Eelo kaka bamakaintu bagambwa nobasika kucuumbwe ca Jesu akujana kuti tako mucuumbwe! Mariya Magadalene walunduka kuya “kuli Simoni Petro akuli sikwiiya umbi, ooyo Jesu ngwaakali kuyandisya,”—mwaapostolo Johane. (Johane 20:2) Pele bamakaintu bambi ibali kucuumbwe babona mungelo. Mukati mucuumbwe kuli mungelo umbi, ‘uusamide cisani cilamfwu cituba.’—Marko 16:5.

Mungelo omwe wabaambila kuti: “Mutayoowi pe, nkaambo ndilizyi kuti muyandaula Jesu iwakajaigwa aacisamu. Tako muno pe, nkaambo wabusyigwa kweelana ambwaakaamba. Amuboole mubone busena mpaakalede. Lino kamuya cakufwambaana mukaambile basikwiiya bakwe kuti wabusyigwa kubafwu, amubone! Wamusolweda kuya ku Galilaya.” (Matayo 28:5-7) Aboobo “kabakankama akugambwa kapati,” bamakaintu balunduka akuyakwaambila basikwiiya.—Marko 16:8.

Aciindi eeci, Mariya wamujana Petro a Johane. Kafwooma waamba kuti: “Bamugusya Mwami mucuumbwe, pele tatuzyi nkobamulazika.” (Johane 20:2) Petro a Johane balulyata kuya kucuumbwe. Akaambo kakuba aalubilo Johane wasaanguna nguwe kusika kucuumbwe. Wasondela mukati akubona milembo, pele tanaanjila pe.

Petro naasika, tanaaima-ima pe, waile kunjila mukati. Wabona zisani zyamulembo muuba-uba alimwi acisani ncobakamuzambaide Jesu kumutwe. Lino awalo Johane wanjila akusyoma majwi aa Mariya. Nokuba kuti Jesu wakalaambide makani aaya musyule oomu, aaba bobilo tiibamvwisya kuti wabusyigwa. (Matayo 16:21) Kabazyingidwe, baunka kuŋanda. Pele Mariya walo iwajokela kucuumbwe, wasyaala ooko.

Kulubazu lumwi, bamakaintu bambi baunka kuyakwaambila basikwiiya kuti Jesu wabusyigwa. Nobali munzila kabayaabulunduka, Jesu wabayaanya akubaambila kuti: “Mwapona!” Bavwuntama ansi kumaulu aakwe “akumufwugamina.” Mpoonya Jesu wabaambila kuti: “Mutayoowi! Kamuya, mukabaambile bakwesu kuti baunke ku Galilaya, eelyo ooko bayoondibona.”—Matayo 28:9, 10.

Musyule oomu, ciindi nokwacitikide muzuzumo wanyika alimwi anobalibonya bangelo, basikalumamba ibali kucuumbwe ‘bakankama akuba mbuli bantu bafwide.’ Nobapempenuka, banjila mumunzi ‘akwaambila basilutwe babapaizi zintu zyoonse izyacitika.’ Bapaizi balivwiya-vwiya abaalu baba Juda. Basala kuti babape cisinkamulomo basikalumamba kutegwa baalyatile makani akwaamba kuti: “Basikwiiya bakwe bakaboola masiku akumubba notwakali koona.”—Matayo 28:4, 11, 13.

Basikalumamba bana Roma balakonzya kujaigwa ikuti bajanwa kuti baloona nobalinda, aboobo bapaizi babasyomezya kuti: “Ikuti naa eeci [nkokuti, makani aakubeja aakuti bali koona] akacimvwe mweendelezi tuyoomupandulwida makani mbwaabede, aboobo nywebo tamweelede kulibilika.” (Matayo 28:14) Basikalumamba batambula cisinkamulomo akucita mbuli mbobaamba bapaizi. Aboobo makani aakubeja aakuti mubili wa Jesu wakabbigwa amwaika koonse-koonse akati kaba Juda.

Mariya Magadalene ucilila kucuumbwe. Naasondela kuti alange mukati mucuumbwe, wabona bangelo bobilo basamide zisani zituba bu! Omwe ukkede kumutwe, umbi kumaulu aawo mpowalede mubili wa Jesu. Babuzya kuti: “Omukaintu, ino ulila nzi?” Mariya waingula kuti: “Bamugusya Mwami wangu, pele tandizyi nkobamuzikkila.” Naacenguluka, Mariya wabona muntu umwi. Muntu ooyo wainduluka mubuzyo wabangelo akuyungizya kuti: “Nguni ngoyandaula?” Lino Mariya kayeeya kuti muntu ooyo mubelesi wamumuunda, wati: “Ikuti naa waubweza mubili wakwe, kondaambila nkowauzikka, nkaubweze.”—Johane 20:13-15.

