Nkaambo Nzi Bakamboni ba Jehova Ncobatatoli Lubazu Mumapobwe naa Muzilengwa Zimwi?

• Ino Bakamboni ba Jehova bazyiba buti naa baleelede kutola lubazu mupobwe naa mucilengwa cimwi?

• Sena Bakamboni ba Jehova, ibatatoli lubazu mumapobwe naa muzilengwa zimwi, balabayanda banamukwasyi?

• Sena Bakamboni ba Jehova baambila bantu kuti kabatatoli lubazu mumapobwe naa muzilengwa zimwi?

Ino Bakamboni ba Jehova bazyiba buti naa baleelede kutola lubazu mupobwe naa mucilengwa cimwi?

Kabatanasala naa baleelede kutola lubazu mupobwe naa mucilengwa cimwi, Bakamboni ba Jehova basaanguna kuvwuntauzya mu Bbaibbele. Mapobwe alimwi azilengwa zimwi, zilakazyanya anjiisyo zyamu Bbaibbele. Kuti caba boobo, Bakamboni ba Jehova tabatoli lubazu. Kujatikizya mapobwe azilengwa zimwi, Kamboni umwi aumwi ulalisalila, alimwi ulasolekesya “kuba amanjezyeezya aasalala kuli Leza akubantu.”​—Milimo 24:16.

Mibuzyo iitobela njemibuzyo njobalibuzya Bakamboni ba Jehova ciindi nobayanda kusala naa baleelede kutola lubazu mupobwe naa mucilengwa cimwi.a

• Sena pobwe naa cilengwa eeco ciyeeme aanjiisyo iitali yamu magwalo?

  Njiisyo yamu Bbaibbele: “‘Aboobo amuzwe akati kabo, akulyaandaanya,’ mbwaamba Jehova, ‘alimwi amuleke kuguma cintu cisofweede.’”​—2 Bakorinto 6:​15-​17.

  Kutegwa balyaandanye cakumaninina kunjiisyo zyakubeja, nkokuti zikazyanya ancolyaamba Bbaibbele, Bakamboni ba Jehova tabatoli lubazu mumapobwe naa muzilengwa iziyeeme azintu zitobela.

  Mapobwe naa zilengwa ziyeeme aabukombi bwakubeja. Jesu wakati: “Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.” (Matayo 4:​10) Kwiinda mukutobela lulayo oolu, Bakamboni ba Jehova tabasekeleli Kkilisimasi, Isita, naa Labour Day, mbwaanga mapobwe naa zilengwa eezyi ziyeeme aabaleza bakubeja kutali Jehova. Kuyungizya waawo, tabatoli lubazu mumapobwe naa muzilengwa eezyi zitobela.

  • Kwanzaa. Izina lyakuti Kwanzaa “lizwa kumabala aaci Swahili aakuti matunda ya kwanza, aamba micelo mitaanzi alimwi [eeci] citondezya mpokuyeeme kusekelela kwabutebuzi bwakusaanguna bwakacitika mu Africa.” (Encyclopedia of Black Studies) Nokuba kuti bamwi babona kuti Kwanzaa taiswaangene abukombi, ibbuku litegwa Encyclopedia of African Religion likozyanisya Kwanzaa kupobwe licitwa mu Africa ciindi cakutebula bantu nobapa micelo mitaanzi yabutebuzi bwabo “kulumba baleza babo alimwi abasikale bakafwa.” Lyakayungizya kuti: “Kwanzaa, pobwe licitwa mu Africa aku America, iyeeme amapobwe aaya.”

    

  • Mid-Autumn Festival. Eeli “ndipobwe lyakukomba leza mukaintu wamwezi.” (Holidays, Festivals, and Celebrations of the World Dictionary) Lilabikkilizya acilengwa “bamakaintu ncobakotamina leza mukaintu ooyu, muci Chinese baamba kuti kowtow.”​—Religions of the World​—A Comprehensive Encyclopedia of Beliefs and Practices.

