Lufwutuko Lulayandika!
KUMUGOTI nkobasya malasya kufwaafwi aku Pittsburgh, Pennsylvania, U.S.A., muciindi buyo cisyoonto kwakazyula meenda. Babelesi bakumugoti bali fwuka bakasinkilwa mukasena kasyoonto, aalampa mamita aali 73 kuya ansi aawo meenda mpaatakasika. Nokwakainda mazuba otatwe, bakazwa mobakasinkilidwe kabali kabotu. Ino bakafwutulwa buti?
Kwiinda mukugwasyigwa amaapu yamugoti amuncini wabahaazibwene uutondezya aali cintu ciyandaulwa wiitwa kuti Global Positioning System, basikufwutula bakasya cilindi cijisi 65 cm mubwamba akunjizya cikwepe kusika mpobakabede bantu aabo. Bakatalika kubagusya omwe-omwe acikwepe kuzwa abusena mpobakali kukonzya kufwida. Boonse bantu bakagusyigwa bakakkomana, alimwi bakabalumba bakabagusya.
Tobanji kunyina notuya kusinkilwa ansi mumugoti mbuli mbobakasinkilwa basikusya malasya bali fwuka naa kubikka buumi bwesu muntenda. Nokuba boobo, toonse tuyandika kufwutulwa akaambo kakuti tatukonzyi kulifwutula kukuciswa, kucembaala akufwa. Muntu umwi uusyomeka wakaindi wakalemba kuti: “Muntu uuzyedwe kumukaintu ulaputa mazuba mace kazwide bupenzi; Ulafulula mbuli dubaluba elyo ulanyana; Mbuli ceenzule ulazimina.” (Jobu 14:1, 2) Nokuba kuti kwainda myaka iili 3,500, imajwi aaya acibeleka aino, nkaambo toonse tulafwa. Kunyina makani ankotukkala naa busilisi mbotukonzya kujana, tweelede kufwutulwa kumapenzi, kukucembaala alimwi akulufwu.
Basayansi abantu bamwi balabeleka canguzu kusola kulansya buumi kwiinda bantu mbobali kupona lyoonse. Kabunga kamwi kakaamba kuti kajisi mulimo “wakumana lufwu akugwasya baabo bali mukabunga aako kuti bazwidilile amuzeezo wakupona lyoonse.” Nokuba boobo, ikuyaambele kwasayansi kwakuyanda kuzwidilila amuzeezo wakupona lyoonse tiikwapa kuti bantu kabapona myaka minji kwiinda aliyeeyo iili 70 naa 80 yakaambwa a Musa myaka iili 3,500 yainda.—Intembauzyo 90:10.
Kufwumbwa naa mulimvwa mbwaakali kulimvwa Jobu kujatikizya buumi alufwu naa pe, andinywe ‘muyakweenda mbuli cimvwiide mbocimana’ muyakuunka kulamfwu abeenzinyoko, bamukwasyi wanu, ŋanda yanu azintu zyoonse nzyomujisi—mwaakufwa. Mwami musongo Solomoni waku Israyeli yansiku wakalemba kuti: “Nkaambo baumi balizi kuti balafwa, pele bafwide tabezi cintu niciba comwe; tabacijisi impindu, tabaciyeeyegwi limbi.”—Mukambausi 9:5.
Cuusisya ncakuti, kweelana a Bbaibbele mbolipandulula, lufwu lulela bantu mbuli ‘mwami’ silunya. Masimpe, bantu beelede kuvwunwa kulufwu, sinkondonyina. (Ba-Roma 5:14; 1 Ba-Korinto 15:26) Ibabelesi bayiisidwe kabotu kufwutula bantu bali muntenda tabakonzyi kumufwutula cakumaniina. Pele Mulengi wabantu Jehova Leza, wabikka bubambe buli boobu bwakufwutulwa.
Nkotwakajana cifwanikiso icili apeeji 3]
Cakafwotolwa aba Gene J. Puskar-Pool/Getty Images