Ino Jehova Uyoomuyeeya Buti?
“UTANDILUBI, O Leza wangu!” “Kondiyeeya O Leza wangu.” Iziindi zinjaanji Nehemiya wakakombelezya Leza mumajwi ayo. (Nehemiya 5:19; 13:14, 31) Ncilengwa cakuzyalwaaco buya ikukombelezya Leza munzila ili boobo ibantu nobali mumapenzi mapati.
Pele ino ncinzi cinga cili mumizeezo yabantu nobalomba Leza kuti akabayeeye? Basyoma kuti Leza uyoocita zintu zimbi kunze lyakwiile kuyeeya buyo mazina aabo. Cakutadooneka, basyoma mbuli cigwebenga cimwi akati kazeezyo zyobile zyakakankamidwe aa Jesu. Mukwiindana amweenzinyina, omwe wakalomba Jesu kuti: “Ukandiyeeye, Mwami, waakusika mubwami bwako.” Wakalombozya kuti Jesu atakamuyeeyi buyo mbwaakabede, pele kuyoomucitila cintu cimwi—ikuyoomubusya kubafwu.—Luka 23:42.
Muzibeela zyoonse, Ibbaibbele litondezya kuti kuli Leza, “ikuyeeya” caamba kubweza ntaamu iigwasya. Mucikozyanyo, ibantu nobakakukululwa anyika akupaya kwamaanzi aazambangulwe kwamazuba aali 150, “Leza wakaibaluka Nowa . . . . Mpawo Leza wakaungya muuwo anyika, nkabela maanzi akatalika kuyosa.” (Matalikilo 8:1) Kakwiindide myaanda yamyaka iili mbwiibede, Samsoni iwakawofwaazidwe akwaangwa aba Filisti wakapaila kuti: “Jehova, ndakumbila kuti undiyeeye akundipa inguzu ciindi comwe buyo.” Jehova wakamuyeeya Samsoni kwiinda mukumupa nguzu zigambya cakuti wakakonzya kulibweedezezya bubi kuli basinkondonyinaa Leza. (Babetesi 16:28-30) Ikujatikizya Nehemiya, Jehova wakalongezya kusoleka kwakwe, elyo bukombi bwakasimpe bwakapilusigwa mu Jerusalemu.
Imwaapostolo Paulo wakalemba kuti: “Makani aali boobo aakalembwa kalekale, nku[u]kwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.” (Ba-Roma 15:4) Ikuti twamuyeeya Jehova kwiinda mukuyandaula akucita kuyanda kwakwe mbubwena ibwakacita babelesi bakwe basyomeka musyule, tulakonzya kusyoma kuti Jehova uyootuyeeya kwiinda mukutugwasya kujana zintu nzyotuyandika abuzuba akwiinda mukutugwasilizya mumasukusyo alimwi akwiinda mukuyootufwutula eelyo aakubeteka bantu bataluleme.—Matayo 6:33; 2 Petro 2:9.