  • Nauruz (Nowruz). “Pobwe eeli lizwa kucikombelo ciitwa kuti Zoroaster alimwi buzuba oobu mbuzuba bumwi ibwakali kusalala kaindi kweelana akkalenda yabo. . . . Kwaamba icakali kucitika, Muuya Wasyikati, iwiitwa kuti [Rapithwin], walo iwakali kutontwa kuzwa kunsi aanyika a Muuya Wamupeyo ciindi nokwatontola, wakali kutambulwa syikati kumwi kabasekelela mubuzuba bwa Nowruz kweelana acilengwa caba Zoroastrian.”​—United Nations Educational, Scientific and Cultural Organization.

  • Shab-e Yalda. Pobwe eeli balisekelela mubuzuba ciindi zuba nolifwambaana kubbila kumasena aali kunyika. Balisekelela mu December. Ibbuku litegwa Sufism in the Secret History of Persia lyaamba kuti: “Tacidoonekwi kuti pobwe eeli liliswaangene akukomba leza wiitwa kuti Mithra,” leza wamumuni. Alimwi kuyeeyelwa kuti pobwe eeli liliswaangene akukomba baleza bazuba, babana Roma aba bana Giriki.b

  • Thanksgiving. Mbubwenya mbuli Kwanzaa, pobwe eeli lizwa kukusekelela nkobakali kucita kaindi ciindi cakutebula. Mukuya kwaciindi, “zilengwa eezyi zyakatalika kucitwa abazikombelo.”​—A Great and Godly Adventure​—The Pilgrims and the Myth of the First Thanksgiving.

  Mapobwe azilengwa iziyeeme akusyoma mizimo naa leza wacoolwe. Bbaibbele lyaamba kuti aabo “ibabambila leza wa Mvwuma tebulu,” bali “akati kabaabo ibasiya Jehova.” (Isaya 65:11) Aboobo, Bakamboni ba Jehova tabasekeleli mapobwe aatobela:

  • Ivan Kupala. Kweelana abbuku litegwa The A to Z of Belarus, “ciindi ca Ivan Kupala, zilengwaleza zilaba anguzu zyamasalamuzi alimwi ikuti koli sicamba naa kojisi coolwe inga wazijana nguzu eezyo.” Kumatalikilo pobwe eeli lyakali kucitwa abantu batakali kukomba Leza. Bakali kusekelela buzuba nokuli mawoola manji syikati kulubazu lwakunyika. Lilacitwa mu June. Nokuba boobo, kweelana abbuku litegwa Encyclopedia of Contemporary Russian Culture, bantu batakombi aaba nobakasanduka akuba Banakristo, bakanjizyanya pobwe eeli apobwe lyabasaante ndyobasekelela Johane Mubbapatizi.”

  • Lunar New Year (Chinese New Year or Korean New Year. “Aciindi eeci camwaka, nzyobabikkila maano bamikwasyi, balongwe, abacibbululu nkucita kufwumbwa ncobakonzya kutegwa mwaka woonse zintu kazibeendela kabotu, kulemeka baleza amyuuya, akuti kabajana coolwe mwaka woonse.” (Mooncakes and Hungry Ghosts​—Festivals of China) Aciindi nciconya, Mwaka Mupya waba Korean “ubikkilizya kukomba basikale, zilengwa zicitwa kutegwa batande myuuya mibi akubona kuti banoojisi coolwe mu Mwaka Mupya akusonda kutegwa bazyibe zintu zikonzya kucitika mu Mwaka Mupya.”​—Encyclopedia of New Year’s Holidays Worldwide.

    

  Mapobwe azilengwa iziyeeme anjiisyo yakuti muntu ulazumanana kupona afwa. Bbaibbele liyiisya kuti muntu afwa, tazumanani kupona kubusena bumbi. (Ezekieli 18:4) Aboobo, Bakamboni ba Jehova tabatoli lubazu mumapobwe naa muzilengwa zilembedwe ansi aawa, zyalo zisumpula njiisyo yakuti muntu ulazumanana kupona afwa:

  • All Souls’ Day (Day of the Dead). Kweelana abbuku litegwa New Catholic Encyclopedia oobu mbuzuba “bwakwiibaluka bantu boonse bakafwa ibakali kusyomeka.” Kuzwa kuma 500 C.E kusikila kuma 1500 C.E, kwakali kusyomwa kuti bantu bakafwa ibakali kubusena bwamyuuya bakali kuboolela bantu ibakali kubapenzya ciindi nobakali kupona.”

