Josefa wakali umwi wabana ba Jakobo baniini. Bapati bakwe bakabona kuti bausyi bakali kumuyanda kapati Josefa. Ino uyeeya kuti bakali kulimvwa buti kujatikizya nguwe? Bakali kumufwida munyono Josefa alimwi bakalimuzondede kapati. Ciindi Josefa naakalota ziloto zigambya, wakabaambila banabokwabo kujatikizya nzizyo. Bakali kuyeeya kuti ziloto eezyo zyakali kwaamba kuti bumwi buzuba bayoomufwugamina. Eeci cakapa kuti baindilile kumuzonda!

Bumwi buzuba, banabokwabo Josefa bakali kweembela mbelele afwaafwi amunzi wa Sekemu. Aboobo Jakobo wakatuma Josefa kuti aunke kuyoobabona. Josefa naakacili alaale, bakamubona akutalika kwaambilana kuti: ‘Ngooyu siziloto waboola. Atumujaye!’ Mpoonya naakasika afwaafwi bakamujata akumusowela mucilindi cilamfwu. Pele Juda, umwi wabanabokwabo wakaamba kuti: ‘Mutamujayi pe! Atumusambale buyo mubuzike.’ Aboobo bakamusambala Josefa amali aansiliva aali 20 kuli basimakwebo bana Midiyani ibakali kuunka ku Egepita.

Kumane banabokwabo Josefa bakasansaila jansi lya Josefa bulowa bwampongo, mpoonya jansi eelyo bakalitola kuli bausyi akwaamba kuti: ‘Sena eeli talili jansi lyamwanaanu?’ Aboobo Jakobo wakayeeya kuti Josefa walumwa munyama wamusyokwe. Wakausa kapati. Kunyina iwakali kukonzya kumuumbulizya pe.

Ku Egepita, Josefa wakasambalwa mubuzike kuli silutwe iwakajisi mpuwo wazina lya Potifara. Pele Jehova wakali a Josefa. Potifara wakabona kuti Josefa wakali kwiibeleka kabotu milimo yakwe alimwi wakali kusyomeka. Kakutanainda ciindi cilamfwu, Josefa wakapegwa mulimo wakulanganya zintu zya Potifara zyoonse.

Mukaintu wa Potifara wakabona kuti Josefa wakali mubotu alimwi wakalaanguzu. Buzuba abuzuba mukaintu wa Potifara wakali kwaambila Josefa kuti aone anguwe. Ino Josefa wakacita buti? Wakakaka akwaamba kuti: ‘Peepe! Eeci ncibi. Simalelaangu ulandisyoma, alimwi yebo uli mukaintu wakwe. Ikuti ndoone anduwe, ndilabisizya Leza!’

Bumwi buzuba, mukaintu wa Potifara wakasola kusungilizya Josefa kuti aone anguwe. Wakamujata kucisani, pele Josefa wakatija. Ciindi Potifara naakasika aŋanda, mukaintu wakwe wakamwaambila kuti Josefa wakali kuyanda kumujata. Pele mubwini, mukaintu ooyu wakabeja. Aboobo Potifara wakanyema kapati cakuti wakamubikka muntolongo Josefa. Pele Jehova kunyina naakamuluba Josefa.

Naakacili muntolongo Josefa, Farao imwami wa Egepita wakalota ziloto izyatakali kukonzya kupandululwa amuntu uuli woonse. Farao wakaambilwa amubelesi wakwe kuti Josefa ulakonzya kukupandulwida ncozyaamba ziloto zyako. Cakutasowa ciindi, Farao wakatuma bantu kuti bakamwiite Josefa.

Farao wakabuzya Josefa kuti: ‘Sena ulakonzya kuzipandulula ziloto zyangu?’ Josefa wakaambila Farao kuti: ‘Cisi ca Egepita ciyooba azyakulya zinji kwamyaka iili 7, mpoonya alimwi kuyooba myaka iili 7 yanzala. Kosala muntu musongo uutiikayobole zyakulya kutegwa bantu bako batakafwi nzala.’ Farao wakaingula kuti: ‘Ndasala nduwe! Ndonduwe uuyooba mweendelezi wabili mucisi ca Egepita!’ Ino Josefa wakabuzyiba buti bupanduluzi bwaziloto zya Farao? Jehova ngowakamugwasya Josefa.

Myaka iili 7 iyakatobela, Josefa wakayobola zyakulya. Mpoonya kwakazooba nzala mpati munyika yoonse mbubwenya Josefa mbwaakaambide. Bantu bakaboola kuzwa mumasena aaindene-indene kuzoowula zyakulya kuli Josefa. Jakobo usyi Josefa, wakamvwa kuti kwakali zyakulya ku Egepita, aboobo wakatuma bana bakwe ibali 10 kuti bakaule zyakulya.

Bana ba Jakobo bakaunka kuli Josefa, walo iwakabazyiba mpoonya-mpoonya. Pele balo tiibakamuzyiba pe. Bakamufwugamina mbubwenya mbwaakalotede naakacili muniini. Josefa wakali kuyanda kuzyiba naa banabokwabo bakacili alunya. Aboobo wakabaambila kuti: ‘Muli basikutwela nywebo. Muyanda kulanga-langa masena eesu aatakwabilidwe.’ Mpoonya bakati: ‘Peepe! Tuli banabokwabo ibali 12 kuzwa kucisi ca Kanana. Mwanookwesu umwi wakafwa, pesi musyoonto wasyaala abataata.’ Kumane Josefa wakati: ‘Amukamulete musyoonto wanu, ndendilyo nendiyoomusyoma.’ Aboobo bakapiluka kuŋanda.

Nocakamana cakulya, Jakobo wakabatuma bana bakwe alimwi ku Egepita. Mulweendo oolu, bakamubwezelezya a Benjamini musyoonto wabo. Kutegwa abasunke banabokwabo, Josefa wakasisa nkapu yakwe yansiliva musaka lya Benjamini, mpoonya wakatamikizya banabokwabo kuti mbebakabba nkapu. Ciindi babelesi ba Josefa nobakaijana nkapu musaka lya Benjamini, banabokwabo bakagambwa kapati. Bakalomba Josefa kuti asubule mbabo muciindi cakusubula Benjamini.

Aciindi eeci Josefa wakazyiba kuti banabokwabo bakacinca. Aboobo wakaalilwa kulijata. Wakapozomoka kulila akubaambila kuti: ‘Ndime Josefa, mwanookwanu. Sena bataata bacipona?’ Banabokwabo bakagambwa kapati. Wakabaambila kuti: ‘Mutalimvwi bubi akaambo kacintu ncomwakandicita. Leza wakandituma okuno kutegwa ndimufwutule. Kamuya cakufwambaana mukabalete bataata.’

Bakaunka kuŋanda kuyoobaambila bausyi makani mabotu aaya mpoonya akubaleta ku Egepita. Josefa abausyi bakaba antoomwe alimwi nokuba kuti kwakaindide myaka minji kabatabonani.