Mubwini, Mariya waambaula a Jesu iwabusyigwa, pele aciindi eeci tanaamuzyiba pe. Nokuba boobo, muntu ooyo naamba kuti “Mariya!” wamuzyiba kuti ngu Jesu, wamuzyibila kujwi lyakwe kweelana ambwavwula kwaambaula anguwe. Cakukkomana Mariya wati: “Rabboni!” (nkokuti “Mwiiyi!”). Pele, akaambo kakuyoowa kuti ulaafwaafwi kuunka kujulu, Mariya wamujatilila Jesu. Aboobo, Jesu wamwaambila kuti: “Koleka kundijatilila, nkaambo tandinaunka kujulu kuli Taata. Pele koya kubakwesu ukabaambile kuti, ‘Ndilaunka kujulu kuli Taata alimwi a Bauso, kuli Leza wangu a Leza wanu.’”—Johane 20:16, 17.

Mariya walunduka akuya kubusena ooko baapostolo alimwi abasikwiiya bambi nkobabungene. Wabaambila kuti: “Ndamubona Mwami!” nkokuti awalo wacitila bumboni kumakani ngobamvwa kuli bamakaintu aabo bambi. (Johane 20:18) Nokuba boobo, milumbe eeyi ‘yalibonya kuba yabufwubafwuba kulimbabo.’—Luka 24:11.

Mu Nsondo, Nisani 16, basikwiiya balityompedwe kapati. Tabazyi ncocaamba kuti mubili wa Jesu tauko mucuumbwe. (Matayo 28:9, 10; Luka 24:11) Kumazuba ibuzuba mbubonya oobu, Kileopa alimwi asikwiiya umbi bazwa mu Jerusalemu akuunka ku Emau, ikulampa makkilomita aatandila ku 12 kuzwa ku Jerusalemu.

Nobayaabweenda, bayaabubandika zintu izyacitika. Mpoonya muntu ngobatazyi wabasangana. Wababuzya kuti: “Ino makani nzi aaya ngomwaambaula nomuyaabweenda?” Kileopa waingula kuti: “Sena uli mweenzu uukkede alikke mu Jerusalemu aboobo tozyi zintu zyalikucitika mulinguwo mazuba aaya?” Muntu ooyo wabuzya kuti: “Izintu nzi?”—Luka 24:17-19.

Baamba kuti: “Izintu zijatikizya Jesu waku Nazareta, . . . twakali kulangila kuti ooyu muntu ngonguwe ooyo iwakali kuyoofwutula Israyeli.”—Luka 24:19-21.

Kileopa amweenzinyina bazumanana kuluula zintu izyacitika mubuzuba mbubonya oobu. Baamba kuti bamakaintu bamwi ibaunkide kucuumbwe nkwaakazikkilwa Jesu bajana kuti tako pe mulincico alimwi akuti bamakaintu aaba balibonena ameso aabo cintu cimwi cigambya—babona bangelo ibabaambila kuti Jesu muumi. Alimwi bapandulula kuti bamwi akati kabo baluunkide kucuumbwe eelyo “baakucijana mbubonya oobo mbuli bwali kwaamba bamakaintu.”—Luka 24:24.

Cilisalede kuti basikwiiya aaba bobilo balikopene nkaambo tabazyi ncocaamba eeci cacitika. Muntu ooyo ngobatazyi wabaambila cabwami ikubalulamika mizeezo, eeyo iyapa kuti myoyo yabo kaitamvwisyi, wati: “Nywebo nobafwubafwuba abasimyoyo iimuka kusyoma zintu zyoonse nzyobakaamba basinsimi! Sena tiicakali kuyandika kuti Kristo apenge zintu eezyi akunjila mubulemu bwakwe?” (Luka 24:25, 26) Kumane wabapandulwida zibalo zinji zyamu Magwalo izyaamba kujatikizya Kristo.

Mpoonya boonse botatwe basika munsi-munsi aku Emau. Basikwiiya aaba bobilo bayanda kumvwa zinji, aboobo bamukombelezya kuti: “Kokkala buyo andiswe nkaambo kuyanda kuba kumangolezya alimwi buzuba buyanda kumana.” Wazumina, eelyo bakkala kuti balye. Muntu ooyu naapaila, naakomauna cinkwa akubapa, bamuzyiba, pele ndilyonya wazimaana. (Luka 24:29-31) Lino bazyiba kuti ncobeni Jesu muumi!