  • Qingming Festival (Ch’ing Ming) alimwi a Hungry Ghost Festival. Mapobwe obilo aaya alacitwa kulemeka basikale. Ciindi capobwe lya Ch’ing Ming, bbuku litegwa Celebrating Life Customs Around the World​—From Baby Showers to Funerals, lyaamba kuti “zyakulya, zyakunywa amali zilaumpwa kutegwa bafwide batafwi nzala, nyota naa kubula mali.” Alimwi bbuku eeli lyaamba kuti “kupobwe lya Hungry Ghost, kwaambisya ibusiku mwezi noukkwene, [basikusekelela basyoma kuti] bafwide balaswaangana abaumi buzuba oobu, aboobo cilayandika kubakkomanisya bafwide akubalemeka basikale.”

  • Chuseok. Bbuku litegwa The Korean Tradition of Religion, Society, and Ethics, lyaamba kuti pobwe eeli libikkilizya “kupa zyakulya awaini kubafwide.” Zipego eezyi zitondezya kuti “bafwide balazumanana kupona.”

  Mapobwe azilengwa ziswaangene akukomba mizimo. Bbaibbele lyaamba kuti: “Takweelede kujanwa akati kanu muntu uumpa mwanaakwe musankwa naa musimbi mumulilo, muŋanga, simasalamuzi, sibusangu, mulozi, simabibo, muntu uubuzya makani kubaŋanga, simaloto naa muntu uubuzya makani kubafwu. Nkaambo kufwumbwa muntu uucita zintu eezyi ncisesemyo kuli Jehova.” (Deuteronomo 18:10-​12) Kutegwa batajatikizyigwi mumicito yoonse eeyi yakukomba mizimo kubikkilizya akupandulula bweende bwanyenyeezi (nzila imwi yakusonda), Bakamboni ba Jehova tabasekeleli Halloween naa mapobwe aatobela:

  • Sinhala and Tamil New Year. “Zintu zicitwa apobwe eeli zibikkilizya kucita zintu zimwi aciindi cibikkidwe abasikupandulula bweende bwanyenyeezi kuti nokuyoocitika zintu ziyooleta coolwe.”​—Encyclopedia of Sri Lanka.

  • Songkran. Izina lyapobwe eeli “lizwa kubbala lyaci Sanskrit lyakuti . . . lyaamba ‘kweenda’ naa ‘kucinca,’ aboobo pobwe eeli licitwa zuba nolitalika kweenda kuya kuma Aries.”​—Food, Feasts, and Faith​—An Encyclopedia of Food Culture in World Religions.

  Mapobwe azilengwa ziswaangene abukombi buli ansi aa Mulawo wa Musa walo wakamana ciindi Jesu naakafwa. Bbaibbele lyaamba kuti: “Kristo ngamamanino aa Mulawo.” (Baroma 10:4) Banakristo bacigwasyigwa kunjiisyo zijanika mu Mulawo wa Musa wakapegwa kubana Israyeli bakaindi. Pele, tabasekeleli mapobwe aajatikizya mulawo ooyu, kwaambisya aajatikizya kuboola kwa Mesiya walo Banakristo ngobasyoma kuti wakaboola kale. Bbaibbele lyaamba kuti: “Zintu eezyo ncimvwule buyo cazintu ziciboola kumbele, pele icintu cini-cini ngu Kristo.” (Bakolose 2:​17) Akaambo kakuti mapobwe aaya akacizuzikizya cakali kuyandika alimwi akuti aliswaangene azilengwa zikazyanya ancolyaamba Bbaibbele, mapobwe aatobela ali aakati kamapobwe Bakamboni ba Jehova ngobatasekeleli:

  • Hanukkah. Pobwe eeli lyakali lyakusekelela kwaabwa alimwi kwatempele lyaba Juda ku Jerusalemu. Nokuba boobo, Bbaibbele lyaamba kuti Jesu wakaba Mupaizi Mupati ‘watente lipati alimwi lilondokede [naa tempele] kwiinda leelyo lyakayakwa amaanza aabantu, nkokuti, litali lyazilenge zyaansi aano pe.’ (Bahebrayo 9:​11) Ku Banakristo, tempele eeli lyakumuuya lyakanjila mubusena bwatempele lini-lini lyakali ku Jerusalemu.

