LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • Tiibakacibamba Cisyomezyo Cabo
    Ziiyo Nzyomukonzya Kwiiya Kuzwa mu Bbaibbele
    • Bana Israyeli balaimba akuzyana kuzinguluka moombe wangolida

      CIIYO 24

      Tiibakacibamba Cisyomezyo Cabo

      Jehova wakaambila Musa kuti: ‘Koboola kucilundu. Ndilalemba milawo yangu aamabwe mpoonya ndilakupa.’ Musa wakatanta acilundu akukkala ooko kwamazuba aali 40, syikati amasiku. Naakacili kooko, Jehova wakalemba Milawo Iili 10 amabwe obilo kumane wakapa Musa.

      Musa waapwaila ansi mabwe

      Nokwakainda ciindi, bana Israyeli bakayeeya kuti Musa wabasiya. Mpoonya bakaambila Aroni kuti: ‘Tuyanda muntu uunootusololela. Kotupangila leza!’ Aroni wakati: ‘Amundipe ngolida zyanu.’ Mpoonya ngolida eezyo wakazibikka mumulilo kutegwa zisungunuke kumane wakapanga moombe wangolida. Bantu bakati: ‘Moombe ooyu ngo Leza wesu iwakatugwisya mu Egepita!’ Bakatalika kukomba moombe wangolida, kumane bakapanga pobwe. Sena eeco cakali kabotu? Peepe, nkaambo bantu aaba bakasyomezyede kuti banookomba buyo Jehova alikke. Pele tiibakacibamba cisyomezyo cabo pe.

      Jehova wakacibona icakali kucitika, aboobo wakaambila Musa kuti: ‘Koya nkobabede bantu. Baleka kundimvwida akutalika kukomba leza wakubeja.’ Musa wakaselemuka kuzwa acilundu kajisi amabwe obilo.

      Naakasika afwaafwi ankambi, Musa wakamvwa bantu ibaimba. Mpoonya wakababona kabazyana akufwugamina moombe. Musa wakanyema kapati. Mabwe obilo ngaakajisi wakaasowela ansi, mpoonya akapwaika. Mpoonya-mpoonya wakamunyonyoona moombe wangolida. Kumane wakabuzya Aroni kuti: ‘Ino bantu bakoongelezya buti kuti ucite cintu eeci cibi kapati?’ Aroni wakati: ‘Utanyemi pe. Yebo ulibazyi bantu aaba mbobabede. Bali kuyanda leza, aboobo ndabaambila kuti bandipe ngolida zyabo mpoonya ndazifwusila mumulilo akupanga moombe ooyu.’ Aroni tanaakeelede kucita boobo. Musa wakapiluka alimwi kucilundu kuyookombelezya Jehova kuti abalekelele bantu.

      Jehova wakabalekelela aabo ibakalibambilide kumumvwida. Sena wabona kuti cakali kuyandika kapati kuti bana Israyeli batobele ncaakali kubaambila Musa?

      “Lyoonse nokonka kuli Leza, utamuki pe kucizuzikizya cikonke eeco, nkaambo walo kunyina nabakkomanina bafwubafwuba. Kozuzikizya cikonke eeco ncookonka.”​—Mukambausi 5:4

      Mibuzyo: Ino ncinzi ncobakacita bana Israyeli ciindi Musa naatakaliko? Ino Musa wakacita nzi naakapiluka?

      Kulonga 24:12-18; 32:1-30

  • Tente Lyakukombela
    Ziiyo Nzyomukonzya Kwiiya Kuzwa mu Bbaibbele
    • Tente alimwi alubuwa

      CIIYO 25

      Tente Lyakukombela

      Musa naakali ku Cilundu ca Sinai, Jehova wakamwaambila kuyaka tente lyaalubazu, bana Israyeli nkobakeelede kukombela Leza. Bakali kukonzya kulinyamuna tente kufwumbwa nkobakali kuunka.

      Jehova wakati: ‘Kobaambila bantu kuti basange nzyobakonzya kutegwa bagwasyilizye kuyaka tente.’ Bana Israyeli bakapa ngolida, nsiliva, mukuba, mabwe mayandisi, alimwi azyakulibotya zyabamakaintu. Alimwi bakasanga boya bwambelele, milembo mibotu myuuba-uba, zikutu zyabanyama, alimwi azintu zimwi buyo zinji. Bakali baabi cakuti Musa wakabaambila kuti: ‘Mbubo lino zyakkwana! Mutaleti zimbi.’

      Bana Israyeli baleta zyakusanga kutegwa bagwasyilizye kuyaka tente

      Bamaalumi abamakaintu ibakajisi luzyibo bakagwasyilizya kuyaka tente. Jehova wakabapa busongo kutegwa baucite mulimo ooyu. Bamwi bakali kupanga ntali, milembo naa kusuma. Bambi bakali kubeza mabwe, kupanga zintu zyangolida, naa zyamapulanga.

      Bantu bakaliyaka tente kweelana ambwaakabaambila Jehova. Bakapanga mulembo mubotu waamulyango iwakali kwaandaanya Busena Busalala alimwi a Busena Busalalisya. Mubusena Busalalisya mwakali bbokesi lyacizuminano ilyakapangidwe amapulanga aamuunga alimwi angolida. Mubusena Busalala mwakali cibikkilo camalambe, tebulu, alimwi acipaililo cakuumpila tununkilizyo. Mulubuwa lwatente kwakali zyakusambila zyamukuba alimwi acipaililo cipati. Bbokesi lyacizuminano lyakali kuyeezya bana Israyeli cisyomezyo cabo cakumvwida Jehova. Sena ulicizyi cizuminano? Ncisyomezyo caalubazu.

      Jehova wakasala Aroni abana bakwe kuti kababelekela kutente kabali bapaizi. Bakeelede kulilanganya tente alimwi akupa zituuzyo kuli Jehova. Aroni alikke, mupaizi mupati ngowakazumizyidwe kunjila Mubusena Busalalisya. Wakali kucita oobo ciindi comwe amwaka ikutuula cipaizyo cazibi zyakwe mwini, izyamukwasyi wakwe alimwi azyabana Israyeli boonse.

      Bana Israyeli bakamanizya kuyaka tente kakwiindide mwaka omwe kuzwa ciindi nobakazwa ku Egepita. Lino bakalijisi busena bwakukombela Jehova.

      Jehova wakazuzya tente abulemu bwakwe alimwi wakapa kuti kkumbi kalilibonya atala aatente. Kufwumbwa buyo kuti kkumbi kalili atala aatente, bana Israyeli bakali kukkala mpoonya aawo. Pele ikuti naa kkumbi lyanyamuka, bakali kuzyiba kuti lino casika ciindi cakuti beende. Bakali kulinyamuna tente akutobela kkumbi.

      “Mpoonya ndakamvwa jwi pati kuzwa kucuuno cabwami kaliti: ‘Amubone! Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo.’”​—Ciyubunuzyo 21:3

      Mibuzyo: Ino Jehova wakaambila Musa kuti ayake nzi? Ino mukuli nzi Jehova ngwaakapa Aroni abana bakwe?

      Kulonga 25:1-9; 31:1-11; 40:33-38; Bahebrayo 9:1-7

Chitonga Publications (1991-2025)
Log Out
Log In
  • Chitonga
  • Amutumine Bamwi
  • Makani Ngomuyanda
  • Copyright © 2025 Watch Tower Bible and Tract Society of Pennsylvania
  • Nzyomweelede Kuzumina
  • Mulawo Uujatikizya Kubamba Maseseke
  • Privacy Settings
  • JW.ORG
  • Log In
Amutumine Bamwi