KASIMPE KA BWAMI​—Kwaabila Cakulya Cakumuuya

AMWEEZYEEZYE kuti sikwiiya Bbaibbele wanu wakkomana ciindi naamvwisya ncolwaamba lugwalo ndomwabala antoomwe anguwe. Asyoonto-syoonto waamba kuti, “Sena mupandulula kuti Bbaibbele liyiisya kuti tulakonzya kupona kukabe kutamani mu Paradaiso—aano anyika mpoonya?” Mweenzyinyoko ngomuli limwi mubukambausi wamweta-mweta akwaamba kuti, “Ino ncinzi ncomwamvwa ncolyaamba Bbaibbele?” Sikwiiya Bbaibbele wagambwa kapati, ulaamba, “Tandikonzyi kusyoma kuti tiindakayiisyigwa kaambo aaka!” Mpoonya mwayeeya kuti ncaamba cilikozyenye ancaakaamba nsondo zisyoonto zyainda naakaiya ciindi cakusaanguna kuti zina lya Leza ngu Jehova.

Sena cakamucitikila kale cintu cili boobo? Bantu ba Leza banji cakabacitikila kale. Zintu zimwi zilakonzya kutuyeezya cipego ciinda kubota ncotwakapegwa—luzyibo lujatikizya kasimpe! Amuyeeye buyo kwaciindi cisyoonto: Ino cipego eeco cakaboola buti kulindinywe? Mucibeela eeci tulaulanga-langa mubuzyo ooyu. Bantu ba Leza mbobali kumunikilwa kumuuya munzila iiyaambele ncitondezyo cilibonya cakuti Bwami bwa Leza mbwancobeni. Kwamwaanda wamyaka, Mwami wa Bwami oobu, Jesu Kristo, wajisi bubi kusinizya kuti bantu ba Leza balayiisyigwa kasimpe.