  • Rosh Hashanah. Oobu mbuzuba bwakusaanguna bwamwaka waba Juda. Kaindi, pobwe eeli lyakali lyakupa zipaizyo zyaalubazu kuli Leza. (Myeelwe 29:​1-6) Nokuba boobo Jesu mbuli Mesiya wakapa kuti “zipaizyo azituuzyo zyacipego zileke,” kupa kuti kazitayandiki kuli Leza.​—Daniele 9:​26, 27.

• Sena pobwe naa cilengwa eeco cisumpula kuvwelana kwabukombi?

  Njiisyo yamu Bbaibbele: “Ino muntu uusyoma uswaangene buti amuntu uutasyomi? Alimwi nkumvwana kuli buti nkolijisi tempele lya Leza amituni?”​—2 Bakorinto 6:​15-​17.

  Nokuba kuti Bakamboni ba Jehova balasolekesya kuba muluumuno abasimukobonyina, akulemeka kusala kwamuntu umwi aumwi kujatikizya ncasyoma, tabatoli lubazu mumapobwe aasumpula kuvwelana kwabukombi munzila eezyi zitobela.

  Mapobwe aakusekelela muntu ulaampuwo mubukombi naa mapobwe aakulwaizya lukamantano lwabantu bajisi lusyomo lwiindene. Ciindi Leza naakasololela bantu bakwe kunyika mpya, ooko bantu nkobakali kukomba baleza bambi, wakabaambila kuti: “Tamweelede kupanga cizuminano ambabo naa abaleza babo. . . . Ikuti mukabelekele baleza babo, ncobeni eeci ciyoomubeda kakole.” (Kulonga 23:32, 33) Aboobo, Bakamboni ba Jehova tabatoli lubazu mumapobwe mbuli yaaya aatobela.

  • Loy Krathong. Ciindi capobwe eeli, “bantu balapanga tusuwo twamatewo, akubikka mankendulo naa tununkilizyo twatusamu mukati, mpoonya akutusowela mumeenda tusuwo ooto. Mato aambwa kuti atantamuna malweza. Pobwe eeli ndyakwiibaluka matende aasalala mpaakalyata mu Buddha.”​—Encyclopedia of Buddhism.

  • National Repentance Day. Muntu umwi uubeleka mumfwulumende iwakazubululwa mumuteende uutegwa The National, imuteende waku Papua New Guinea wakaamba kuti aabo batola lubazu mubuzuba oobu “balazumina nzyobasyoma Banakristo.” Wakaamba kuti buzuba oobu “busumpula njiisyo zya Bunakristo mucisi.”

  • Vesak. “Oobu mbuzuba busalala kapati akati kamazuba aaba Buddha, ibasekelela kuzyalwa kwamu Buddha, kuzumina bukombi bwaci Buddha, kufwa akutalika kupona mu Nirvana.”​—Holidays, Festivals, and Celebrations of the World Dictionary.

    

  Mapobwe aayeeme azilengwa zyabukombi ziteendelani ancolyaamba Bbaibbele. Jesu wakaambila basololi bazikombelo kuti: “Mwapa kuti jwi lya Leza libe lyabuyo akaambo katunsiyansiya twanu.” Alimwi wakabaambila kuti bukombi bwabo bwakali bwabuyo nkaambo bakali kuyiisya “milawo yabantu kuba njiisyo zya Leza.” (Matayo 15:​6, 9) Akaambo kakuti balakubikkila maano kucenjezya ooku, Bakamboni ba Jehova tabasekeleli mapobwe manji aabukombi.

  • Epiphany (Three Kings’ Day, Timkat, naa Los Reyes Magos). Basikusekelela baibaluka kuswaya nkobakamuswaya Jesu basikulingula bweende bwanyenyeezi naa kusekelela kubbapatizyigwa kwakwe. Pobwe eeli lyakazumizya Banakristo kucita mapobwe aamwi aakali kulemeka baleza bamilonga, alimwi aakali kucitwa abantu batakali kukomba.” (The Christmas Encyclopedia) Pobwe limbi likozyenye aleeli litegwa Timkat, “liyeeme kapati atunsiyansiya.”​—Encyclopedia of Society and Culture in the Ancient World.

