Basicinsenda Bali Kkumi Baponesyegwa​—Omwe Watondezya Kuti Walumba

Naamana kunyonganya makanze aabamu Nkuta Mpati Yaba Juda aakuti bamujaye, Jesu waunka kumunzi wa Efraimu, uuli kulubazu lwakunyika lwaajwe kwa Jerusalemu. Wakkala ooko abasikwiiya bakwe, kulamfwu abasinkondonyina. (Johane 11:54) Nokuba boobo, ciindi ca Pobwe Lyakwiindilila lyamu 33 C.E. cilaafwaafwi kusika, aboobo lino-lino Jesu ulatalika lweendo lwakwe alimwi. Waunka kulubazu lwakunyika kwiinda mu Samariya mpoonya ngooyo waunka ku Galilaya; eeci nciindi cakwe camamanino cakuswaya busena oobu katanafwa.

Kumatalikilo aalweendo oolu, ciindi Jesu nali mukweenda kumunzi amunzi, wayaanya baalumi ibali kkumi basicinsenda. Misyobo imwi yabulwazi oobu asyoonto-syoonto ilalya mubili wamuntu, mbuli nyama iili kuminwe yamaanza amaulu, naa yakumatwi. (Myeelwe 12:10-12) Mulawo wa Leza waamba kuti sicinsenda weelede koompolola kuti, “Ndilisofweede, ndilisofweede!” akukkala alikke kulamfwu abantu.—Levitiko 13:45, 46.

Aboobo, basicinsenda bali kkumi aaba baimina kulamfwu a Jesu. Nokuba boobo, boompolola ajwi pati kuti: “Jesu, O Mwiiyi, tufwide luse!” Jesu naababona basicinsenda aaba, wabaambila kuti: “Kamuya mukalitondezye kubapaizi.” (Luka 17:13, 14) Aboobo watondezya kuti ulaulemeka Mulawo wa Leza, walo uubapede nguzu bapaizi zyakwaamba basicinsenda ibazwa akuponesyegwa kubulwazi bwabo kuti basalala. Lino balakonzya kutalika alimwi kukkala abantu batajisi bulwazi oobu.—Levitiko 13:9-17.

Basicinsenda ibali kkumi balaalusyomo lwakuti Jesu ulaanguzu zyakucita maleele. Batalika kweenda kuyoobona bapaizi, nokuba kuti tabanaponesyegwa. Nobacili munzila, ilusyomo ndobajisi muli Jesu lwabajanya bubotu. Ma, batalika kubona akulimvwa kuti bapona!

Basicinsenda basalazyidwe ibali fwuka bazumanana kuunka. Pele umwi waima. Ooyu mwaalumi, mu Samariya, wapiluka kuli Jesu. Ino wapilukila nzi? Mwaalumi ooyu ulilumbide kapati kuli Jesu akaambo kaceeco cacitika. Ooyo iwali sicinsenda ‘watembaula Leza ajwi pati,’ mbwaanga wazyiba kuti mubwini ngu Leza wapa kuti aponesyegwe. (Luka 17:15) Naasika kuli Jesu, wamuvwuntamina akumulumba.

Kuli baabo bamuzingulukide, Jesu waamba kuti: “Sena tiibali kkumi basalazyigwa? Aboobo, ino bamwi bali fwuka bali kuli? Sena kunyina umbi wapiluka kuzootembaula Leza ccita buyo muntu ooyu wamasi?” Mpoonya Jesu waambila mu Samariya ooyu kuti: “Nyamuka uunke; lusyomo lwako lwakuponya.”—Luka 17:17-19.

Kwiinda mukuponya basicinsenda bali kkumi, Jesu watondezya kuti ugwasyigwa aa Jehova Leza. Lino, umwi wabaabo bali kkumi tanaaponesyegwa buyo a Jesu pele kuboneka kuti uli munzila iitola kubuumi. Tatuponi kuciindi Leza nabelesya Jesu kuponya bantu munzila eeyi yamaleele. Pele, kwiinda mukusyoma Jesu, tulakonzya kuba munzila iitola kubuumi, nkokuti buumi butamani. Sena tulatondezya kuti tulalumba mbubonya mbwaakacita mwaalumi uulya mu Samariya?