banji basikwiiya ba Jesu balo bakatazigwa kapati akaambo kazintu ezi. Imwaapostolo Johane awalo nkwali. Matayo 27:45-56; Marko 15:33-41; Luka 23:44-49; 2:34, 35; Johane 19:25-30.

▪ Nkaambo nzi ncotutakonzyi kwaamba kuti nkubola kwazuba nciwabeda mudima wamawoola otatwe?

▪ Katanafwa buyo Jesu, ncikozyanyo nzi cibotu ncaapa baabo balaa bazyali bacembeede?

▪ Ntwaambo nzi tone twamamanino Jesu ntwaamba katanafwa?

▪ Ino muzuzumo wacita nzi, alimwi ino kuyauka kwacisitilizyo camutempele muzibeela zyobile kwaamba nzi?

▪ Ino silumamba uubwene makani aakujaya wajatikizigwa buti amaleele aya?