  • Feast of the Assumption of the Virgin Mary. Pobwe eeli lilacitwa akaambo kakusyoma kuti Mariya banyina Jesu bakaunka kujulu amubili wanyama. Bbuku litegwa Religion and Society​—Encyclopedia of Fundamentalism lyaamba kuti “kusyoma kuli boobu tiikwakazyibidwe a Banakristo bamumwaanda wamyaka wakusaanguna alimwi takwaambidwe mu Magwalo.”

  • Kusekelela kuti Mariya tanaakajisi cibi ciindi naakamita Jesu. Makani aakuti “Mariya tanaakajisi cibi ciindi naakamita Jesu taambidwe mu Bbaibbele. . . . Ooyu muzeezo buyo wakabikkwa acikombelo.”​—New Catholic Encyclopedia.

  • Lent. Kweelana abbuku litegwa New Catholic Encyclopedia, cilengwa eeci nobaliimya kulya akutondezya kuusa akaambo kacibi muntu ncaacita cakatalika “mumwaanda wamyaka wane,” myaka yiinda ku 200 Bbaibbele kalimanide kale kulembwa. Kujatikizya buzuba bwakusaanguna bwacilengwa eeci, bbuku eeli lyaamba kuti: “Muli bwatatu mupaizi ulalemba ciingano ankumo zyabantu bali mucikombelo kwiinda mukubelesya twe. Eeyi ninzila yakubayeezya kuti beelede kweempwa. Cilengwa eeci cakatalika kubelesyegwa acikombelo ca Katolika mu 1091.”

  • Meskel (naa, Maskal). Bbuku litegwa Encyclopedia of Society and Culture in the Medieval World lyaamba kuti: “Pobwe eeli lyaku Ethiopia ndyakusekelela kujanwa kwaciingaano (iciingano Jesu mpakajailwa), baumpa mafwuwa mpoonya ciindi naayaka balaazinguluka kumwi kabazyana.” Pele, Bakamboni ba Jehova tababelesyi ciingano mubukombi bwabo.

• Sena pobwe eelyo lilemeka muntu, mbunga, naa cintu cimwi ciiminina cisi?

  Njiisyo yamu Bbaibbele: “Mboobu mbwaamba Jehova: ‘Ulisinganizyidwe muntu uusyoma bantu balya maila, uusyoma nguzu zyabantu, alimwi ooyo uujisi moyo uuleya kuzwa kuli Jehova.’”​—Jeremiya 17:5.

  Nokuba kuti Bakamboni ba Jehova balatondezya kulumba kubantunyina mane buya akubapailila, tabatoli lubazu muzilengwa naa mapobwe aatobela:

  Mapobwe aalemeka mweendelezi naa muntu umwi uulemekwa. Bbaibbele lyaamba kuti: “Kutegwa mulivwune, amuleke kusyoma muntu buyo, ooyo uuli muya buyo mumpemo zyakwe. Nkaambo nzi walo ncayelede kubikkilwa maano?” (Isaya 2:​22) Nkakaambo kaako, Bakamboni ba Jehova tabatoli lubazu muzilengwa mbuli kusekelela buzuba bwakuzyalwa kwamweendelezi.

  Kusaluta ndembela yacisi. Bakamboni ba Jehova tabasaluti ndembela. Ino nkaambo nzi? Nkaambo Bbaibbele lyaamba kuti: “Amwiitantamuke mituni.” (1 Johane 5:​21) Mazuba aano, bantu bamwi bayeeya kuti ndembela tauli mutuni, nkokuti icintu cikombwa, pele syaazibwene mumakani aakaindi Carlton J. H. Hayes wakalemba kuti: “Cikozyanyo cipati ncobasyoma akukomba bantu ibayandisya cisi cabo nindembela.”

