Kutalikila mu September, Kabbuku Kamuswaangano wa Buumi Amulimo kanoobikkilizya cibeela cipya cacitondezyo cacikozyanyo icijisi mutwe wakuti “Amuyiisye Kasimpe.” Makanze eesu anooli aakwaambila bantu kasimpe kamu Bbaibbele kubelesya mubuzyo alimwi alugwalo.

Kuti twabona kuti muntu ulaaluyandisisyo, inga twabamba ntalisyo yalweendo lutobela kwiinda mukwaabila bbuku naa kumutondezya kavidiyo kali a jw.org. Tweelede kupilukila cakufwambaana kutegwa tukazumanane amubandi ngotwakajisi. Eezyi zitondezyo zyacikozyanyo zipya alimwi azibeela zyabasicikolo zinooyeeme aamakani mubufwaafwi aali mucibalo cijanika mubbuku lya Ncinzi Bbaibbele Ncolituyiisya? Mucibeela eeci tuyoojana mibuzyo iiyungizyidwe alimwi amagwalo aakonzya kutugwasya kubamba lweendo lwakupilukila naa kweendelezya ciiyo kubelesya buyo Bbaibbele.

Kuli buyo nzila yomwe iisololela kubuumi. (Mt. 7:13, 14) Mbwaanga tubandika abantu bazulilwa muzikombelo ziindene-indene alimwi bazwa mubukkale bwiindene-indene, tweelede kwaamba kasimpe kamu Bbaibbele munzila iikonzya kubakwelelezya, umwi aumwi kumugama. (1Tim. 2:4) Mbotuyaabwaamvwisya makani aamu Bbaibbele aaindene-indene akuyaambele ‘mukuyiisya akupandulula jwi lyakasimpe bweelede,’ lukkomano lwesu luyoovwula, alimwi tuyoozwidilila mukuyiisya kasimpe kubantu.—2Tim. 2:15.

Bantu munyika yoonse bayandika luumbulizyo. (Muk. 4:1) Mwezi woonse wa September, tuyoobeleka canguzu kwaabila Ngazi Yamulindizi, yalo iyoobandika makani aaluumbulizyo. Amukayaabile magazini eeyi kubantu banji. Nokuba boobo, mbwaanga makanze eesu ngakubandika cacigaminina abantu kutegwa tubaumbulizye, tatukasiyi magazini mumaanda mutakwe bantu.

NCOMWEELEDE KWAAMBA

“Zimwi ziindi toonse tuyandika luumbulizyo. Pele nkuli nkotukonzya kulujana? [Amubale 2 Bakorinto 1:3, 4.] Magazini eeyi ya Ngazi Yamulindizi ilaamba nzila Leza mbwabaumbulizya bantu.”

Ikuti muntu watondezya luyandisisyo akutambula magazini, . . .

AMUTONDEZYE VIDIYO YAKUTI NKAAMBO NZI NCOMWEELEDE KWIIYA BBAIBBELE?

Mpoonya amwaambe bubambe bwaciiyo ca Bbaibbele.

AMUBAMBE NTALISYO YALWEENDO LWAKUPILUKILA

Amubuzye mubuzyo ngomuyakwiingula mwaakupilukila, mbuli wakuti “Nkaambo nzi Leza ncazumizya kupenga?”