Mulimo Wakukambauka Bwami—Kumwaya Makani Mabotu Nyika Yoonse Mbwiizulwa

AMWEEZYEEZYE buyo kuti mbuzuba mbomutabeleki mulimo wakumubili alimwi mwalibambila kuunka mumulimo wakukambauka. Mwawayawaya asyoonto nkaambo mulimvwa kukatala. Muciyanda koona asyoonto! Nokuba boobo, mwapaila mpoonya mwasala kuti muunke mumuunda. Mwabeleka amucizyi ucembeede, mpoonya mwakulwaizyigwa akuliyumya kwakwe aluzyalo ndwajisi. Nomuyaabukambauka mulumbe wakasimpe kuŋanda aŋanda, mwayeeya kuti Banakristonyoko abalo balacita mbubwenya oobo nyika yoonse mbwiizulwa, babelesya mabbuku ngamunya aayo ngomubelesya andinywe, boonse balagwasyigwa alwiiyo lukozyenye. Ciindi nomwasika kuŋanda, mwalimvwa kukulwaizyigwa kapati. Mwakkomana kapati akaambo kakuti taakwe nomwakkala buyo aŋanda!

Kwacecino ciindi, mulimo wakukambauka wa Bunakristo ngomulimo mupati wa Bwami bwa Leza. Jesu wakaambila limwi kuti mulimo wakukambauka ngowakali kuyakuba mulimo uubelekwa mumasena manji kapati mumazuba aamamanino. (Mt. 24:14) Ino businsimi bwakwe bwazuzikizyigwa buti? Mucibeela eeci, tulalanga-langa bantu, nzila, azibelesyo izyali kubelesyegwa kapati mumulimo wakukambauka wa Bunakristo, walo iwagwasya mamiliyoni aabantu nyika yoonse mbwiizulwa kutegwa babone kuti Bwami bwa Leza nkobuli ncobeni.