Ikuzuzikizya Cikonke naa Cipangano Cesu Cakulyaaba

¹ Kufwumbwa naa mwakabbapatizyigwa ino-ino antela nkaindi, mweelede kuti muciyeeyede kujatikizya ntaamo eeyo iiyandika kapati njomwakabweza mubuumi bwanu. Ikubbapatizyigwa taali ngamamanino pe, pele mmatalikilo buyo aamulimo weelede kucitwa mubuumi boonse bwabantu balyaabide. (1 Joh. 2:17) Ino ncinzi cijatikizyidwe mukuzuzikizya cikonke cesu cakulyaaba?

² Amutobele Cikozyanyo ca Kristo: Mbwaakabbapatizyigwa buyo, Jesu ‘wakatalika mulimo wakwe’ wakwaambilizya “Makani Mabotu aa-Bwami bwa-Leza.” (Lk. 3:23; 4:43) Mbubwenya buyo, twamana kutondezya kulyaaba kwesu kuli Jehova kwiinda mukubbapatizyigwa, tulaba basimilimo bamakani mabotu ibasalidwe. Nokuba kuti tuyanda ciindi cinji alimwi akusolekesya kutegwa tukonzye kujana ziyandika zyakumubili, imulimo wesu mupati mmulimo wa Bunakristo. (Mt. 6:33) Muciindi cakuyandisya kujana lubono naa mpuwo, aabo balyaabide kuli Leza balayandisya ‘kulemeka mulimo wabo’ kweelana ambuli bwakacita mwaapostolo Paulo. (Rom. 11:13) Sena mulacikkomanina coolwe caalubazu cakubelekela Jehova alimwi akucita mbuli mbomukonzya ikutegwa mulemeke mulimo wakwe ngomubeleka?

³ Kweelana ambuli bwakacita Jesu, aswebo tweelede ‘kumukazya Diabolosi.’ (Jak. 4:7) Saatani wakamusunka Jesu ciindi Naakamana kubbapatizyigwa, asunu ncimwi buyo ulibafwungilide kapati babelesi ba Jehova balyaabide. (Lk. 4:1-13) Akaambo kakuti tuli munyika yeendelezyegwa a Saatani, tweelede kuba bantu balilemeka alimwi batantamuka cintu cili coonse icikonzya kutunyonganya mumizeezo yesu alimwi akoongelezya moyo wesu. (Tus. 4:23; Mt. 5:29, 30) Banakristo balaililwa kuti tabeelede “kwaabilwa kuntafule ya-Mwami akuntafule yabadaimona.” (1 Kor. 10:21) Eeci cipandulula kuti tweelede kuzitantamuka zyakulikondelezya zitali kabotu, kuyanzana abantu babyaabi alimwi antenda zikonzya kuboola akaambo kakubelesya Internet munzila iiteelede. Alimwi cilayandika kuti twaatantamuke mabbuku aabasiluleyo. Ikuzicenjelela zintu eezi alimwi anzila zimwi zyabucenjezu zya Saatani, kuyootugwasya kuzuzikizya cikonke cesu cakulyaaba.

⁴ Amububelesye Bubambe bwa Jehova: Ikutegwa atugwasye kuzuzikizya cikonke cesu cakulyaaba, Jehova watugwasya kwiinda mu Jwi lyakwe alimwi ambungano ya Bunakristo. Ikubala Bbaibbele alimwi akupaila kuli Jehova acibe cilengwa canu buya cabuzubaa buzuba. (Jos. 1:8; 1 Tes. 5:17) Amwiikkomanine miswaangano yambungano. (Int. 122:1) Kamuyanzana abantu bayoowa Jehova alimwi akubamba malailile aakwe.—Int. 119:63.

⁵ Kwiinda mukugwasyilizyigwa a Leza, mulakonzya kuzuzikizya cikonke cakulyaaba kwanu kuli Jehova, eelyo akujana lukkomano mukubelekela nguwe lyoonse.—Int. 22:26, 27; Flp. 4:13.

Imulimo Uuyandika Kulicesya

¹ Ijwi lya Leza litulailila kuti tweelede kuba ‘amoyo mutete, batabweedezyi cibi kucibi, pele ibabweedezya cilongezyo.’ (1 Pet. 3:8, 9) Ilulayo oolu lulabeleka mumulimo wabukambausi. Masimpe, mulimo wa Bunakristo ulakonzya kuba mulimo uusunka kulicesya kwesu.

² Ikulicesya mbube butugwasya kutegwa tuliyumye mubukkale bukatazya kapati. Ciindi notukambauka tulabasikila bantu mbotutazyi, kakunyina kupangana kuti tuyoobaswaya, alimwi tulizyi buya kuti bamwi bayootutanda calunya. Kuyandika kulicesya ikutegwa tucikonzye kukambauka kubantu bali boobu. Mucilawo cimwi cikatazya kapati, bacizi bobilo bapainiya bakali kukambauka abuzuba kuŋanda aŋanda kwamyaka yobilo kakunyina muntu wakazumina kubandika ambabo! Nokuba boobo bakaliyumya, eelyo sunu kuli mbungano zyobilo mubusena oobu.

³ Kweendelezya Basibukali: Ikulicesya kuyootugwasya kwiiya Jesu ciindi bantu bamwi nobatajisi lubomba naa kutatulemeka. (1 Pet. 2:21-23) Aŋanda imwi mucizi umwi wakafwubaazyigwa kapati. Iwakatalika kumufwubaazya mmukaintu amane awalo mulumaakwe wanjililila eelyo akumutanda mucizi ooyu aŋanda yabo. Imucizi ooyu wakamwetamweta buyo akwaamba kuti wakali kulombozya kuti akaambaule ambabo buzuba bumbi. Eeci cakabajatikizya kapati banabukwetenyi aaba cakunga nikwakasika Kamboni uumbi bakaswiilila alimwi bakazumina ciindi nobakatambwa kuti bakajanike kumuswaangano ku Ŋanda ya Bwami. Imucizi ngobakatandide wakaboola akubaanzya alimwi akubakambaukila. Andiswe mbubwenya tulakonzya kubagwasya aabo bakazya kuti bayozye-yozye kwiinda mukuba ‘amoyo mutete akubalemeka.’—1 Pet. 3:15; Tus. 25:15.

⁴ Mutalisumpuli: Iluzibo lwamu Bbaibbele ndotujisi talutupi kuti bantu tutalike kubabona kuti taakwe ancobazyi naa ikutalika kubaubula. (Joh. 7:49) Pele, Jwi lya Leza litulaya kuti tatweelede ‘kusampaula muntu pe.’ (Tit. 3:2) Ikuti naa tuli batete moyo mbuli bwakali Jesu, tulakonzya kubakatalusya bantu. (Mt. 11:28, 29) Ikusikila bantu cakulicesya kulakonzya kupa kuti mulumbe wesu ukondelezye.

⁵ Masimpe, kulicesya kulakonzya kutugwasya kuliyumya kubeleka mucilawo cikatazya. Kulakonzya kupa kuti aabo bakaka bayozye-yozye alimwi akupa kuti bantu bazumine kuswiilila mulumbe wa Bwami. Kunze lyaboobo, kulamukkomanisya Jehova walo ‘uubafwida luzyalo batete myoyo.’—1 Pita 5:5, Ci.