Musa wakakkala ku Midiyani myaka iili 40. Wakakwata alimwi wakaba abana. Bumwi buzuba naakali kweembela mbelele zyakwe kumbali aa Mulundu wa Sinai, wakabona cintu cimwi cigambya. Citewo cakali kuyaka mulilo, pele tiicakali kupya! Ciindi Musa naakaswena afwaafwi kutegwa abone kaambo citewo ncocatakali kupya, wakamvwa jwi kuzwa mucitewo kaliti: ‘Musa! Utasweni afwaafwi pe. Kosamununa mpato zyako nkaambo busena aawo mpoimvwi bulasalala.’ Jehova ngowakali kwaambaula kwiinda mumungelo.

Musa wakayoowa, aboobo wakalivwumba kubusyu. Ijwi lyakati: ‘Ndaabona mapenzi aabana Israyeli. Ndilabavwuna kumaanza aabana Egepita akubatola kunyika mbotu. Nduwe uyoosololela bantu bangu kuzwa mu Egepita.’ Kweelede kuti eeci cakamugambya Musa, tee kayi?

Musa wakabuzya kuti: ‘Baakundibuzya kuti ino nguni wakutuma, ndikabaambile kuti nzi?’ Leza wakaingula kuti: ‘Ukabaambile kuti Jehova, Leza wa Abrahamu, Leza wa Izaka, alimwi a Leza wa Jakobo nguwandituma.’ Mpoonya Musa wakati: ‘Mbuti kuti bantu bakakake kundiswiilila?’ Jehova wakamupa citondezyo Musa cakuti uyoomugwasya. Wakaambila Musa kuti awaale musako wakwe ansi. Mpoonya musako ooyo wakasanduka kuba nzoka! Musa naakaijata nzoka kumucila yakasanduka kuba musako alimwi. Jehova wakati: ‘Waakucita boobu, bayoosyoma kuti ndime ndakutuma.’

Musa wakati: ‘Mebo tandaambauli kabotu.’ Mpoonya Jehova wakamusyomezya kuti: ‘Ndiyookwaambila nzyoyelede kwaamba, alimwi ndiyoomutuma mwanookwanu Aroni kuti akakugwasye.’ Akaambo kakuti Musa wakazyiba kuti Jehova wakali anguwe, wakabweza mukaintu wakwe alimwi abana bakwe akupiluka ku Egepita.

Bana Israyeli bakali kusinikizyigwa kubeleka kapati kabali bazike. Jehova wakatuma Musa a Aroni kuti baunke kuli Farao akumwaambila kuti: ‘Kobaleka bantu bangu baunke munkanda kutegwa bakandikombe. Farao wakavwiila cankazi kuti: ‘Tandikonzyi kumuswiilila Jehova pe, alimwi nsikoobaleka bana Israyeli kuti baunke.’ Mpoonya Farao wakabasinikizya kuti babeleke cakwiindilila. Jehova wakali kuyanda kumusubula Farao. Sena ulizyi mbwaakacita oobo? Wakaleta Zipenzyo Zili 10 mucisi ca Egepita. Jehova wakaambila Musa kuti: ‘Farao tayandi kundiswiilila. Mafwumofwumo, unooli ku Mulonga wa Nile. Ukaunke ukamwaambile kuti, akaambo kakuti wabakasya bantu bangu kuti baunke, maanzi oonse aali mu Mulonga wa Nile ayoosanduka kuba bulowa.’ Musa wakamvwida akuunka kuli Farao. Farao wakali kulangilila ciindi Aroni naakauma maanzi aamu Mulonga wa Nile amusako wakwe, mpoonya maanzi akasanduka kuba bulowa. Mulonga ooyu wakatalika kununka, inswi izyakali mumo zyakafwa, alimwi kwakanyina maanzi aakunywa mu Mulonga wa Nile. Farao wakazumanana kubakasya bana Israyeli kuti baunke.

Nokwakainda mazuba aali 7, Jehova wakatuma Musa alimwi kuli Farao amulumbe wakuti: ‘Ikuti utabaleki bantu bangu kuti baunke, cisi ca Egepita ciyoozula bacula.’ Aroni wakanyamuna musako wakwe, mpoonya bacula bakaboola akuvwumba nyika. Bantu bakajana bacula mumaanda aabo, aamalo aabo, alimwi amumbale zyabo. Bacula bakali koonse-koonse! Farao wakalomba Musa kuti akombelezye Jehova kutegwa acigwisye cipenzyo eeci. Farao wakasyomezya kuti ulabaleka bana Israyeli kuti baunke. Aboobo Jehova wakacigwisya cipenzyo eeci, mpoonya bana Egepita bakatalika kubwezelela bacula bafwide akubalundika mumilwi mipati-pati. Cisi coonse cakatalika kununka. Pele alimwi Farao wakabakasya bantu kuti baunke.

Kumane Jehova wakaambila Musa kuti: ‘Aroni weelede kuuma musako wakwe ansi, mpoonya lusuko luyoosanduka kuba tususuli naa tuuka tusyoonto-syoonto tuluma.’ Mbwaakaumina buyo ansi, koonse-koonse kwakaba tususuli. Bantu ba Farao bamwi bakamwaambila kuti: ‘Cipenzyo eeci cizwa kuli Leza.’ Pele mbubwenya buyo, Farao tanaakabaleka bana Israyeli kuti baunke.