  Cilengwa cicitwa kulemeka basaante. Ncinzi cakacitika ciindi muntu uuyoowa Leza naakafwugamina mwaapostolo Petro? Bbaibbele lyaamba kuti: “Petro wakamwiimikizya akumwaambila kuti: ‘Nyamuka; andime ndili muntu buyo.’” (Milimo 10:25, 26) Mbwaanga Petro naa baapostolo bambi tiibakazumina kupegwa bulemu bwaalubazu naa kukombwa, Bakamboni ba Jehova tabatoli lubazu muzilengwa zicitwa kulemeka baabo babonwa kuti mbasaante. Mucikozyanyo:

  • Buzuba bwa Basaante Boonse. “Eeli ndipobwe lyakulemeka basaante boonse . . . Takuzyibidwe kabotu mbolyakatalika pobwe eeli.”​—New Catholic Encyclopedia.

  • Fiesta of Our Lady of Guadalupe. Pobwe eeli ndyakulemeka cibumbwa “camupati wabasaante waku Mexico,” bamwi ngobayeeyela kuti ngu Mariya, banyina Jesu. Waambwa kuti wakalibonya camaleele kumuntu uutakwe mpuwo mu 1531.​—The Greenwood Encyclopedia of Latino Literature.

    

  • Buzuba bwa Nguli. Bbuku litegwa Celebrating Life Customs Around the World​—From Baby Showers to Funerals lyaamba kuti: “Buzuba bwanguli mbuzuba bwapobwe lyamusaante uujisi zina lyakauzyikwa mwana ambweni ciindi cakubbapatizyigwa naa cakusinizya lusyomo lwakwe apobwe lyacikombelo.” Liyungizya kuti “kulacitwa zintu zinji zyabukombi mubuzuba oobu.”

  Mapobwe aatubunga twamapolitikisi naa twabanamaleya. Bbaibbele lyaamba kuti: “Cilainda kubota kuyubila muli Jehova ikwiinda kusyoma bantu.” (Intembauzyo 118:​8, 9) Kutegwa batondezye kuti basyoma Leza kuti nguuyoomana mapenzi aabantu muciindi cakusyoma bantu, Bakamboni ba Jehova tabatoli lubazu mumapobwe aa Youth Day naa Women’s Day aasumpula mapolitikisi naa tubunga twabanamaleya. Akaambo kaceeci, tabatoli lubazu mupobwe lya Emancipation Day naa mapobwe aakozyenye aleeli. Muciindi caboobo, basyoma Bwami bwa Leza kuti mbobuyoomana mapenzi aakusalaulana mubala alimwi akuleta bululami.​—Baroma 2:​11; 8:​21.

• Sena pobwe naa cilengwa cisumpula cisi naa musyobo umwi?

  Njiisyo yamu Bbaibbele: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”​—Milimo 10:34, 35.

  Nokuba kuti bunji bwa Bakamboni ba Jehova balaciyanda cisi cokwabo, balaatantamuka mapobwe aasumpula cisi naa musyobo umwi kweelana azilengwa zitobela.

  Zilengwa zicitwa kulemeka basikalumamba. Muciindi cakukulwaizya nkondo, Jesu wakaambila basikumutobela kuti: “Amuzumanane kuyanda basinkondonyoko akubapailila aabo bamupenzya.” (Matayo 5:​44) Aboobo, Bakamboni ba Jehova tabasekeleli mapobwe aalemeka basikalumamba. Mucikozyanyo:

  • Anzac Day. “Anzac yiiminina Australian and New Zealand Army Corps,” alimwi “Anzac Day asyoonto-syoonto bwakaba buzuba bwakuyeeya baabo ibakajaigwa munkondo.”​—Historical Dictionary of Australia.

  • Veterans Day (Remembrance Day, Remembrance Sunday, or Memorial Day). Mazuba aakulyookezya aaya ngakulemeka “nkumekume zyabantu bakali basikalumamba alimwi abaabo ibakajaigwa munkondo zyacisi.”​—Encyclopædia Britannica.

