Ciindi basikutwela bana Israyeli nobakaunka kumunzi wa Jeriko, bakaakukkala muŋanda yamukaintu wazina lya Rahabu. Mwami wa Jeriko wakaazyiba makani aaya kumane wakatuma basikalumamba kuŋanda ya Rahabu. Mukaintu ooyu wakabasisa basikutwela muciluli akwaambila basikalumamba kubelesya nzila iimbi. Wakaambila basikutwela kuti: ‘Ndilamugwasya nkaambo ndilizyi kuti Jehova ulaandinywe alimwi akuti muyakwiizunda nyika iino. Ndamulomba mundisyomezye kuti muyoondifwutula mebo amukwasyi wangu.’

Basikutwela bakaambila Rahabu kuti: ‘Twasyomezya kuti kunyina uunooli muŋanda yako uuyoojaigwa.’ Bakamwaambila kuti: ‘Weelede kwaanga ntambo eeyi iisalala awindo kutegwa mukwasyi wako ukafwutuke.’

Rahabu wakainzya basikutwela awindo kubelesya ntambo. Bakaunka kumalundu akuyuba ooko mazuba otatwe kabatanapiluka kuli Joshua. Kumane bana Israyeli bakazabuka mulonga wa Jordano akulibambila kuzunda munzi. Jeriko wakali munzi wakusaanguna ngobakazunda. Jehova wakabaambila kuzinguluka munzi ooyu ciindi comwe abuzuba kwamazuba aali 6. Mubuzuba bwanamba 7, bakauzinguluka munzi ziindi zili 7. Kumane bapaizi bakalizya myeembo, mpoonya basikalumamba bakoongolola kusikila mpobagolela. Bwaanda bwamunzi bwakawa! Pele ŋanda ya Rahabu iyakali abwaanda yakacaala kayiimvwi. Rahabu amukwasyi wakwe bakafwutuka akaambo bakasyoma Jehova.

Makani aajatikizya Jeriko akamwaika mumasena aambi aamu Kanana. Bami ibazwa mumasena aaya bakabungana antoomwe kutegwa balwane bana Israyeli. Pele bana Gibeoni bakaba amuzeezo wiindene. Bakasama zisani zizapaukide akuunka kuli Joshua akwaamba kuti: ‘Twazwa kucisi cakule kapati. Twakamvwa kujatikizya Jehova alimwi azintu zyoonse nzyaakamucitila ku Egepita aku Moabu. Twalomba kuti mutatujayi, eelyo tuyooba babelesi banu.’

Joshua wakabasyoma akuzumina kuti takabalwani. Nokwakainda mazuba otatwe, wakazyiba kuti tiibakali kuzwa kucisi cakule. Bakali kuzwa mu Kanana. Joshua wakabuzya bana Gibeoni kuti: ‘Ino mwakatucengela nzi?’ Bakavwiila kuti: ‘Twakaliyoowede kapati! Tulizyi kuti Jehova Leza wanu nguumulwanina. Twakomba kaka mutatujayi!’ Joshua wakacita kweelana ambwaakabasyomezyede, aboobo tanaakabajaya pe.

Kakutanainda ciindi cilamfwu, bami bosanwe bamu Kanana abasikalumamba babo bakakonga bana Gibeoni kuti balabajaya. Joshua abasikalumamba bakwe bakeenda busiku boonse kutegwa bakabavwune. Nkondo yakatalika kuseeni buzuba ibwakatobela. Bana Kanana bakamwaikizyanya kutija. Kuli koonse nkobakatijila, Jehova wakabalosyela mabwe mapati kapati. Mpoonya Joshua wakalomba Jehova kuti zuba liime. Ino nkaambo nzi ncaakalomba Jehova kuti zuba liime kakuli izuba talina buzuba lyaima. Nkaambo Joshua wakali kusyoma Jehova. Izuba lyakaima buzuba boonse kusikila mane bana Israyeli babazunda bami bana Kanana abasikalumamba babo.