Basikupandulula Bweende Bwanyenyeezi Baswaya Jesu

Baalumi bamwi baboola kuzwa Kujwe. Aaba mbaasikupandulula bweende bwanyenyeezi, ibaalumi balingula mbozikkede nyenyeezi, ibalitaminina kuti kwiinda mukucita boobo balakonzya kuzyiba ncozyaamba zintu zicitika mubuumi bwabantu. (Isaya 47:13) Kabacili kwabo Kujwe bakabona “nyenyeezi,” mpoonya bakaitobela kwamyaanda yamakkilomita, kutali kuya ku Betelehemu, pele kuya ku Jerusalemu.

Bacisika buyo ku Jerusalemu, babuzya kuti: “Uli kuli ooyo wakazyalwa kali mwami waba Juda? Nkaambo twakabona nyenyeezi yakwe notwakali Kujwe, aboobo twaboola kuzoomufwugamina.”​—Matayo 2:1, 2.

Mwami Heroda waku Jerusalemu waamvwa makani aaya eelyo wanyema kapati. Aboobo waita basilutwe babapaizi abasololi bambi bacikombelo caba Juda akubabuzya nkwayoozyalilwa Kristo. Kabaingula kweelana azili mu Magwalo baamba kuti: “Ku Betelehemu.” (Matayo 2:5; Mika 5:2) Mpoonya Heroda walailila kuti basikupandulula bweende bwanyenyeezi baletwe kulinguwe cakusisikizya, kumane wabaambila kuti: “Kamuya mukamuyandaule cakulomya mwana ooyu, eelyo mwaakumujana muzoondaambile kutegwa andime ndikaunke kuyoomufwugamina.” (Matayo 2:8) Pele mubwini Heroda uyanda kuti aamujana mwana ooyo amujaye!

Mbobazwida buyo basikupandulula bweende bwanyenyeezi, kwacitika cintu cigambya. “Nyenyeezi” njobakabona nobakali Kujwe yalibonya alimwi kaiyaabweenda kumbele lyabo. Cilisalede kuti, eeyi nyenyeezi taili nyenyeezi buyo pe, yapedwa kuti ibasololele. Aaba basikupandulula bweende bwanyenyeezi baitobela kusikila mane yaima atala aŋanda aawo mpobakkala lino ba Josefa, Mariya alimwi amwanaabo.

Basikupandulula bweende bwanyenyeezi nobanjila muŋanda, bajana Mariya amwanaakwe Jesu, walo uucili muniini. Mpoonya bamufwugamina akumukotamina mwana. Alimwi bamupa zipego zyangolida atununkilizyo twalibano alimwi atwamuro. Kumane boobo, nobayanda kunyamuka kuti bapilukile kuli Heroda, Leza wabacenjezya muciloto kuti bataciti oobo. Aboobo bapiluka kucisi cokwabo kubelesya nzila imbi.

Ino muyeeya kuti nguni wakapa “nyenyeezi” eeyo iyakali kusololela basikupandulula bweende bwanyenyeezi? Amuyeeye kuti nyenyeezi eeyo tiiyakabasololela cacigaminina kuli Jesu ku Betelehemu. Muciindi caboobo, yakasaanguna kubasololela ku Jerusalemu, ooko nkobakaakujana Mwami Heroda walo iwakali kuyanda kujaya Jesu. Alimwi buya naakamujaya ikuti Leza naatakabweza ntaamu akubacenjezya kuti bataunki kuyakumwaambila Heroda nkwaakabede Jesu. Cilisalede kuti ngusinkondonyina Leza, Saatani, iwakali kuyanda kuti Jesu ajaigwe, eelyo wakabelesya nyenyeezi ikusola kuzuzikizya makanze aakwe.