Cakukondwa basikwiiya bobilo baamba kujatikizya cabacitikila, bati: “Sena myoyo yesu tiiyali kupya muzyamba zyesu ciindi naali kwaambaula andiswe munzila, anaali kutupandulwida Magwalo?” (Luka 24:32) Bajokela cakufwambaana ku Jerusalemu, nkobaakujana baapostolo alimwi abamwi mbocili limwi. Kileopa amweenzinyina kabatanaluula makani aabo, bamvwa bambi ibaamba kuti: “Masimpe Mwami wabusyigwa alimwi walibonya kuli Simoni!” (Luka 24:34) Mpoonya abalo baamba kujatikizya mbwaalibonya kulimbabo Jesu. Inzya, abalo mbaakamboni ibalibonena ameso aabo.

Lino boonse bagambwa, Jesu walibonya muŋanda mobabede! Masimpe eeci cilagambya nkaambo baliikkiide milyango akaambo kakuyoowa ba Juda. Nokuba boobo, Jesu ngooyu buya uliimvwi akati kabo. Ajwi libombe wabaambila kuti: “Amube aluumuno.” Pele balo bayoowa kapati. Mbuli mbobakayeeya aciindi cimwi, ‘bayeeya kuti babona muuya.’—Luka 24:36, 37; Matayo 14:25-27.

Kutegwa atondezye kuti tacili cilengaano ncibabona naa kuti ncintu cimwi buyo cakuyeeyela, pele kuti ujisi mubili wanyama, Jesu wabatondezya maanza amaulu aakwe akubaambila kuti: “Nkaambo nzi ncomupenga kapati mumizeezo alimwi nkaambo nzi ncomudonaika mumyoyo yanu? Amubone maanza amaulu aangu, musinizye kuti ndendime ncobeni; amundijate-jate mubone, nkaambo muuya tuujisi nyama azifwuwa mbuli zyeezyi nzyomubwene nzyondijisi mebo.” (Luka 24:36-39) Bakondwa kapati akugambwa, pele tabanasyoma cakumaninina.

Alimwi kutegwa abagwasye kuzyiba kuti ngonguwe ncobeni, wababuzya kuti: “Sena kuli cakulya ncomujisi aano?” Watambula cibeela canswi iiyokedwe akucilya. Mpoonya waamba kuti: “Aaya ngamajwi ngendakamwaambila nindakacili andinywe [kanditanafwa], kuti zintu zyoonse zilembedwe mu Mulawo wa Musa amu Basinsimi amu Intembauzyo kujatikizya ndime zileelede kuzuzikizyigwa.”—Luka 24:41-44.

Jesu wagwasyide Kileopa amweenzinyina kumvwisya Magwalo, eelyo wacita oobo lino kuli baabo boonse babungene aawa, wati: “Kulilembedwe kuti: Kristo wakali kuyoopenga alimwi akubuka kubafwu mubuzuba bwatatu, alimwi kwiinda muzina lyakwe, mulumbe wakuti bantu beempwe kutegwa zibi zilekelelwe wakali kuyookambaukwa muzisi zyoonse—kutalikila mu Jerusalemu. Muyooba bakamboni bazintu eezyi.”—Luka 24:46-48.

Akaambo kakaambo kamwi katazyibidwe kabotu, mwaapostolo Tomasi tako pe aawa. Mumazuba aatobela, ibamwi bamwaambila cakukondwa kuti: “Twamubona Mwami!” Pele Tomasi wati: “Ccita kuti ndizibone zilonda zyampikili mumaanza aakwe akubikka munwe wangu muzilonda zyampikili alimwi akubikka janza lyangu mumabambo aakwe, nsikoosyoma pe.”—Johane 20:25.

Nokwainda mazuba aali lusele, basikwiiya babungana alimwi kabalikkiilide, pele aciindi eeci Tomasi nkwali awalo. Jesu walibonya akati kabo kajisi mubili wanyama akubaanzya kuti: “Amube aluumuno.” Kumane Jesu walanga Tomasi akumwaambila kuti: “Bikka munwe wako aawa ubone maanza aangu, alimwi leta janza lyako akulibikka mumabambo aangu. Koleka kudooneka utalike kusyoma.” Tomasi wakankamuka kuti: “O Mwami wangu, O Leza wangu!” (Johane 20:26-28) Inzya, lino tacidooneki kuti Jesu muumi kali mbuli Leza alimwi mwiiminizi wa Jehova Leza.

Mpoonya Jesu wati: “Sena wasyoma lino akaambo kakuti wandibona? Balikkomene aabo ibasyoma kabatanabona.”—Johane 20:29.