  Kusekelela lwaanguluko lwacisi. Kujatikizya basikumutobela, Jesu wakati: “Tabali banyika mbubonya andime mbonditali wanyika.” (Johane 17:16) Nokuba kuti balikkomene kwiiya makani aakaindi aacisi, Bakamboni ba Jehova tabatoli lubazu muzilengwa mbuli zyeezyi zitobela:

  • Australia Day. Kweelana abbuku litegwa Worldmark Encyclopedia of Cultures and Daily Life, buzuba oobu mbwakwiibaluka “ciindi basikalumamba baku England mu 1788 nobakanyamuna ndembela yabo akwaambilizya kuti cisi ca Australia cinooli mubweendelezi bwabo.”

  • Guy Fawkes Day. Oobu “mbuzuba cisi ca England nociyeeya kwaalilwa kwa Guy Fawkes abana Katolika ibakali kulubazu lwakwe naakali kuyanda kujaya King James I alimwi abamuŋanda yamilawo baku England mu 1605.”​—A Dictionary of English Folklore.

  • Independence Day. Muzisi zinji, oobu “mbuzuba bubikkidwe bwakusekelela buzuba cisi nocakalilela.”​—Merriam-Webster’s Unabridged Dictionary.

• Sena pobwe naa cilengwa cisumpula bukkale bwakutalijata naa kutalilemeka?

  Njiisyo yamu Bbaibbele: “Musyule oomu mwakajisi ciindi cinji cakucita kuyanda kwabamasi nimwakali kweenda mubukkale busesemya, muluunyaunya lwakutalijata, mukuciindizya kunywa makoko, mumapobwe aateendelezyeki, mukuzundana kunywa makoko amukukomba mituni kukasyidwe amulawo.”​—1 Petro 4:3.

  Kweelana anjiisyo eeyi, Bakamboni ba Jehova balaatantamuka mapobwe aabikkilizya abukolwi alimwi aateendelezyeki. Bakamboni ba Jehova balakkomana kuyanzana abeenzinyina, alimwi kuti kabayanda balakonzya kunywa bukoko cansaizi. Balasolekesya kutobela lulayo lwamu Bbaibbele lwakuti: “Kufwumbwa naa mulalya naa mulanywa nokuba kucita cintu cimbi cili coonse, amucite zintu zyoonse kutegwa Leza alemekwe.”​—1 Bakorinto 10:31.

  Aboobo Bakamboni ba Jehova tabatoli lubazu mumapobwe aateendelani ancolyaamba Bbaibbele aasumpula kutalilemeka. Eeci cilabikkilizya apobwe lyaba Juda liitwa kuti Purim. Nokuba kuti Purim kwaciindi cilamfwu lyali pobwe lyakuyeeya kufwutulwa kwaba Juda mumwaanda wamyaka wasanu B.C.E, ambweni lino kweelana abbuku litegwa Essential Judaism, inga “yaambwa kuti ilikozyenye asyoonto apobwe liitwa kuti Mardi Gras naa Carnival.” Kubanabunji, “ilabikkilizya abamaalumi kusama zisani zyabamakaintu, manyongwe, kuciindizya kunywa, alimwi akuyobeka kapati.”

Sena Bakamboni ba Jehova, ibatatoli lubazu mumapobwe naa muzilengwa zimwi, balabayanda banamukwasyi?

Inzya. Bbaibbele liyiisya bantu kuti beelede kubayanda alimwi akubalemeka banamukwasyi boonse, tacikwe makani acikombelo ncobanjila. (1 Petro 3:​1, 2, 7) Nokuba boobo, ciindi Kamboni wa Jehova naleka kusekelela mapobwe amwi, bamukwasyi wakwe bamwi balanyema, cilabacisa mane akulimvwa kukakwa. Nkakaambo kaako, bunji bwa Bakamboni ba Jehova balabasyomezya banamukwasyi kuti balabayanda, kubapandulwida kabotu-kabotu twaambo ncobasalila kucita boobo, alimwi akubaswaya muziindi zimbi.

Sena Bakamboni ba Jehova baambila bantu kuti kabatatoli lubazu mumapobwe naa muzilengwa zimwi?

Peepe. Basyoma kuti umwi aumwi weelede kulisalila. (Joshua 24:15) Bakamboni ba Jehova ‘balabalemeka bantu bamisyobo yoonse,” tacikwe makani anzyobasyoma.​—1 Petro 2:​17.