Batija Muleli Mubi

Josefa wabusya Mariya kutegwa amwaambile makani aayandika kubweza ntaamu cakufwambaana. Mungelo wa Jehova wazwa akulibonya kulinguwe muciloto akumwaambila kuti: “Buka, bweza mwana abanyina utijile ku Egepita, ukakkale okuya kusikila nkakwaambile kuti upiluke, nkaambo Heroda uyanda kutalika kumuyandaula mwana kutegwa amujaye.”​—Matayo 2:13.

Mpoonya aawo, Josefa, Mariya alimwi amwanaabo batija masiku. Alimwi buya bafwutukila kumpela aamala, nkaambo Heroda wazyiba kuti basikupandulula bweende bwanyenyeezi bamweena. Wakabaambilide kuti bapiluke kulinguwe akumwaambila ncobajana. Muciindi caboobo, bakazwa mucisi kakunyina kucita oobo. Aboobo Heroda wakalala kapati. Pele kacijisi makanze aakujaya Jesu, walailila kuti bajaigwe bana balombe boonse baku Betelehemu amasena oonse aayengelede ibajisi myaka yobilo yakuzyalwa akuyaansi. Eeyi myaka waibalila kweelana amakani ngobakamwaambila basikupandulula bweende bwanyenyeezi ibakazwa Kujwe.

Ooko kujaigwa kwabana basankwa boonse kulausisya kapati! Tatuzyi naa bali bongaye bana basankwa aabo ibakajaigwa, pele kulila akoomoka kupati kwabamanyina kwazuzikizya businsimi bwamu Bbaibbele mbwaakaamba Jeremiya, imusinsimi wa Leza.​—Jeremiya 31:15.

Aciindi eeci, Josefa amukwasyi wakwe batijila ku Egepita, alimwi bazumanana kukkala ooko. Mpoonya buzuba bumwi masiku, mungelo wa Jehova walibonya alimwi muciloto kuli Josefa. Mungelo waamba kuti: “Buka, bweza mwana abanyina uunke kucisi ca Israyeli, nkaambo aabo ibakali kuyandaula buumi bwamwana bakafwa.” (Matayo 2:20) Aboobo Josefa lino wazyiba kuti mukwasyi wakwe inga wapiluka kucisi cokwabo. Eeci capa kuti buzuzikizyigwe businsimi abumbi bwamu Bbaibbele ibwaamba kuti Mwana wa Leza uyakwiitwa kuzwa mu Egepita.​—Hosea 11:1.

Kulibonya kuti Josefa uyanda kuti mukwasyi wakwe ukakkale ku Judaya, ambweni munsi-munsi aamunzi wa Betelehemu, ooko nkobakali kukkala kabatanatijila ku Egepita. Pele wamvwa kuti Arikelao imwana mubi wa Heroda lino ngomwami wa Judaya. Mpoonya muciloto cimbi Jehova wacenjezya Josefa kujatikizya ntenda eeyi. Aboobo Josefa amukwasyi wakwe baindilila, bagama kunyika akuyakukkala mumunzi wa Nazareta mucooko ca Galilaya, ikulamfwu acisiko cabukombi bwaba Juda. Oomu momuciinga mwaakomenena Jesu, calo icazuzikizya businsimi abumbi bwakuti: “Uyootegwa muna Nazareta.”​—Matayo 2:23.