Bana Israyeli bakazwa ku Cilundu ca Sinai alimwi bakainda mucimpayuma ca Parani kuunka kubusena ibwiitwa kuti Kadesi. Kabali kooko, Jehova wakaambila Musa kuti: ‘Tuma baalumi bali 12, omwe kuzwa kumusyobo umwi aumwi, kutegwa bakatwele nyika ya Kanana, nyika njendiyoobapa bana Israyeli.’ Aboobo Musa wakasala baalumi bali 12 akubaambila kuti: ‘Kamuya ku Kanana, mukailange-lange nyika naa nimbotu kulima. Amukabone naa bantu bakkala nkuko balaanguzu naa pe alimwi naa bakkala mumatente naa muminzi.’ Basikutwela bali 12, kubikkilizya Joshua alimwi a Kalebe, bakaunka ku Kanana.

Nokwakainda mazuba aali 40, basikutwela bakapiluka, bakaleta nkuyu, mapomegranite, alimwi amisaansa. Basikutwela bakaamba kuti: ‘Nyika nimbotu, pele bantu balaanguzu alimwi minzi yabo ijisi bwaanda bulamfwu.’ Mpoonya Kalebe wakaamba kuti: ‘Tulakonzya kubazunda. Atwiinke ndilyonya lino!’ Sena ulizyi ikaambo Kalebe ncaakaambila boobo? Nkaambo walo alimwi a Joshua bakali kusyoma Jehova. Pele basikutwela bambi ibali 10 bakaamba kuti: ‘Peepe! Bantu abaya mbapati kapati mbuli zibbabbani! Twali kulibonya mbuli cisozi kulimbabo.’

Nobakamvwa boobo, bana Israyeli bakayoowa. Mpoonya bakatalika kutongooka akwaambilana kuti: ‘Atusale musololi umbi akupiluka ku Egepita. Nkaambo ikuti tuunke kubusena ooko, masimpe tuyoojaigwa.’ Joshua a Kalebe bakaamba kuti: ‘Mutamuzangili Jehova, alimwi mutayoowi pe. Jehova uyootukwabilila.’ Pele bana Israyeli tiibakaswiilila pe. Mane buya bakali kuyanda kumujaya Joshua a Kalebe!

Ino Jehova wakacita buti? Wakaambila Musa kuti: ‘Nokuba kuti ndabacitila zintu zinji bana Israyeli, bacizumanana kutandimvwida. Aboobo balakkala munkanda kwamyaka iili 40, alimwi bayoofwida mumo. Ccita buyo bana babo, Joshua alimwi a Kalebe mbobayookkala munyika njendakabasyomezya kubapa.’

Aciindi cimwi bana Israyeli nobakacili munkanda, Kora, Datani, Abiramu alimwi abambi bali 250 bakamuzangila Musa. Bakamwaambila kuti: ‘Waciindizya! Nkaambo nzi ncoyanda kuba musololi wesu mpoonya walo Aroni kuba mupaizi mupati? Jehova ulaandiswe toonse, kutali buyo nduwe a Aroni.’ Jehova tanaakakkomana pe. Eeco ncobakacita wakacibona kuti bazangila nguwe.

Musa wakaambila Kora abeenzinyina kuti: ‘Juunza mukaboole kutente, alimwi mukaletelezye twakunyamwida mulilo akubikka tununkilizyo aali ntuto. Jehova uyootutondezya ngwayoosala.’

Buzuba bwakatobela, Kora abaalumi bali 250 bakaunka kuyooswaangana a Musa kutente. Kabali kookuya, bakatalika kuumpa tununkilizyo itwakeelede kuumpwa buyo abapaizi. Jehova wakaambila Musa a Aroni kuti: ‘Amulyaandaanye kuzwa kuli Kora abeenzinyina.’

Nokuba kuti Kora wakaluunkide kuli Musa kutente, Datani, Abiramu alimwi amikwasyi yabo bakakaka kuunka. Jehova wakaambila bana Israyeli kuti bazwe kumatente aa Kora, Datani a Abiramu. Mpoonya aawo bana Israyeli bakazwa. Datani, Abiramu, alimwi amikwasyi yabo bakaima anze aamatente aabo. Kumane nyika yakaasama akubamena! Mpoonya kutente kwakaloka mulilo kuzwa kujulu akumuumpa Kora abeenzinyina bali 250.

Jehova wakaambila Musa kuti: ‘Bweza musako kuli silutwe umwi aumwi kuzwa kumusyobo umwi aumwi, mpoonya ulembe zina lyasilutwe ooyo alinguwo. Pele amusako wamusyobo wabana Levi, ulembe zina lya Aroni. Wamana wiibikke misako eeyo mutente, mpoonya musako wamwaalumi ngondasala uyooba amaluba-luba.’

Buzuba bwakatobela, Musa wakaileta misako yoonse akwiitondezya basilutwe. Musako wa Aroni wakasyuuka maluba-luba alimwi wakazyala maalumondi aabizidwe. Munzila eeyi, Jehova wakatondezya kuti wakasalide Aroni kuba mupaizi mupati.