Kabbokesi Kamubuzyo
◼ Ino ncinzi bana ncobeelede kwiiya kutegwa bayaambele akusima kumuuya?
Zinji nzyobacita bazyali Banakristo kutegwa bakomezye bana babo “mululayo lwa Jehova akubayiisya kutobela mizeezo yakwe.” (Ef. 6:4) Mucikozyanyo bazyali bacibona kuti cilagwasya kulanga-langa lugwalo lwabuzuba antoomwe abana babo mafwumofwumo, buzuba abuzuba. Ciindi cakukomba mumukwasyi alimwi aziindi zimwi, mikwasyi ilakonzya kweebelela vidiyo akubandika nzyobeebelela, kubandika zibalo zimwi kuzwa mubbuku lya Young People Ask, kucita cisobano ciyeeme acibalo camu Bbaibbele naa kucita zitondezyo kujatikizya makani ngobabandika. Nokuba boobo, kutegwa bana ‘baye ambele akusima,’ beelede kuyiisyigwa makani malamfwu aakasimpe kamu Bbaibbele.—Heb. 6:1.
Amulange-lange nzyotubayiisya aabo mbotujana mucilawo cesu. Notwabaswaya mulweendo lwakusaanguna naa twapilukila, kanji-kanji inga tulasolekesya kutalisya ciiyo ca Bbaibbele kubelesya bbuku lya Ino Ncinzi Cini Bbaibbele Ncoliyiisya? Twalimana bbuku eeli, tubelesya bbuku lya ‘Amuliyobole Muluyando lwa Leza.’ Ino nkaambo nzi? Nkaambo kakuti bbuku lya Bbaibbele Ncoliyiisya lipa basikwiiya luzyibo lwantalisyo lwamu Magwalo. Bbuku lya ‘Luyando lwa Leza’ libayiisya mbobakonzya kubelesya njiisyo zyamu Bbaibbele mubuumi bwabo. Kwiiya mabbuku oonse obilo aaya cigwasya bapya ‘kusimpa miyanda’ muli Kristo alimwi “akukkalikila mulusyomo.” (Kol. 2:6, 7) Sena mabbuku aaya inga taabagwasya abalo bana besu? Abalo bayandika kuyiisyigwa kujatikizya cinunuzyo, Bwami alimwi aciimo cabantu bafwide. Beelede kuzyiba ikaambo Leza ncalekelede kupenga alimwi ambobakonzya kwaazyiba mazuba aamamanino aabweende bwazintu oobu. Beelede kuba masimpe kuti Bakamboni ba Jehova mbabajisi kasimpe. Bana abalo bayandika kuzimvwisya njiisyo zyamu Bbaibbele alimwi ambobakonzya kuba “amaano aayiisyidwe.” (Heb. 5:14) Masimpe, bazyali beelede kubona ciimo cabana babo alimwi ambobamvwisya zintu. Nokuba boobo, bana banji balakonzya kutalika kumvwisya makani malamfwu aamu Bbaibbele nokuba kuti bacili baniini.—Lk. 2:42, 46, 47.
Mukusola kugwasya bazyali, kuli zyakucita zigwasyilizya kwiiya kuzwa mubbuku lya Bbaibbele Ncoliyiisya zinoojanika a jw.org/toi. Mikwasyi ilakonzya kujana makani aaya a Web site kwiinda mukulanga aalembedwe kuti NJIISYO ZYAMU BBAIBBELE > BAKUBUSI. Kumbele, zyakucita zigwasilizya kwiiya ziyoobambwa kuzwa mubbuku lya ‘Luyando lwa Leza.’ Nokuba boobo, mabbuku aasimbidwe alakonzya kubelesyegwa. Bazyali balakonzya kubona naa inga babelesya mabbuku aaya kwiinda mukwaaba ciindi cimwi lya Kukomba Mumukwasyi mangolezya, ciindi nobayiisya mwana omwe naa ciindi nobayiisya mwana mbokucitwa ciiyo cakwe mwini.